ଜୟପୁର: ରାଜସ୍ଥାନର ପାଲୀ ଜିଲାରେ ଜଣେ ଦୁଷ୍କର୍ମ ଅଭିଯୁକ୍ତ ପୀଡ଼ିତାଙ୍କ ପିତାଙ୍କୁ ହତ୍ୟା କରିବା ସହ ତାଙ୍କ ମାଆ ଓ ଭାଇଙ୍କୁ ଆକ୍ରମଣ କରି ଆହତ କରିଛି। ଅଭିଯୁକ୍ତ ମଧ୍ୟ ଆଘାତ ପ୍ରାପ୍ତ ହୋଇ ଚିକିତ୍ସିତ ଥିବା ପୁଲିସ ସୂଚନା ଦେଇଛି। ଅଭିଯୁକ୍ତ ନାଁରେ ଦୁଷ୍କର୍ମ ମାମଲା ରୁଜୁ ହେବା ପରେ ଉତ୍ୟକ୍ତ ହୋଇ ସେ ପୀଡ଼ିତାଙ୍କ ପିତାଙ୍କୁ ହତ୍ୟା କରିଥିବା ଜଣାପଡ଼ିଛି।
ପୁଲିସର କହିବାନୁସାରେ, ଜିଲାର ସାଦଡ଼ି ଥାନାରେ ଧନ୍ନାରାମ ନାମକ ବ୍ୟକ୍ତି ବିରୁଦ୍ଧରେ ୧୦ ନଭେମ୍ବରରେ ଦୁଷ୍କର୍ମ ଅଭିଯୋଗରେ ମାମଲା ରୁଜୁ କରାଯାଇଥିଲା। ପୀଡ଼ିତା ଅଭିଯୋଗ କରିଥିଲେ ଯେ, ଧନ୍ନାରାମ ତାଙ୍କୁ ନାସିକ ନେଇ ସେଠାରେ ଦୁଷ୍କର୍ମ କରିଥିଲା। ପୁଲିସ ଉପ ଅଧୀକ୍ଷକ ହିମାଂଶୁ ଜାଙ୍ଗିଡ଼୍ ମଙ୍ଗଳବାର ସୂଚନା ଦେଇଛନ୍ତି ଯେ, ଦୁଷ୍କର୍ମର୍ ମାମଲାରେ ଫେରାର୍ ଥିବା ଅଭିଯୁକ୍ତ ରବିବାର ବିଳମ୍ବିତ ରାତିରେ ଉନ୍ଦରଥଲ ଗାଁରେ ଥିବା ପୀଡ଼ିତାଙ୍କ ଘରେ ପଶିଥିଲା ଓ ତାଙ୍କ ପିତାଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରିଥିଲା। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା। ଇତି ମଧ୍ୟରେ ପିତାଙ୍କୁ ରକ୍ଷା କରିବାକୁ ଆସିଥିବା ପୀଡ଼ିତାଙ୍କ ମାଆ ଓ ଭାଇଙ୍କୁ ମଧ୍ୟ ସେ ଆକ୍ରମଣ କରିଥିଲା। ଯଦ୍ୱାରା ଦୁହେଁ ଆହତ ହୋଇଥିଲେ।
ଅପର ପକ୍ଷରେ, ଏହି ମାମଲାର ତଦନ୍ତରେ ଅବହେଳା କରିଥିବା ଅଭିଯୋଗରେ ସାଦଡ଼ି ଥାନା ଅଧିକାରୀ ରାଜଦୀପେନ୍ଦ୍ର ସିଂହଙ୍କୁ ନିଲମ୍ବିତ କରାଯାଇଥିବା ପୁଲିସ ସୂଚନା ଦେଇଛି। ଏହା ସହିତ ପୀଡ଼ିତାଙ୍କୁ ପୁଲିସ ପକ୍ଷରୁ କଡ଼ା ସୁରକ୍ଷା ପ୍ରଦାନ କରାଯାଇଛି।
Comments are closed.