କଟକ: କୋଣାର୍କ ଉତ୍ସବ ଓ ଆନ୍ତର୍ଜାତିକ ବାଲୁକା କଳା ଉତ୍ସବ ଆୟୋଜନ ବନ୍ଦ ରଖିବାକୁ ପ୍ରାର୍ଥନା କରି ହାଇକୋର୍ଟରେ ଜନସ୍ବାର୍ଥ ମାମଲା ରୁଜୁ ହୋଇଛି। ସମାଜସେବୀ ବୃନ୍ଦାବନ ଦାସ ଆଜାଦଙ୍କ ପକ୍ଷରୁ ଦାୟର ମାମଲାରେ ଦର୍ଶାଯାଇଛି ଯେ କରୋନା ଭୂତାଣୁ ସଂକ୍ରମଣକୁ ନେଇ ଦେଖା ଦେଇଥିବା ସ୍ଥିତିରେ କୋଣାର୍କ ଉତ୍ସବ ଓ ଆନ୍ତର୍ଜାତିକ ବାଲୁକା କଳା ଉତ୍ସବ ଆୟୋଜନ ବନ୍ଦ ରଖିବା ଉଚିତ। ରାଜ୍ୟ ସାରା ପ୍ରମୁଖ ଉତ୍ସବ ସବୁ ଆୟୋଜନ ପାଇଁ ଅନୁମତି ଦିଆଯାଉ ନାହିଁ। କଟକ ବାଲିଯାତ୍ରା ଓ ଧବଳେଶ୍ବରଙ୍କ ବଡ଼ଓଷା ଉତ୍ସବ ମଧ୍ୟ କରୋନା ପାଇଁ ବନ୍ଦ ରଖିବାକୁ ପ୍ରଶାସନ ନିଷ୍ପତ୍ତି ନେଇଛି।
ଏବେ କରୋନା ସଂକ୍ରମଣ ଯୋଗୁଁ ସ୍ଥିତି ଚିନ୍ତାଜନକ ରହିଛି। ପ୍ରତିଦିନ ଶତାଧିକ ସଂକ୍ରମିତ ରାଜ୍ୟରେ ଚିହ୍ନଟ ହେଉଛନ୍ତି। କିନ୍ତୁ କୋଣାର୍କ ଓ ଚନ୍ଦ୍ରଭାଗା ବେଳାଭୂମିରେ ଡିସେମ୍ବର ୧ରୁ ୫ ତାରିଖ ପର୍ୟ୍ୟନ୍ତ ଉପରୋକ୍ତ ଉତ୍ସବ ଆୟୋଜନ କରାଯିବା ପାଇଁ ଯୋଜନା ହୋଇଛି। ଏପରି କାର୍ୟ୍ୟକ୍ରମକୁ ଅନୁମତି ଦିଆଯିବା ଉଚିତ ନୁହେଁ। ଜନସ୍ବାର୍ଥ ଦୃଷ୍ଟିରୁ ଚଳିତ ବର୍ଷ କୋଣାର୍କ ଉତ୍ସବ ଓ ଆନ୍ତର୍ଜାତିକ ବାଲୁକା କଳା ଉତ୍ସବ ଆୟୋଜନ ବନ୍ଦ ରଖିବାକୁ ସରକାରଙ୍କୁ ନିର୍ଦ୍ଦେଶ ଦିଆଯାଉ ବୋଲି ଆବେଦନକାରୀ ଦର୍ଶାଇଛନ୍ତି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଶିବଶଙ୍କର ମହାନ୍ତି ମାମଲା ପରିଚାଳନା କରୁଛନ୍ତି।
Comments are closed.