ମନୋଜ ଦାସ ପାଇବେ କଳିଙ୍ଗ ସାହିତ୍ୟ ସମ୍ମାନ

ଭୁବନେଶ୍ବର : ଅଲୌକିକ କଳିଙ୍ଗ ମହୋତ୍ସବର ଚତୁର୍ଥ ସଂସ୍କରଣ ଶନିବାର ଆରମ୍ଭ ହେବ। ଏଥିରେ କଳିଙ୍ଗ ସାହିତ୍ୟ ସମ୍ମାନ -୨୦୨୦ ପାଇବେ ବିଶିଷ୍ଟ କଥାକାର ପଦ୍ମବିଭୂଷଣ ପ୍ରଫେସର ମନୋଜ ଦାସ ।
ଏହି ଅବସରରେ ଶ୍ରୀ ଦାସ ‘ଦିବ୍ୟ ଆନନ୍ଦ: ପ୍ରଜ୍ଞାନ, ଉନ୍ମାଦ ଓ ରୂପାନ୍ତରଣ’ ଶୀର୍ଷକରେ ମୁଖ୍ୟ ସମ୍ଭାଷଣ ପ୍ରଦାନ କରିବେ। ଏହି ପୁରସ୍କାର ଘୋଷଣା କରି ଅଲୌକିକ କଳିଙ୍ଗ ମହୋତ୍ସବ ପ୍ରତିଷ୍ଠାତା ତଥା ନିର୍ଦେଶକ ରଶ୍ମିରଞ୍ଜନ ପରିଡ଼ା କହିଛନ୍ତି ଯେ, ପଦ୍ମ ପୁରସ୍କାରପ୍ରାପ୍ତ ଶ୍ରୀ ଦାସଙ୍କ ସମ୍ଭାଷଣ ଚଳିତ ଅଲୌକିକ କଳିଙ୍ଗ ମହୋତ୍ସବରେ ଶୁଣିବା ସମସ୍ତ ପୁସ୍ତକ ତଥା କଳାପ୍ରେମୀଙ୍କ ପାଇଁ ଏକ ଅପୂର୍ବ ସୁଯୋଗ। ଏହା ସହିତ ଜୟଦେବ, ତୁକାରାମ, ତୁଳସୀ ଦାସ ଆଦି ମହାନ ସ୍ରଷ୍ଟାଙ୍କ ରଚନା ଉପରେ ଆଲୋଚନା କାର୍ଯ୍ୟକ୍ରମ ରହିଛି। ଯେଉଁ ବ୍ୟକ୍ତିମାନେ କେନ୍ଦେରା, ଧୁଡୁକି, ଖଞ୍ଜଣି ଆଦି ବଜାଇ ପାରୁଥିବେ ସେମାନଙ୍କୁ ଚଳିତ ମହୋତ୍ସବରେ ଭାଗ ନେବା ପାଇଁ ସୁଯୋଗ ଦିଆଯାଉଛି । ଓଡ଼ିଆ ଡାଏରୀ ଫାଉଣ୍ଡେସନ ଓ ଓଡ଼ିଶା ଡାଏରୀ ମିଡିଆର ମିଳିତ ଉଦ୍ୟମରେ ଏହି ମହୋତ୍ସବ ପାଳିତ ହେଉଛି।

Comments are closed.