ପୁରୀ: ୯ଦିନ ଧରି ମାଉସୀ ଘରେ ରହିବା ପରେ ମହାପ୍ରଭୁ ଶ୍ରୀଜଗନ୍ନାଥ ଭଉଣୀ ସୁଭଦ୍ରା ଏବଂ ବଡ଼ ଭାଇ ବଳଭଦ୍ରଙ୍କୁ ସାଙ୍ଗରେ ଧରି ଆଜି ରତ୍ନବେଦୀକୁ ବାହୁଡ଼ିବେ। ବୁଧବାର ବାହୁଡ଼ାଯାତ୍ରା ଅବସରରେ ମହାପ୍ରଭୁଙ୍କ ପହଣ୍ଡି ଶେଷ ହୋଇଛି। ପ୍ରଥମେ ଶ୍ରୀ ସୁଦର୍ଶନ, ପରେ ବଳଭଦ୍ର, ସୁଭଦ୍ରା ଏବଂ ଶେଷରେ ଶ୍ରୀଜଗନ୍ନାଥ ପହଣ୍ଡିରେ ଆସି ରଥକୁ ବିଜେ ହୋଇଛନ୍ତି। ସକାଳ ସାଢ଼େ ୯ଟା ସୁଦ୍ଧା ପହଣ୍ଡି ଶେଷ ହେବା ପରେ ଶରଧାବାଲିରେ ରଥାରୂଢ଼ ହୋଇଛନ୍ତି ତିନି ଠାକୁର।
ଏହା ପରେ ରଥରେ ମହାପ୍ରଭୁଙ୍କ ରୀତିନୀତି ସମ୍ପନ୍ନ ହେବ। ଗଜପତି ମହାରାଜା ଦିବ୍ୟସିଂହ ଦେବ ରଥକୁ ଆସି ଛେରାପହଁରା କରିବା ପରେ ବଡ଼ଦାଣ୍ଡରେ ଗଡ଼ିବ ତିନି ରଥ। ପ୍ରଥମେ ତାଳଧ୍ଵଜ, ପଛକୁ ଦେବଦଳନ ଏବଂ ଶେଷରେ ନନ୍ଦିଘୋଷ ରଥକୁ ସେବାୟତମାନେ ଶ୍ରୀମନ୍ଦିର ଅଭିମୁଖେ ଟାଣିନେବେ। ଗଜପତିଙ୍କ ଛେରାପହଁରା ପରେ ଦିନ ୧୨ଟାରେ ରଥଟଣା ଆରମ୍ଭ ହେବ ବୋଲି ସମୟ ଧାର୍ଯ୍ୟ ହୋଇଛି। ଗୁଣ୍ଡିଚା ଯାତ୍ରା ପରି ବାହୁଡ଼ା ଯାତ୍ରା ବି ବିନା ଭକ୍ତରେ ଅନୁଷ୍ଠିତ ହେବ। ବଡ଼ଦାଣ୍ଡକୁ ଯେପରି କୌଣସି ଲୋକ ନ ଆସିବେ ସେଥିଲାଗି ସମସ୍ତ ପ୍ରବେଶ ପଥକୁ ପୁଲିସ ସିଲ୍ କରିଦେବା ସହିତ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରଯାଇଛି। ବଡ଼ଦାଣ୍ଡକୁ ସଂଯୋଗ କରୁଥିବା ବିଭିନ୍ନ ଗଳିକନ୍ଦି ଏବଂ ସାହିରାସ୍ତାକୁ ବ୍ୟାରିକେଡ୍ ଦ୍ବାରା ବନ୍ଦ କରିଦିଆଯାଇଛି।
Comments are closed.