ଭୁବନେଶ୍ୱର : ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ହୁ ହୁ ବଢିବାରେ ଲାଗିଛି। କରୋନା ସଂକ୍ରମିତଙ୍କ ସଂଖ୍ୟା ବଢିବା ସହ ରାଜ୍ୟରେ ମୃତ୍ୟୁ ସଂଖ୍ୟା ମଧ୍ୟ ବଢୁଛି। ଯାହା ରାଜ୍ୟ ସରକାରଙ୍କ ପାଇଁ ଏକ ଚିନ୍ତାର କାରଣ ପାଲଟିଛି। କରୋନାକୁ ନିୟନ୍ତ୍ରଣ କରିବା ପାଇଁ ପ୍ରତି ପଞ୍ଚାୟତରେ କୋଭିଡ଼ କେୟାର ହୋମ ତିଆରି କରାଯାଉଛି। ଗ୍ରାମାଞ୍ଚଳରେ କ୍ବାରେଣ୍ଟାଇନ ସ୍ବାସ୍ଥ୍ୟସେବାକୁ ସଶକ୍ତ କରିବା ଉଦ୍ଦେଶ୍ୟରେ ୬୭୯୮ ଗ୍ରାମପଞ୍ଚାୟତରେ ୬,୦୮୧ଟି କୋଭିଡ଼ କେୟାର ହୋମ ସ୍ଥାପିତ ହୋଇଛି। ଏଥିରେ ମୋଟ ୬୦,୯୭୪ ଶଯ୍ୟାର ବ୍ୟବସ୍ଥା ହୋଇଛି।
ତେବେ ବର୍ତ୍ତମାନ ପ୍ରତି ପଞ୍ଚାୟତରେ ହୋଇଥିବା କୋଭିଡ଼ କେୟାର ହୋମ ପାଇଁ ନିଯୁକ୍ତି ପ୍ରକାଶ ପାଇଛି । ପ୍ରତି ହୋମ ପାଇଁ ଜଣେ ଜଣେ ଏଏନ୍ଏମ୍ଙ୍କୁ ଅସ୍ଥାୟୀ ଭାବେ ନିଯୁକ୍ତି ଦିଆଯିବ । ଏଥିସହ ୬ ହଜାର ୭୯୮ଟି ପଞ୍ଚାୟତ ପାଇଁ ପ୍ରାୟ ୭୦୦୦ ଏଏନ୍ଏମ୍ଙ୍କୁ ନିଯୁକ୍ତି ଦେବା ପାଇଁ ସ୍ୱାସ୍ଥ୍ୟ ବିଭାଗ ତରଫରୁ ବିଜ୍ଞପ୍ତି ପ୍ରକାଶ ପାଇଛି । ପ୍ରତି ପଞ୍ଚାୟତର କୋଭିଡ କେୟାର ଦାୟିତ୍ୱରେ ଜଣେ ଲେଖାଏଁ ଏଏନ୍ଏମ୍ ରହିବେ। ଯଦି ଆବଶ୍ୟକ ସ୍ଥଳେ ତାଲିମପ୍ରାପ୍ତ ଏଏନ୍ଏମ୍ ନ ମିଳିବେ, ତେବେ ଷ୍ଟାଫ୍ ନର୍ସ କିମ୍ବା ଫାର୍ମାସିଷ୍ଟଙ୍କୁ ଦିଆଯିବ ନିଯୁକ୍ତି।
ଏଥିସହ ଏଏନ୍ଏମ୍, ନର୍ସ ଓ ଫାର୍ମାସିଷ୍ଟଙ୍କ ନିଯୁକ୍ତି ସହ ଦରମା ମଧ୍ୟ ପ୍ରକାଶ ପାଇଛି । ଏଏନ୍ଏମ୍ଙ୍କୁ ଦୈନିକ ୮୫୦ ଟଙ୍କା ମିଳିବାକୁ ଥିବା ବେଳେ ନର୍ସ ଓ ଫାର୍ମାସିଷ୍ଟଙ୍କୁ ଦୈନିକ ୧ ହଜାର ଟଙ୍କା ମିଳିବ । ଏଏନଏମ , ନର୍ସ ଓ ଫାର୍ମାସିଷ୍ଟମାନଙ୍କୁ ୩ ମାସ ପାଇଁ ଅସ୍ଥାୟୀ ନିଯୁକ୍ତି ଦିଆଯିବ।