ଆସନ୍ତାକାଲି ଭାରତ-ନ୍ୟୁଜିଲାଣ୍ଡ ଦ୍ବିତୀୟ ଟ୍ବେଣ୍ଟି-୨୦ : ବିଜୟଧାରା ବଜାୟ ରଖିବାକୁ ପ୍ରୟାସ କରିବ ଟିମ ଇଣ୍ଡିଆ

ଅକଲାଣ୍ଡ : ଆସନ୍ତାକାଲି(ରବିବାର) ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ପାଞ୍ଚଟିକିଆ ଟ୍ବେଣ୍ଟି-୨୦ ସିରିଜର ଦ୍ବିତୀୟ ମ୍ୟାଚ ଖେଳାଯିବ। ଏହି ମ୍ୟାଚଟି ମଧ୍ୟ ନ୍ୟୁଜିଲାଣ୍ଡର ଇଡେନ ପାର୍କରେ ଖେଳାଯିବ। ଶୁକ୍ରବାର ଏଠାରେ ଖେଳାଯାଇଥିବା ପ୍ରଥମ ଟ୍ବେଣ୍ଟି-୨୦ ମ୍ୟାଚକୁ ହାତେଇବା ପରେ ଭାରତର ମନୋବଳ ଦୃଢ ରହିଛି। ଏହି ମ୍ୟାଚକୁ ହାତେଇ ବିରାଟ ବାହିନୀ ବିଜୟଧାରା ବଜାୟ ରଖିବାକୁ ପ୍ରୟାସ କରିବ। ଅନ୍ୟପକ୍ଷରେ ପ୍ରଥମ ମ୍ୟାଚକୁ ହାରିବା ପରେ ଘରୋଇ ଦଳ ଏହି ମ୍ୟାଚକୁ ଜିତି ୧-୧ରେ ବରାବର ସ୍ଥିତିରେ ରହିବାକୁ ପ୍ରୟାସ କରିବ।
ଉଲ୍ଲେଖ ଯୋଗ୍ୟ, ଶୁକ୍ରବାର ଖେଳାଯାଇଥିବା ପ୍ରଥମ ମ୍ୟାଚରେ ଭାରତ ନ୍ୟୁଜିଲାଣ୍ଡକୁ ୬ୱିକେଟରେ ପରାସ୍ତ କରିଥିଲା। ପ୍ରଥମେ ଟସ୍ ଜିତି ଟିମ୍ ଇଣ୍ଡିଆର ଅଧିନାୟକ ବିରାଟ କୋହଲି ଘରୋଇ ଦଳକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ। ଘରୋଇ ଦଳ ପ୍ରଥମେ ବ୍ୟାଟିଂ କରି ଭାରତ ପାଇଁ ରଖିଥିବା ୨୦୪ରନର ବିଜୟ ଲକ୍ଷ୍ୟକୁ ଟିମ୍ ଇଣ୍ଡିଆ ମାତ୍ର ୪ୱିକେଟ ହରାଇ ୬ଟି ବଲ ବାକି ଥାଇ ହାସଲ କରିନେଇଥିଲା। ଭାରତ ବିଜୟରେ ଶ୍ରେୟସ୍ ଆୟରଙ୍କ ନିର୍ଣ୍ଣାୟକ ଭୂମିକା ରହିଛି। ସେ ମାତ୍ର ୨୭ ବଲରୁ ଅପରାଜିତ ୫୪ (୫ ଚୌକା, ୩ ଛକା) ରନର ବିସ୍ଫୋରକ ଇନିଂସ୍ ଖେଳିଛନ୍ତି। ସେହିଭଳି ଓପନର କେଏଲ ରାହୁଲ ୫୬ (୨୭ ବଲ୍‌, ୪ ଚୌକା, ୩ ଛକା) ଏବଂ ଅଧିନାୟକ ବିରାଟ କୋହଲି ୪୫ ରନ କରିଥିଲେ।

Comments
Loading...