କାନପୁର : ରାଷ୍ଟ୍ରପତିଙ୍କ କାନପୁର ଗସ୍ତ କାଳରେ ଏକ ଦୁର୍ଭାଗ୍ୟଜନକ ଘଟଣା ଘଟିଛି। ଟ୍ରାଫିକ କଟକଣା ଯୋଗୁଁ ଶୁକ୍ରବାର ରାତିରେ ଜନୈକ ୫୦ବର୍ଷୀୟା ଅସୁସ୍ଥ ମହିଳାଙ୍କର ମୃତ୍ୟୁ ଘଟିଛି। ମୃତ ମହିଳା ଭାରତୀୟ ଉଦ୍ୟୋଗ ସଂଘ (ଆଇଏଆଇ) ସ୍ଥାନୀୟ ଶାଖା ସଭାପତି ବନ୍ଦନା ମିଶ୍ର ବୋଲି ଜଣାପଡ଼ିଛି। କରୋନା ସଂକ୍ରମିତ ବନ୍ଦନାଙ୍କୁ ଗୁରୁତର ଅବସ୍ଥାରେ ଡାକ୍ତରଖାନା ନିଆଯାଉଥିବାବେଳେ ତାଙ୍କ ଗାଡ଼ି ଟ୍ରାଫିକ କଟକଣା ଯୋଗୁଁ ଅଟକି ଯାଇଥିଲା; ଫଳରେ ରାସ୍ତାରେ ତାଙ୍କର ମୃତ୍ୟୁ ହୋଇଥିଲା। ଏହି ଘଟଣା ନେଇ କାନପୁର ମହାନଗର ପୁଲିସ ଆୟୁକ୍ତ ଅସୀମ ଅରୁଣ ଦୁଃଖ ପ୍ରକାଶ କରିବା ସହ ପୁଲିସ ବିଭାଗ ପକ୍ଷରୁ କ୍ଷମା ମାଗିଛନ୍ତି। ଭବିଷ୍ୟତରେ ଏପରି ଘଟଣାର ପୁନରାବୃତ୍ତି ହେବ ନାହିଁ ବୋଲି ସେ ପ୍ରତିଶ୍ରୁତି ଦେଇଛନ୍ତି। ଏହି ଘଟଣା ନେଇ ସବ୍ଇନ୍ସପେକ୍ଟର ସୁଶୀଲ କୁମାର ଓ ଅନ୍ୟ ୩ ଜଣ ପୁଲିସ କର୍ମଚାରୀଙ୍କୁ ନିଲମ୍ବନ କାରଯାଇଛି। ଅତିରିକ୍ତ ଡିସିପିଙ୍କୁ ଘଟଣାର ତଦନ୍ତ ଦାୟିତ୍ବ ଦିଆଯାଇଛି। ରାଷ୍ଟ୍ରପତି ରାମନାଥ କୋବିନ୍ଦ ମଧ୍ୟ ବନ୍ଦନାଙ୍କ ପରଲୋକରେ ଦୁଃଖ ପ୍ରକାଶ କରିଛନ୍ତି। ରାଷ୍ଟ୍ରପତି ଜିଲାପାଳ ଓ କାନପୁର ପୁଲିସ ଆୟୁକ୍ତଙ୍କୁ ଫୋନ କରି ସବିଶେଷ ଖବର ବୁଝିଥିବା ପ୍ରକାଶ।
Comments are closed.