ମହାମାରୀ ସମୟରେ ସତର୍କ ରହିଲେ ହିଁ ଜୀବନ ସୁରକ୍ଷିତ ରହିବ। ଘରେ ରହି ଅନ୍ଲାଇନ୍ ସପିଙ୍ଗ୍ କରିବାକୁ ବିଶ୍ବର ପ୍ରମୁଖ ରାଷ୍ଟ୍ରମୁଖ୍ୟମାନେ ପରାମର୍ଶ ଦେଇଚାଲିଛନ୍ତି। ଆମ ଦେଶରେ ଅନ୍-ଲାଇନ୍ କିଣାବିକା ଗତ କିଛି ବର୍ଷ ମଧ୍ୟରେ ବଢ଼ିଥିବାବେଳେ ବିଦେଶୀ ଦେଶର ଲୋକ ଏଇ ପ୍ରଣାଳୀରେ ଜିନିଷ କିଣାରେ ସମ୍ପୂର୍ଣ୍ଣ ଅଭ୍ୟସ୍ତ। ବ୍ରିଟେନ୍, ଆମେରିକା, ଅଷ୍ଟ୍ରେଲିଆ ଆଦି ଦେଶରେ ଉନ୍ନତମାନର ସାମଗ୍ରୀ ଉଭୟ ଦୋକାନ, ଅନ୍-ଲାଇନ୍ରେ ମିଳେ। ହେଲେ ଏଇ କରୋନା ସେଠା ବ୍ୟବସାୟୀଙ୍କୁ ଠକାମିର ବାଟ ଶିଖାଇଛି କହିଲେ ଭୁଲହେବନି। ଗତ କିଛି ମାସ ମଧ୍ୟରେ ସେଠାରେ ଅନ୍-ଲାଇନ୍ ସପିଙ୍ଗ୍ରେ ଶତାଧିକ ଲୋକ ଠକେଇର ଶିକାର ହେଉଥିବାର ଅଭିଯୋଗ ଆସିଛି।
କେହି ବିବାହ ପୋଷାକ ବରାଦ୍ ଦେଇ ତ’ ଅନ୍ୟ କେହି ଅତ୍ୟାବଶ୍ୟକସାମଗ୍ରୀ କିଣି ଅସନ୍ତୋଷ ଜାହିର୍ କରିଛନ୍ତି। ସପିଙ୍ଗ୍ ମଲ୍, ଷ୍ଟୋର୍ ନଯାଇ ଲୋକେ ଘରୁ ଅନ୍-ଲାଇନ୍ ଏବେ କେଉଁ ଭରସାରେ କରିବେ, ଏହାର ପ୍ରଶ୍ନ ସେଠା ପ୍ରଶାସନକୁ ପଚାରିଛନ୍ତି। ଫ୍ଲୋରିଡାନିବାସୀ ୩୭ ବର୍ଷୀୟା ପିଙ୍କିଙ୍କର ମଧ୍ୟ ସମାନ ଅଭିଯୋଗ। ସେଠା ମେୟର୍ ଏକ ଭିଡିଓ ଜରିଆରେ ସ୍ଥାନୀୟ ଲୋକଙ୍କୁ ସମସ୍ତ ସାମଗ୍ରୀ, ପୋଷାକଇତ୍ୟାଦି ଅନ୍-ଲାଇନ୍ରେ ବରାଦ୍ କରିବାକୁ ଅନୁରୋଧ କରିଥିଲେ। ଫ୍ଲୋରିଡାର ଉତ୍ତର-ପ୍ରାନ୍ତରେ ଥିବା ଏଇ ଛୋଟ ସହରର ଲୋକସଂଖ୍ୟା ମଧ୍ୟ ମେୟର୍ଙ୍କ ଉପଦେଶ ମାନିଲେ।
ଅନ୍-ଲାଇନ୍ କମ୍ପାନୀଗୁଡ଼ିକ ଭଲ ରିଆତି ଦେବା ସହ ଯଥା ସମୟରେ ଗ୍ରାହକଙ୍କୁ ହୋମ୍ ଡେଲିଭରୀ ଦେଉଥିଲେ। ଏସବୁ ଭିତେର ଠକାମି କିନ୍ତୁ ବନ୍ଦ ନଥିଲା। ଛୋଟ ସାମଗ୍ରୀରେ ଠକେଇ ହେଲେ; ଲୋକେ ସେସବୁକୁ ଦୃଷ୍ଟି ଦେଉନଥିଲେ। ବଡ଼ଧରଣର ଠକାମିର ଶିକାର ହେବା ପରେ ସ୍ଥାନୀୟ ଲୋକ ସ୍ବର ଉତ୍ତୋଳନ କରିଛନ୍ତି। ପିଙ୍କି ୧୦ ସପ୍ତାହ ତଳେ ୨୭ହଜାର ଟଙ୍କା ପଇଠ କରି ଅନ୍-ଲାଇନ୍ ସାଇଟ୍୍ରୁ ଏକ ସୁନ୍ଦର ସୋଫା ବରାଦ୍ କଲେ। ଏହାର ମୂଲ୍ୟ ୫୫ହଜାର ଟଙ୍କା ଥିବାବେଳେ ‘ଧନ୍ୟବାଦ ଜ୍ଞାପନ ଦିବସ’ ପାଇଁ ସୋଫାର ଦର ୨୭ହଜାର ଟଙ୍କା ଥିଲା। ଯଥା ସମୟରେ ଘରେ ପହଞ୍ଚିଥିଲା ସୋଫା, ଏହାର ପ୍ୟାକିଂ ଦେଖି ସେ ଓ ତାଙ୍କ ସ୍ବାମୀ ଆଶ୍ଚର୍ଯ୍ୟ ହେଲେ। କାରଣ ସୋଫାର ଆକାର ବହୁତ ଛୋଟ ଥିଲା। ଠକାମିରର ଶିକାର ହୋଇଥିବା ଜାଣି ସେମାନେ ଗ୍ରାହକ ସେବା ସହ ଯୋଗାଯୋଗ କଲେ, କର୍ମଚାରୀ କିନ୍ତୁ ପାଲଟା ଯୁକ୍ତି କଲେ। ପିଙ୍କି ଓ ତାଙ୍କ ସ୍ବାମୀ ଏ ବାବଦରେ ଏତଲା ଦେବାକୁ କହିବାରୁ ଗ୍ରାହକ ସେବା ଭୁଲ୍ ସ୍ବୀକାର କରି ଟଙ୍କା ଫେରସ୍ତ କରିବାକୁ ରାଜି ହୋଇଥିଲେ। ଆଗାମୀ ଦିନରେ ଲୋକେ କିଭଳି ଜିନିଷ କିଣିବେ, ସେ ନେଇ ଚିନ୍ତାରେ ପଡ଼ିଗଲେଣି।
Comments are closed.