ସମ୍ବଲପୁର ପୁଲିସର ସ୍ୱତନ୍ତ୍ର ଅଭିଯାନ : ୩୬ ବର୍ଷ ପୁରୁଣା ୱାରେଣ୍ଟି ଗିରଫ

ସମ୍ବଲପୁର : ସମ୍ବଲପୁର ପୁଲିସ ଅପରାଧ ନିୟନ୍ତ୍ରଣ ପାଇଁ ସମୟ ସମୟରେ ବିଭିନ୍ନ ପ୍ରକାରର କୌଶଳ ଆପଣାଉଥିବା ବେଳେ ଏବେ ଏକ ସ୍ୱତନ୍ତ୍ର ଅଭିଯାନ କରାଯାଇ ବିଭିନ୍ନ ଥାନା ଗୁଡିକରେ ଗଡି ଚାଲୁଥିବା ପୁରୁଣା ୱାରେଣ୍ଟ ଗୁଡିକୁ କାର୍ଯ୍ୟକାରୀ କରିଛି। ଏହି କ୍ରମରେ ସମ୍ବଲପୁର ପୁଲିସ ଭୁବନେଶ୍ୱର କମିଶନରେଟ ପୁଲିସ ଠାରେ ଆଗକୁ ଯାଇ ୧୯୮୫ ମସିହାର ପୁରୁଣା ୱାରେଣ୍ଟି ମାନଙ୍କୁ ଧରିବାରେ ସଫଳ ହୋଇଛି। ଏ ସର୍ମ୍ପକରେ ସମ୍ବଲପୁର ଏସପି ବାଟ୍ଟୁଲା ଗଙ୍ଗାଧର ସୁଚନା ଦେଇ କହିଛନ୍ତି ଯେ ଗତ ୭ ତାରିଖରୁ ଏହି ସ୍ୱତନ୍ତ୍ର ଅଭିଯାନ ଜିଲାରେ ଆରମ୍ଭ କରାଯାଇଛି। ଏହି କ୍ରମରେ ଗତ ୭ ତାରିଖରେ ଅଭିଯାନ ଆରମ୍ଭ ସମୟରେ ୪୭୯ଟି ୱାରେଣ୍ଟ ଗଡି ଚାଲୁଥିବା ବେଳେ ୧୨ ତାରିଖ ପର୍ଯ୍ୟନ୍ତ ୫୮ ଜଣ ଫେରାର ଥିବା ଅଭ୍ୟାସଗତ ଅପରାଧି ମାନଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ଏହା ସହିତ ଫେରାର ଥିବା ଅନ୍ୟ ୨୩ ଜଣ ଅପରାଧି ମାନେ ପୁଲିସର କଡା କାର୍ଯ୍ୟାନୁଷ୍ଠାନ ଭୟରେ କୋର୍ଟ ସମ୍ମୁଖରେ ଆତ୍ମସର୍ମପଣ କରିଛନ୍ତି। ତେବେ ୭ଟି ନୂତନ ୱାରେଣ୍ଟ କୋର୍ଟରୁ ମିଳିଥିବାରୁ ଜିଲାରେ ପୁରୁଣା ୱାରେଣ୍ଟ ଗୁଡିକୁ କାର୍ଯ୍ୟକାରୀ କରିବା ସଂଖ୍ୟା ୪୦୫ରେ ପହଞ୍ଚିଛି। ଅପରାଧିଙ୍କ ବିରୋଧରେ ସମ୍ବଲପୁର ପୁଲିସର ଏହି ପଦକ୍ଷେପକୁ ସ୍ୱାଗତ କରାଯାଉଥିବା ବେଳେ ଚେନ ଲୁଟେରା, ଗୋଷ୍ଠୀ ସଂଘର୍ଷ ଆଦି ଅପରାଧିକ ଘଟଣା ଗୁଡିକ ଉପରେ ମଧ୍ୟ ଆହୁରୀ ପ୍ରଭାବୀ ଢ଼ଙ୍ଗରେ କାର୍ଯ୍ୟ କରିବାକୁ ସବୁ ମହଲରୁ ଦାବି ହେଉଛି।