ପାହାଡରୁ ପଥର ଖସିବା ଘଟଣା: ସ୍ଥିତି ଅନୁଧ୍ୟାନ କଲା ପ୍ରଶାସନ

0

ଗଞ୍ଜାମ: ଗଞ୍ଜାମ ଜିଲା ଛତ୍ରପୁର ବ୍ଲକ୍ ଅନ୍ତର୍ଗତ ସିନ୍ଦରାପଲ୍ଲୀ ଗ୍ରାମର ପାହାଡ଼ରୁ କିଛିଦିନ ଧରି ମାଟି ଖସିବା ସହ ବଡ଼ବଡ଼ ପଥର ମାନ ଖସୁଥିଲା। ଏହା ଗ୍ରାମବାସୀମାନଙ୍କ ମନରେ ଏକ ଭୟର ବାତାବରଣ ସୃଷ୍ଟି କରିଥିଲା । ସେହି ରାସ୍ତା ଦେଇ ଲୋକେ ଯିବା ଆସିବା କରିବା ପାଇଁ ଭୟଭୀତ ହେଉଥିଲେ । ଏପରିକି ଗାଈଗୋରୁଙ୍କୁ ମଧ୍ୟ ସେହି ରାସ୍ତାରେ କେହି ଛାଡ଼ୁନଥିଲେ । ଏନେଇ ଗଣମାଧ୍ୟମ ପ୍ରତିନିଧିମାନେ ଖବର ପ୍ରକାଶ କରିବା ପରେ ଜିଲା ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି । ଉପଜିଲ୍ଲାପାଳ ଦେବବ୍ରତ ସାହୁ ସେହି ଗ୍ରାମକୁ ଯାଇ ସ୍ଥିତି ଅନୁଧ୍ୟାନ କରିବା ପାଇଁ ତହସିଲଦାର ବିଜୟ କେତନ ସାହୁଙ୍କୁ ନିର୍ଦ୍ଦେଶ ଦେଇଛନ୍ତି । ଫଳସ୍ୱରୂପ ଅତିରିକ୍ତ ତହସିଲଦାର ଶରତ କୁମାର ପାତ୍ର ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ ସହ ଗ୍ରାମବାସୀଙ୍କ ସହ ଆଲୋଚନା କରିଛନ୍ତି । ଗ୍ରାମବାସୀଙ୍କ ସ୍ୱାର୍ଥରକ୍ଷା ଯେପରି ହୋଇପାରିବ ସେ ନେଇ ପଦକ୍ଷେପ ନିଆଯିବ ବୋଲି ଉପଜିଲାପାଳ ପ୍ରତିଶ୍ରୁତି ଦେଇଛନ୍ତି । ପ୍ରଶାସନର ତତକ୍ଷଣାତ ପ୍ରତିକ୍ରିୟା ଯୋଗୁଁ ଗ୍ରାମବାସୀ ଏବେ ଆଶ୍ୱସ୍ତ ଅନୁଭବ କରୁଛନ୍ତି ।

Comments
Loading...