ନୂଆଦିଲ୍ଲୀ: ବୃଦ୍ଧି ପାଇଲା ବିମାନ ଟରବାଇନ ଇନ୍ଧନ (ଏଟିଏଫ) ମୂଲ୍ୟ। ବିଗତ ଦୁଇ ମାସ ମଧ୍ୟରେ ଏଟିଏଫ ମୂଲ୍ୟରେ ଏହା ହେଉଛି କ୍ରମାଗତ ଭାବେ ପଞ୍ଚମ ବୃଦ୍ଧି। ଚଳିତଥର ଏଟିଏଫ ମୂଲ୍ୟରେ ୩% ବୃଦ୍ଧି ଘଟିଛି। ତେବେ ଏଥିରେ ବଦଳିନାହିଁ ଏଲପିଜି ଏବଂ ପେଟ୍ରୋଲ, ଡିଜେଲ ଦର।
ଏଟିଏଫ ମୂଲ୍ୟରେ କିଲୋଲିଟର ପିଛା ୧୩୦୪ ଟଙ୍କା ବୃଦ୍ଧି ଘଟି ୪୩,୯୩୨.୫୩ ଟଙ୍କାରେ ପହଞ୍ଚିଛି। ଶେଷଥର ପାଇଁ ଜୁଲାଇ ୧୬ରେ ଏଟିଏଫ ମୂଲ୍ୟରେ ପ୍ରତି କିଲୋଲିଟରରେ ୬୩୫ ଟଙ୍କା ୪୭ ପଇସା ବୃଦ୍ଧି ଘଟିଥିଲା। ଚଳିତ ବର୍ଷ ଜୁନ ପରଠାରୁ ଏଟିଏଫ ମୂଲ୍ୟରେ ଏହା ହେଉଛି ସିଧାସଳଖ ଭାବେ ଚତୁର୍ଥ ବୃଦ୍ଧି। ଏହି ଚାରି ଥରରେ ବିମାନ ଇନ୍ଧନ ମୂଲ୍ୟରେ ମୋଟ ୨୨,୪୮୩ ଟଙ୍କା ୯୧ ପଇସା ବୃଦ୍ଧି ଘଟିଛି। ଏସବୁ ମଧ୍ୟରେ ଦୈନିକ ଭିତ୍ତିରେ ସଂଶୋଧନ କରାଯାଉଥିବା ପେଟ୍ରୋଲ ଓ ଡିଜେଲ ମୂଲ୍ୟକୁ ଅପରିବର୍ତ୍ତିତ ରଖାଯାଇଛି। ଏହାଫଳରେ ବିଗତ ଏକ ମାସରୁ ଅଧିକ ସମୟ ହେବ ପେଟ୍ରୋଲ ମୂଲ୍ୟରେ କୌଣସି ପ୍ରକାର ପରିବର୍ତ୍ତନ କରାଯାଇନାହିଁ। ରାଜଧାନୀ ଦିଲ୍ଲୀ ରେ ପେଟ୍ରୋଲ ଲିଟର ବର୍ତ୍ତମାନ ୮୦ ଟଙ୍କା ୪୩ ପଇସା ରଖାଯାଇଛି। ଏହିଦର ଜୁନ ୨୯ ଠାରୁ ସ୍ଥିର ରଖାଯାଇଛି। ଏହାଛଡା ଡିଜେଲ ଦର ଏବେ ଲିଟର ପିଛା ୭୩ ଟଙ୍କା ୫୬ ପଇସା ରେ ବିକ୍ରି କରାଯାଉଛି। ଜୁନ ୭ରୁ ୨୯ ମଧ୍ୟରେ ପେଟ୍ରୋଲ ମୂଲ୍ୟରେ ଲିଟର ପିଛା ୯ ଟଙ୍କା ୧୭ ପଇସା ବଢିଥିବାବେଳେ କେବଳ ଜୁନ ୭ ଠାରୁ ଡିଜେଲ ମୂଲ୍ୟରେ ୧୨ ଟଙ୍କା ୫୫ ପଇସା ବୃଦ୍ଧି ଘଟିଛି। ସେହିଭଳି ଶେଷଥର ପାଇଁ ଜୁଲାଇ ପହିଲାରେ ଅଣ-ରିଆତି ଏଲପିଜି ସିଲିଣ୍ଡର ମୂଲ୍ୟରେ ୧ ଟଙ୍କା ବୃଦ୍ଧି ଘଟି ୫୯୪ ଟଙ୍କାରେ ପହଞ୍ଚିଛି।
Comments are closed.