ଭୁବନେଶ୍ୱର: ତ୍ରିସ୍ତରୀୟ ପଂଚାୟତ ନିର୍ବାଚନ ପାଇଁ ସଂରକ୍ଷିତ ଆସନ ସଂଖ୍ୟା ଘୋଷଣା କରିଛନ୍ତି ରାଜ୍ୟ ନିର୍ଵାଚନ କମିଶନ। ରାଜ୍ୟ ନିର୍ବାଚନ କମିସନ ସଚିବ ରବୀନ୍ଦ୍ର ସାହୁ ଆଜି ଏ ସମ୍ପର୍କରେ ଘୋଷଣା କରି କହିଛନ୍ତି ଯେ ଏହି ତ୍ରିସ୍ତରୀୟ ପଂଚାୟତ ନିର୍ବାଚନରେ ମୋଟ ୬ ହଜାର ୭୯୪ଟି ପଂଚାୟତ ମଧ୍ୟରୁ ୩ ହଜାର ୫୦୦ଟି ସରପଞ୍ଚ ଆସନ ମହିଳାମାନଙ୍କ ପାଇଁ ସଂରକ୍ଷିତ ରଖାଯାଇଛି।
ସେ କହିଛନ୍ତି ଯେ ୯୧ ହଜାର ୯୧୬ଟି ୱାର୍ଡ ମଧ୍ୟରୁ ୪୯ ହଜାର ୪୬୯ଟି ୱାର୍ଡ ମେମ୍ବର ଆସନ ମହିଳାମାନଙ୍କ ପାଇଁ ସଂରକ୍ଷିତ ରହିଛି। ଅନ୍ୟ ପକ୍ଷରେ ୧୨ ହଜାର ୩୧ଟି ୱାର୍ଡ ପଛୁଆ ବର୍ଗଙ୍କ ପାଇଁ ସଂରକ୍ଷିତ ରହିଛି। ମିଳିଥିବା ସୂଚନାନୁଯାୟୀ, ୨୦୧୭ରେ ୬ ହଜାର ୮୦୧ଟି ଗ୍ରାମପଂଚାୟତ ପାଇଁ ନିର୍ବାଚନ ହୋଇଥିବା ବେଳେ ଚଳିତ ଥର ୬ ହଜାର ୭୯୪ଟି ଗ୍ରାମପଂଚାୟତ ପାଇଁ ନିର୍ବାଚନ ହେବ। ଏଥର ୭ଟି ଗ୍ରାମ ପଂଚାୟତର ଏନଏସିରେ ମିଶ୍ରଣ ଘଟି ଥିବାରୁ ସେହି ପଂଚାୟତଗୁଡ଼ିକରେ ନିର୍ବାଚନ ହେବ ନାହିଁ। ଏନଏସିରେ ମିଶ୍ରଣ ଘଟି ଥିବା ସେହି ଗ୍ରାମ ପଂଚାୟତଗୁଡ଼ିକ ହେଉଛି ବାଲେଶ୍ୱର ଜିଲ୍ଲା ରେମୁଣାର ୪ଟି, ନୟାଗଡ଼ ଜିଲ୍ଲା ଓଡ଼ଙ୍ଗାର ୨ଟି ଏବଂ ବରଗଡ଼ ବିଜେପୁରର ଗୋଟିଏ ଗ୍ରାମ ପଂଚାୟତ।
ସୂଚନା ମୁତାବକ, ଏହି ତ୍ରିସ୍ତରୀୟ ପଂଚାୟତ ନିର୍ବାଚନରେ ପଛୁଆ ବର୍ଗଙ୍କ ପାଇଁ ୭୭୮ଟି ସରପଂଚ ଆସନ ସଂରକ୍ଷିତ ରଖାଯାଇଥିବା ବେଳେ ୬ ହଜାର ୭୯୩ ସମିତି ସଭ୍ୟ ଆସନ ଭିତରୁ ୩ ହଜାର ୫୩୮ଟି ମହିଳାମାନଙ୍କ ପାଇଁ ସଂରକ୍ଷିତ ରଖାଯାଇଛି ଓ ପଛୁଆ ବର୍ଗଙ୍କ ପାଇଁ ୯୧୩ଟି ଆସନ ସଂରକ୍ଷିତ ରଖାଯାଇଛି।
Comments are closed.