ଲକ୍ଷ୍ନୌ: ଉତ୍ତରପ୍ରଦେଶର ଅନାମିକା ଶୁକ୍ଳା ନାମ୍ନୀ ଜଣେ ଶିକ୍ଷୟିତ୍ରୀ ଏବେ ଦେଶବ୍ୟାପୀ ଚର୍ଚାରେ । ଏହି ମହିୟସୀ ମହିଳାଙ୍କୁ ଏକ ସାଙ୍ଗରେ ୨୫ ସ୍କୁଲରେ ନିଯୁକ୍ତି ଦିଆଯାଇଥିଲା ଓ ଗୋଟିଏ ସ୍ଥାନରେ କାର୍ଯ୍ୟ କରୁଥିଲେ ହେଁ ୨୫ ସ୍କୁଲରୁ ତାଙ୍କୁ ମାସିକ ୩୦ ହଜାର ଟଙ୍କା ଲେଖାଏଁ ବେତନ ମିଳୁଥିଲା । ଅର୍ଥାତ୍ ମାସକୁ ସାଢ଼େ ସାତ ଲକ୍ଷ ଟଙ୍କା । ୧୩ ମାସରେ ଏହି ମହିଳାଙ୍କ ଦରମା ଖାତାରେ ପାଖାପାଖି କୋଟିଏ ଟଙ୍କା ଜମା ହୋଇଛି । ସମ୍ପୃକ୍ତ ଶିକ୍ଷୟିତ୍ରୀ ଏତେ ଟଙ୍କା ତାଙ୍କ ଜମାଖାତାକୁ ଆସୁଥିବା ନେଇ କାହାରିକୁ ସୂଚନା ମଧ୍ୟ ଦେଇ ନାହାନ୍ତି । ମାତ୍ର ଏବେ ଶିକ୍ଷକ ଓ ସ୍କୁଲର ଡ଼ାଟା ବେସ୍ ପ୍ରସ୍ତୁତି ବେଳେ ଏହା ସରକାରଙ୍କ ଦୃଷ୍ଟିକୁ ଆସିଛି । ଏହାପରେ ସମ୍ପୃକ୍ତ ଶିକ୍ଷୟିତ୍ରୀ ଫେରାର ହୋଇ ଯାଇଛନ୍ତି ।
ଘଟଣାଟି ଏମିତି । ଅନାମିକା ଶୁକ୍ଳା ନାମ୍ନୀ ଏହି ଯୁବତୀଙ୍କୁ କେଜିବିଭି (କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟ)ରେ ବିଜ୍ଞାନ ଶିକ୍ଷୟିତ୍ରୀ ଭାବରେ ନିଯୁକ୍ତି ମିଳିଥିଲା ମାତ୍ର ୧୩ ମାସ ତଳେ । ମାସକୁ ତାଙ୍କର ବେତନ ହେଉଛି ୩୦ ହଜାର ଟଙ୍କା । ମାତ୍ର ଗତ ୧୩ ମାସରେ ତାଙ୍କ ବ୍ୟାଙ୍କ ଜମାଖାତାରେ ପ୍ରାୟ ୯୭.୫ ଲକ୍ଷ ଟଙ୍କା ଜମା କରାଯାଇଛି ।
ଉତ୍ତରପ୍ରଦେଶ ସ୍କୁଲ ଶିକ୍ଷା ମହାନିର୍ଦେଶକ ବିଜୟ କିରନ ଆନନ୍ଦଙ୍କ ସୂଚନା ଅନୁସାରେ ମୈନପୁରୀ ନିବାସୀ ଅନାମିକା ଯେଉଁ ସ୍କୁଲରେ କାମ କରୁଥିଲେ ସେଠିକାର ରେକର୍ଡ଼ ଅନୁସାରେ ସେ ଗତ ବର୍ଷେ ହେଲା କାମ କରୁଛନ୍ତି । ମାତ୍ର ଯେତେବେଳେ ପ୍ରେରଣା ପୋର୍ଟାଲରେ ଅନଲାଇନ ରେକର୍ଡ଼ ଦରଜ କରାଯାଉଥିଲା, ସେତେବେଳେ ଜଣେ କିପରି ୨୫ ସ୍ଥାନରେ ନିଜର ଉପସ୍ଥିତି ଦର୍ଶାଉଥିଲେ ତାହା ନେଇ ତଦନ୍ତ ଆରମ୍ଭ ହୋଇଛି ବୋଲି ବିଜୟ ଆନନ୍ଦ କହିଛନ୍ତି ।
ଉତ୍ତରପ୍ରଦେଶର ପ୍ରୟାଗରାଜ, ଆମ୍ବେଦକରନଗର, ଆଲିଗଡ଼, ସାହାରନପୁର, ବାଗପତ ଆଦି ଜିଲାର ୨୫ଟି ସ୍କୁଲରେ ଅନାମିକାଙ୍କ ନିଯୁକ୍ତି କିପରି ହୋଇଛି ତାହା ଏବେ ବି ସନ୍ଦେହ ସୃଷ୍ଟି କରିଛି । ଏହି ସ୍କୁଲଗୁଡ଼ିକରେ ଶିକ୍ଷକଙ୍କୁ ଠିକା ନିଯୁକ୍ତି ଦିଆଯାଇଥାଏ ଓ ମାସକୁ ୩୦ ହଜାର ଟଙ୍କା ବେତନ ମିଳେ । ପ୍ରତି ବ୍ଲକରେ ଗୋଟିଏ କେଜିବିଭି ରହିଛି । ବାସ୍ତବରେ ଅନାମିକାଙ୍କ ଅସ୍ତିତ୍ବ ଅଛି କି ନାହିଁ ତାହା ଏବେ ପ୍ରଶ୍ନବାଚୀ ହୋଇଛି । ଅନାମିକା ବୋଲି କେହି ଶିକ୍ଷୟିତ୍ରୀ ଅଛନ୍ତି ନା ତାଙ୍କ ନାମରେ ଆଉ କେହି ଅର୍ଥ ଲୁଟିଛି ତାହା ତଦନ୍ତ କରାଯାଉଛି ।
ବିଜୟ ଆନନ୍ଦ କହିଛନ୍ତି ଯେ ବର୍ତମାନ ସୁଦ୍ଧା ଅନାମିକାଙ୍କ ବାସ୍ତବ ପୋଷ୍ଟିଂ କେଉଁଠି ହୋଇଛି ତାହା ଏଯାଏ ଜଣାପଡ଼ିନାହିଁ। ଅନାମିକା ଶୁକ୍ଳାଙ୍କୁ ଫେବ୍ରୁଆରୀ ମାସ ପର୍ଯ୍ୟନ୍ତ ରାୟବରେଲିର ଏକ କେଜିବିଭିରେ କାର୍ଯ୍ୟ କରୁଥିବା ସୂଚନା ମିଳିଥିଲା । ଯେତେବେଳେ ଏହି ଘଟଣା ସମ୍ପର୍କରେ ସୂଚନା ମିଳିଲା ସେତେବେଳେ ରାୟବରେଲି ଶିକ୍ଷା ଅଧିକାରୀ ଆନନ୍ଦ ପ୍ରକାଶଙ୍କୁ ତଦନ୍ତ ଦାୟିତ୍ବ ଦିଆଗଲା । ମାତ୍ର ଏହାପରେ ଅନାମିକାଙ୍କ ପତ୍ତା ମିଳୁନାହିଁ ।
Comments are closed.