ଦିଲ୍ଲୀ ହିଂସା: ଆଉ ଜଣେ ଅଭିଯୁକ୍ତ ଇକବାଲ ସିଂହ ଗିରଫ

ଚଣ୍ଡୀଗଡ଼: ଦିଲ୍ଲୀ ହିଂସାର ଅନ୍ୟତମ ଅଭିଯୁକ୍ତ ଇକବାଲ ସିଂଙ୍କୁ ପଞ୍ଜାବର ହୋସିୟାରପୁରରୁ ଗିରଫ କରାଯାଇଛି। ସ୍ପେଶାଲ ସେଲ୍‌ ଟିମ୍‌ ମଙ୍ଗଳବାର ବିଳମ୍ବିତ ରାତିରେ ତାଙ୍କୁ ଗିରଫ କରିଛି। ଗତ ୨୬ ତାରିଖରେ ଟ୍ରାକ୍ଟର ରାଲି ସମୟରେ ଦିଲ୍ଲୀର ଲାଲକିଲାରେ ଘଟିଥିବା ହିଂସାକାଣ୍ଡରେ ଇକବାଲଙ୍କ ସମ୍ପୃକ୍ତି ଥିବା ଜଣାପଡ଼ିଥିଲା। ତାଙ୍କ ନାମରେ ଦିଲ୍ଲୀ ପୁଲିସ ୫୦ ହଜାର ଟଙ୍କାର ପୁରସ୍କାର ରାଶି ଘୋଷଣା କରିଥିଲା।

ଏହା ପୂର୍ବରୁ ଦିଲ୍ଲୀ ହିଂସାର ମୁଖ୍ୟ ଅଭିଯୁକ୍ତ ଦୀପ ସିଦ୍ଧୁଙ୍କୁ ପୁଲିସ ଗିରଫ କରିଥିଲା। ଦୀପ ସିଦ୍ଧୁ, ଜୁଗରାଜ ସିଂହ, ଗୁରଜୋତ ସିଂହ ଏବଂ ଗୁରଜନ୍ତ ସିଂହଙ୍କ ଉପରେ ୧ ଲକ୍ଷ ଟଙ୍କାର ନଗଦ ପୁରସ୍କାର ରାଶି ଘୋଷଣା କରାଯାଇଥିଲାବେଳେ ଜାଜବୀର ସିଂହ, ବୁଟା ସିଂହ, ସୁଖଦେବ ସିଂହ ଏବଂ ଇକବାଲ୍‌ ସିଂହଙ୍କ ନାମରେ ୫୦ ହଜାର ଟଙ୍କାର ପୁରସ୍କାର ରାଶି ଘୋଷିତ ହୋଇଥିଲା।

ଲାଲକିଲାରେ ଘଟିଥିବା ହିଂସା ମାମଲାର ତଦନ୍ତ ସମୟରେ କ୍ରାଇମବ୍ରାଞ୍ଚର ଏସଆଇଟି କହିଥିଲା ଯେ, ଇକବାଲ୍‌ ସିଂହ ଏହି ହିଂସାର ବଡ଼ ଷଡ଼ଯନ୍ତ୍ରକାରୀ ଥିଲେ। ସେ ଲାଲ୍‌କିଲାରୁ ଲଗାତାର ଫେସବୁକ ଲାଇଭ୍‌ କରି ଲୋକଙ୍କୁ ଉସୁକାଉଥିଲେ। ପୁଲିସକୁ ହସ୍ତଗତ ହୋଇଥିବା ଭିଡିଓରୁ ଏହାର ପର୍ଦ୍ଦାଫାଶ ହୋଇଛି।

ଏସଆଇଟିର  ଜଣେ ଅଧିକାରୀ କହିଛନ୍ତି ଯେ, ଇକବାଲ୍‌ ସିଂହ ଲାଲକିଲା ଭିତରେ ଭିଡ଼ ଜମାଇଥିବା ଚାଷୀଙ୍କୁ ଉସୁକାଇ ଲାହୋର ଗେଟ୍‌ ଭାଙ୍ଗିବାକୁ ମଧ୍ୟ ଉଦ୍ୟମ କରିଥିଲେ। ପୁଲିସ ତଦନ୍ତ କରିବା ପରେ ଇକ୍‌ବାଲ ସିଂହ ନାମରେ ୫୦ ହଜାର ଟଙ୍କାର ପୁରସ୍କାର ରାଶି ଘୋଷଣା କରିଥିଲା। ବର୍ତ୍ତମାନ ସୁଦ୍ଧା ୮ ଅଭିଯୁକ୍ତଙ୍କ ଗିରଫଦାରି ଉପରେ ପୁରସ୍କାର ରାଶି ଘୋଷଣା ହୋଇସାରିଛି।

Comments
Loading...