ଓଏନଜିସି ଦେଶର ସବୁଠାରୁ ଲାଭଦାୟକ ସରକାରୀ ଉଦ୍ୟୋଗ

ନୂଆଦିଲ୍ଲୀ : ଭାରତର ସର୍ବବୃହତ ତୈଳ ଓ ଗ୍ୟାସ ଉତ୍ପାଦନକାରୀ ସଂସ୍ଥା ଭାରତୀୟ ତୈଳ ନିଗମ (ଇଣ୍ଡିଆନ ଅଏଲ କର୍ପୋରେସନ)କୁ ପଛରେ ପକାଇ ତୈଳ ଓ ପ୍ରାକୃତିକ ବାସ୍ପ ନିଗମ (ଓଏନଜିସି) ଦେଶର ସବୁଠାରୁ ଲାଭଦାୟକ ସରକାରୀ ଉଦ୍ୟୋଗର ମାନ୍ୟତା ହାସଲ କରିଛି।
ତାଲିକାଭୁକ୍ତ ତୈଳ କମ୍ପାନୀଗୁଡିକର ଆୟର ବିବୃତ୍ତି ଅନୁଯାୟୀ ତୈଳ ଓ ପ୍ରାକୃତିକ ବାସ୍ପ ନିଗମ (ଓଏନଜିସି)୨୦୧୮-୧୯ ଆର୍ଥିକ ବର୍ଷର ଆୟରେ ଶତକଡା ୩୪ଭାଗ ବୃଦ୍ଧି ଘଟି ୨୬ହଜାର ୭୧୬କୋଟି ଟଙ୍କା ନେଟ୍‍ ଲାଭ କରିଥିବା ଜଣାପଡିଛି। ଏହା ତୁଳନାରେ ଭାରତୀୟ ତୈଳ ନିଗମ-ଆଇଓସିଲ-୨୦୧୯ ମାର୍ଚ୍ଚ ୩୧ତାରିଖ ସୁଦ୍ଧା ସମାପ୍ତ ହେଉଥିବା ଆର୍ଥିକ ବର୍ଷରେ ୧୭ହଜାର ୨୭୪କୋଟି ଟଙ୍କାର ନେଟ୍‍ ଲାଭ କରିଛି। ପୂର୍ବ ଦୁଇ ଆର୍ଥିକ ବର୍ଷରେ ଓଏନଜିସି ସବୁଠାରୁ ଅଧିକ ଲାଭକାରୀ ସରକାରୀ ଉଦ୍ୟୋଗର ମାନ୍ୟତା ହରାଇଥିବାବେଳେ ଏହି ମାନ୍ୟତା ଆଇଓସିଲକୁ ଯାଇଥିଲା। ତୈଳ ଦର ହ୍ରାସ ଯୋଗୁଁ ଆଇଓସିଲ ଅପେକ୍ଷାକୃତ କମ୍‍ ପରିମାଣର ତୈଳ ବିଶୋଧନ କରୁଥିବାରୁ୨୦୧୯ ଆର୍ଥିକ ବର୍ଷରେ ଭାରତର ସର୍ବବୃହତ୍‍
ତୈଳ ଉତ୍ପାଦନକାରୀ ଉଦ୍ୟୋଗର ମାନ୍ୟତା ମୁକେଶ ଆମ୍ବାନୀଙ୍କ ରିଲିଆନ୍ସ କମ୍ପାନୀକୁ ମିଳିଛି । ୨୦୧୭-୧୮ ଆର୍ଥିକ ବର୍ଷରେ ଆଇଓସିଲ ୨୧ହଜାର ୩୪୬ କୋଟି ଟଙ୍କାର ନେଟ୍‍ ଲାଭ କରିଥିଲା । ସେହିବର୍ଷ ଓଏନଜିସିର ନେଟ୍‍ ଲାଭ ପରିମାଣ ଥିଲା ୧୯ହଜାର ୯୪୫କୋଟି ଟଙ୍କା।

Comments
Loading...