ପଞ୍ଜାବ ଏଫ୍‌ସି ସହ ଚୁକ୍ତି କଲେ ରଞ୍ଜନ, ସୁନୀଲ

କଟକ  : ଭୁବନେଶ୍ବର ସାଲିଆ ସାହି ବସ୍ତିର ଦୁଇ ଭାଇ ରଞ୍ଜନ ସୋରେନ୍ ଓ ସୁନୀଲ ସୋରେନ୍ ୧୮ ବର୍ଷରୁ କମ୍‌ ଆଇ-ଲିଗ୍‌ ପାଇଁ ପଞ୍ଜାବ ଏଫ୍‌ସି ସହିତ ଚୁକ୍ତିନାମା ସ୍ବାକ୍ଷରିତ କରିଛନ୍ତି। ଅନ୍ତର୍ଜାତୀୟ ଖେଳାଳି ରଞ୍ଜନ ଓ ସୁନୀଲଙ୍କୁ ଓଡ଼ିଶା ଏଫ୍‌ସି ଯୁବ ଦଳରେ ସାମିଲ ନେଇ ପ୍ରସ୍ତାବ ମିଳିଥିଲେ ମଧ୍ୟ ଉକ୍ତ ପ୍ରସ୍ତାବକୁ ଅଗ୍ରାହ୍ୟ କରି ପଞ୍ଜାବ ଏଫ୍‌ସି ସହିତ ଚୁକ୍ତି କରିଛନ୍ତି। ଦୁଇ ଭାଇ ୫ ବର୍ଷ ଲାଗି ଉକ୍ତ କ୍ଲବ ସହିତ ପ୍ରଫେସନାଲ ଚୁକ୍ତି କରିଛନ୍ତି।
ମିଡ୍‌ଫିଲଡର ପୋଜିସନରେ ଖେଳୁଥିବା ସୁନୀଲ ଦିଲ୍ଲୀସ୍ଥିତ ବାଇଚୁଙ୍ଗ ଭୁତିଆ ଆବାସିକ ଫୁଟବଲ ସ୍କୁଲରେ ୧୩ ଓ ୧୫ ବର୍ଷରୁ କମ୍‌ ଦଳରେ ଖେଳିଥିଲେ। ଗତବର୍ଷ ପଞ୍ଜାବ ଏଫ୍‌ସି ପକ୍ଷରୁ ୧୮ ବର୍ଷରୁ କମ୍‌ ଓ ଦ୍ବିତୀୟ ଡିଭିଜନ ଲିଗ୍‌ରେ ମଧ୍ୟ ଖେଳିଥିଲେ। ଉକ୍ତ ପ୍ରଦର୍ଶନକୁ ଆଧାର କରି ପଞ୍ଜାବ ଏଫ୍‌ସି ସୁନୀଲଙ୍କ ସହ ୫ ବର୍ଷ ଲାଗି ଚୁକ୍ତି କରିଛି। ସେହିପରି ଅନ୍ତର୍ଜାତୀୟ ଡିଫେଣ୍ଡର ରଞ୍ଜନ ୧୬ ବର୍ଷରୁ କମ୍‌ ଭାରତୀୟ ଦଳ ପକ୍ଷରୁ ସାଫ୍‌ ଚମ୍ପିଆନସିପ୍ ଓ ଏଏଫ୍‌ସି କପ୍ ଯୋଗ୍ୟତା ପର୍ଯ୍ୟାୟ ମ୍ୟାଚରେ ମଧ୍ୟ ପ୍ରତିନିଧିତ୍ବ କରିଛନ୍ତି। ଏବେ ୧୬ ବର୍ଷରୁ କମ୍‌ ଏଏଫ୍‌ସି କପ୍‌ ଦଳରେ ମଧ୍ୟ ରହିଛନ୍ତି। ରଞ୍ଜନଙ୍କ ସହ ମଧ୍ୟ ପଞ୍ଜାବ ଏଫ୍‌ସି ୫ ବର୍ଷ ଲାଗି ଚୁକ୍ତି କରିଛି। ରଞ୍ଜନ ଓ ସୁନୀଲଙ୍କ ପ୍ରଶିକ୍ଷକ ଜୟଦେବ ମହାପାତ୍ର କୁହନ୍ତି, ଓଡ଼ିଶା ଏଫ୍‌ସି ଯୁବ ଦଳ ଓ ପଞ୍ଜାବ ଏଫ୍‌ସି ପକ୍ଷରୁ ସୁନୀଲ ଓ ରଞ୍ଜନଙ୍କୁ ପ୍ରସ୍ତାବ ମିଳିଥିଲା। ଓଡ଼ିଶା ଏଫ୍‌ସି ଷ୍ଟାଇପେଣ୍ଡ ଓ ବୋନସ୍ ଠାରୁ ପଞ୍ଜାବ ଏଫ୍‌ସିର ଷ୍ଟାଇପେଣ୍ଡ ଓ ବୋନସ ବହୁତ ଭଲ ରହିଛି। ଏହାଛଡ଼ା ପଞ୍ଜାବ ଏଫ୍‌ସିର ଉନ୍ନତ ପ୍ରଶିକ୍ଷଣ ବ୍ୟବସ୍ଥା ରହିଥିବାରୁ ଉକ୍ତ କ୍ଳବ ସହ ଚୁକ୍ତି ସ୍ବାକ୍ଷରିତ କରିଛୁ। ୧୮ ବର୍ଷରୁ କମ୍‌ ବର୍ଗରେ ଦୁଇଭାଇ ପ୍ରଫେସନାଲ ଚୁକ୍ତିନାମା କରିବା ବହୁତ ବଡ ସୌଭାଗ୍ୟର କଥା ବୋଲି ପ୍ରଶିକ୍ଷକ ଶ୍ରୀ ମହାପାତ୍ର କହିଛନ୍ତି।

Comments are closed.