ନିର୍ଭୟା ମାମଲା: ୨ ଦୋଷୀଙ୍କ କ୍ୟୁରେଟିଭ୍‍ ପିଟିଶନ ଖାରଜ, ଫାଶୀ ଥୟ

ନୂଆଦିଲ୍ଲୀ: ନିର୍ଭୟା ଗଣବଳାତ୍କାର ଓ ହତ୍ୟା ମାମଲାର ଦୋଷୀ ବିନୟ ଶର୍ମା ଓ ମୁକେଶ ପକ୍ଷରୁ ଆବେଦନ କରାଯାଇଥିବା କ୍ୟୁରେଟିଭ୍‍ ପିଟିଶନ୍‍କୁ ସୁପ୍ରିମକୋର୍ଟ ଖାରଜ କରିଛନ୍ତି। ମଙ୍ଗଳବାର ଜଷ୍ଟିସ୍‍ ଏନ୍‍.ଭି. ରମଣା, ଜଷ୍ଟିସ୍‍ ଅରୁଣା ମିଶ୍ରା, ଜଷ୍ଟିସ୍‍ ରୋହିନ୍‍ଟନ୍‍ ଫଲି ନରୀମନ, ଜଷ୍ଟିସ୍‍ ଆର. ଭାନୁମତି ଓ ଜଷ୍ଟିସ୍‍ ଅଶୋକ ଭୂଷଣଙ୍କ ପାଞ୍ଚ ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରି ଦୋଷୀଙ୍କ କ୍ୟୁରେଟିଭ୍‍ ପିଟିଶନ୍‍କୁ ଖାରଜ କରିଛନ୍ତି। ଭାରତୀୟ ଆଇନ ପ୍ରକ୍ରିୟାରେ କ୍ୟୁରେଟିଭ ଦଲିଲ ଜଣେ ଅଭିଯୁକ୍ତ ପାଇଁ ଶେଷ ଆଶ୍ରା। ଏବେ ଦୋଷୀଙ୍କ ପାଇଁ ଫାଶୀର ରାସ୍ତା ପରିଷ୍କାର ହୋଇଛି। ଆସନ୍ତା ୨୨ ତାରିଖ ସକାଳ ୭ଟାରେ ନିର୍ଭୟା ମାମଲାର ୪ ଦୋଷୀଙ୍କୁ ଫାଶୀ ଦେବାକୁ ଧାର୍ଯ୍ୟ କରାଯାଇଛି। ପୂର୍ବରୁ ସମସ୍ତ ୪ ଦୋଷୀଙ୍କ ରିଭ୍ୟୁ ପିଟିଶନକୁ ସୁପ୍ରିମକୋର୍ଟ ଖାରଜ କରିଦେଇଥିଲେ।

ସୂଚନାଯୋଗ୍ୟ, ୨୦୧୨ ଡିସେମ୍ବର ୧୬ ତାରିଖ ରାତିରେ ଲୋମହର୍ଷଣକାରୀ ନିର୍ଭୟା ଗଣବଳାତ୍କାର ଘଟଣା ଘଟିଥିଲା। ଜଣେ ନାବାଳକ ସମେତ ୬ ଜଣ ଯୁବକ ଚଳନ୍ତା ବସରେ ନିର୍ଭୟାଙ୍କୁ ଗଣ ବଳାତ୍କାର କରିବା ପରେ ତଳକୁ ଫୋପାଡ଼ି ଦେଇଥିଲେ। ଡିସେମ୍ବର ୨୯ରେ ସିଙ୍ଗାପୁରରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ପୁଲିସ୍ ଏହି ଘଟଣାରେ ୬ ଜଣଙ୍କୁ ଗିରଫ କରିଥିଲା। ସେମାନଙ୍କ ମଧ୍ୟରୁ ରାମ ସିଂହ ନାମକ ଜଣେ ଯୁବକ ଜେଲରେ ଆତ୍ମହତ୍ୟା କରିଥିଲା। ଅନ୍ୟତମ ଅଭିଯୁକ୍ତ ନାବାଳକ ଥିବାରୁ ତାକୁ ସୁଧାର ଗୃହରେ ରଖାଯାଇଥିଲା ଓ ତିନି ବର୍ଷ ପରେ ମୁକ୍ତ କରାଯାଇଥିଲା। ଏବେ ୪ ଜଣ ଯୁବକ ପବନ ଗୁପ୍ତା, ବିନିୟ ଶର୍ମା, ଅକ୍ଷୟ ସିଂହ ଠାକୁର ଓ ମୁକେଶ ସିଂହ ଫାଶୀ ଦଣ୍ଡ ପାଇବାକୁ ଅଛନ୍ତି। ଏମାନେ ସମସ୍ତେ ତିହାର ଜେଲରେ ବନ୍ଦୀ ଭାବେ ରହିଛନ୍ତି।

Comments
Loading...