ପାକିସ୍ତାନରେ ବଳାତ୍କାରୀଙ୍କୁ ନପୁଂସକ କରାଯିବ

ଇସଲାମାବାଦ : ପାକିସ୍ତାନରେ ଏଣିକି ବଳାତ୍କାରୀଙ୍କୁ ନପୁଂସକ କରାଯିବା ଭଳି କଠୋର ଦଣ୍ଡ ଦିଆଯିବ। ଏ ସଂକ୍ରାନ୍ତ ଦୁଇଟି ଅଧ୍ୟାଦେଶକୁ ଇମ୍ରାନ ଖାଁଙ୍କ ଫେଡେରାଲ କ୍ୟାବିନେଟ୍‌ ମଞ୍ଜୁର କରିଛି। ଏହି ଅଧ୍ୟାଦେଶରେ ଥିବା ବ୍ୟବସ୍ଥା ଅନୁଯାୟୀ, ପୀଡ଼ିତାଙ୍କ ଅନୁମତିକ୍ରମେ ରାସାୟନିକ ଉପାୟରେ ବଳାତ୍କାରୀଙ୍କ ଯୌନ କ୍ଷମତା ହ୍ରାସ କରାଯିବ ଓ ଆବଶ୍ୟକସ୍ଥଳେ ଫାଶୀ ଦଣ୍ଡ ଦିଆଯିବ କିମ୍ବା ଆଜୀବନ ତଥା ୨୫ବର୍ଷ କାରାଦଣ୍ଡ ଦିଆଯିବ। ଏଥିସହିତ ବଳାତ୍କାର ଓ ଯୌନ ନିର୍ଯାତନା ଭଳି ମାମଲାର ଶୀଘ୍ର ଶୁଣାଣି ପାଇଁ ସ୍ବତନ୍ତ୍ର ଅଦାଲତ ପ୍ରତିଷ୍ଠା କରାଯିବ। ପୁଲିସ ବ୍ୟବସ୍ଥାରେ ମହିଳାଙ୍କ ଭୂମିକା ବୃଦ୍ଧି ଓ ସାକ୍ଷୀଙ୍କ ସୁରକ୍ଷା ବ୍ୟବସ୍ଥାକୁ ମଧ୍ୟ ଆଇନରେ ଅନ୍ତର୍ଭୁକ୍ତ କରାଯାଇଛି। ଇମ୍ରାନଙ୍କ କହିବାନୁଯାୟୀ, ଏଭଳି ଅପରାଧକୁ ବରଦାସ୍ତ କରାଯିବ ନାହିଁ। ବଳାତ୍କାରର ଶିକାର ହେଉଥିବା ମହିଳାମାନେ ଯେମିତି ନିର୍ବିଘ୍ନରେ ଅଭିଯୋଗ ପଞ୍ଜୀକରଣ କରିପାରିବେ ସେଥିପାଇଁ ପଦକ୍ଷେପ ନିଆଯାଉଛି। ଅତ୍ୟାଧୁନିକ ଉପାୟରେ ମାମଲାର ତଦନ୍ତ ସହ କ୍ୟାମେରା ସମ୍ମୁଖରେ ମାମଲାର ବିଚାର କରାଯିବ। ସରକାର ସେମାନଙ୍କର ପରିଚୟ ଗୋପନୀୟ ରଖିବେ। ଏହି ଅଧ୍ୟାଦେଶକୁ ଖୁବ ଶୀଘ୍ର ନ୍ୟାସନାଲ ଆସେମ୍ବ୍ଲିରେ ଗୃହୀତ କରାଯିବ।

Comments
Loading...