ନାଳରେ ବୁଡି ଯୁବକ ମୃତ

ଦେବଗଡ : ଆଜି ମଧ୍ୟାହ୍ନରେ ବାରକୋଟ ଥାନା ଅନ୍ତର୍ଗତ ଗୁରୁସଙ୍ଗ ଗ୍ରାମରେ ନାଳରେ ଗାଧୋଉଥିବା ସମୟରେ ଦର୍ହ ମଧ୍ୟରେ ଗୋଡ ଖସିଯିବାରୁ ପାଣିରେ ବୁଡି ଜଣେ ଯୁବକଙ୍କର ମୃତ୍ୟୁ ଘଟିଛି। ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଗୁରୁସଙ୍ଗ ଗ୍ରାମର ଜୁଆଙ୍ଗ ପ୍ରଧାନଙ୍କ ପୁଅ ଦେବ ପ୍ରଧାନ(୨୫) ସବୁଦିନ ଭଳି ଆଜି ମଧ୍ୟାହ୍ନରେ ମଧ୍ୟ ଗାଁ ନିକଟସ୍ଥ ଯୌତୁକ ନାଳରେ ଗାଧୋଉଥିଲେ। ମାତ୍ର ନାଳମଧ୍ୟରେ ଥିବା ଏକ ଦର୍ହ(ଗଭୀର ଜଳ)ରେ ତାଙ୍କର ଗୋଡ ଖସିଯିବାରୁ ପାଣିରେ ବୁଡିଯାଇଥିଲେ। ଏହା ଦେଖି ନିକଟରେ ଗାଧୋଉଥିବା କେତେକ ଲୋକ ତାଙ୍କୁ ଉଦ୍ଧାର କରିବାକୁ ଉଦ୍ୟମ କରିଥିଲେ ମଧ୍ୟ ଏହା ସମ୍ଭବ ହୋଇନଥିଲା। ଫଳରେ ସେମାନେ ଅଗ୍ନିସମ ବିଭାଗକୁ ଏସମ୍ପର୍କରେ ସୂଚନା ଦେଇଥିଲେ। ସୂଚନା ପାଇ ବାରକୋଟ ଅଗ୍ନିଶମ କେନ୍ଦ୍ରର କର୍ମଚାରୀ ମାନେ ଘଟଣାସ୍ଥଳରେ ପହଂଚି ଗ୍ରାମବାସୀଙ୍କ ସହାୟତାରେ ଗଭୀର ଜଳ ମଧ୍ୟରୁ ଦେବଙ୍କର ମୃତଦେହ ଉଦ୍ଧାର କରିଥିଲେ। ସୂଚନା ପାଇ ବାରକୋଟ ଥାନା ପୁଲିସ ସେଠାରେ ପହଂଚି ମୃତଦେହ ଉଦ୍ଧାର କରିବା ସହ ବ୍ୟବଚ୍ଛେଦ ନିମନ୍ତେ ପାଳଲହଡା ଡାକ୍ତରଖାନାକୁ ପଠାଇଥିବା ଜଣାପଡିଛି। ଅନ୍ୟପକ୍ଷରେ ଏକ ଅପମୃତ୍ୟୁ ମାମଲା ରୁଜୁକରି ଘଟଣାର ତଦନ୍ତ ଆରମ୍ଭ କରିଛି।

Comments
Loading...