ନୀଳଗିରି : ଜଣେ ଗରିବ ବାପା ପାଇଁ ଦୁଃଖ ଆଣି ଦେଇଛି ଲଘୁଚାପ ବର୍ଷା। ଆମ୍ବ, ପଣସ, ମିଠା, ପିଠା ଧରି ଝିଅଘରକୁ ରାଧାଷ୍ଟମୀ ସଜ ନେଇ ଯାଉଥିବାବେଳେ ବାପାଙ୍କ ସାଇକଲ ବର୍ଷା ପାଣିରେ ଭାସିଯିବା ଘଟଣା ସାଧାରଣରେ ଉଦବେଗ ପ୍ରକାଶ ପାଇଛି। ଏଭଳି ଏକ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲାର ନୀଳଗିରି ଅଞ୍ଚଳରେ।
ଗରଡ଼ିହି ପଞ୍ଚାୟତ ଅନ୍ତର୍ଗତ ବାଙ୍କିସାହି ନିକଟ ଚନ୍ଦିନିପୁର ଗାଁର କରୁଣାକର ବେହେରା ବୁଧବାର ସକାଳୁ ସକାଳୁ ସୋର ଅଞ୍ଚଳରେ ବାହା କରିଥିବା ଝିଅ ଘରକୁ ବାହାରି ପଡ଼ିଥିଲେ। ଝିଅ ପାଇଁ ମିଠା, ପିଠା, ଆମ୍ବ, ପଣସ, ଶାଢ଼ୀ ପ୍ରଭୃତି ରାଧାଷ୍ଟମୀ ସଜ ଧରି ଏକ ସାଇକଲରେ ବରହମପୁରକୁ ଯାଉଥିଲେ। ସେଠାରୁ ବସ୍ ଯୋଗେ ଝିଅଘରକୁ ଯିବା ପାଇଁ ମସୁଧା କରିଥିଲେ। କିନ୍ତୁ ଚନ୍ଦିନିପୁର ଗାଁ ପାର ହେବା ପରେ ବରହମପୁରକୁ ଯାଇଥିବା ସଡ଼କଟି ଲଗାଣ ବର୍ଷା ପାଣିରେ ବୁଡ଼ି ଯାଇଥିଲା। ସେପଟେ ବସରେ ଯିବା ବିଳମ୍ବ ହୋଇଯିବା ଦେଖି ସମ୍ପୃକ୍ତ ବ୍ୟକ୍ତି ସାଇକଲରୁ ଓହ୍ଲାଇ ପାଣିଭର୍ତ୍ତି ରାସ୍ତା ଉପରେ ଚାଲି ଚାଲି ଯାଉଥିବା ସମୟରେ ଗୋଡ଼ ଖସି ଯିବାରୁ ସାଇକଲଟି ବିଲ ଭିତରକୁ ଖସି ଯାଇଥିଲା। ଏଥିରେ ବ୍ୟକ୍ତି ଜଣକ ଘଟଣାସ୍ଥଳରେ କାନ୍ଦି ପକାଇଥିଲେ। ଦୁଇହଜାର ଟଙ୍କାର ସାମଗ୍ରୀ ସହ ସାଇକଲଟି ପାଣିରେ ଭାସି ଯାଇଥିବା ଜଣାଯାଇଛି। ଲକଡାଉନ ଓ ସଟ୍ଡାଉନ ସମୟରେ ୨ହଜାର ଟଙ୍କାର ଏକାଠି କରି ଝିଅଘରକୁ ରାଧାଷ୍ଟମୀ ସାମଗ୍ରୀ ପହଞ୍ଚାଇବା ତାଙ୍କ ପାଇଁ ବଡ଼କଥା ଥିଲା। ତେବେ ଖବର ଲେଖା ହେବା ବେଳକୁ ସାଇକଲ ଓ ସାମଗ୍ରୀ ମିଳିପାରିନଥିବା ସୂଚନା ମିଳିଛି। ଉକ୍ତ ରାସ୍ତା ଉପରେ ୩ଫୁଟ୍ରୁ ଊର୍ଦ୍ଧ୍ବ ପାଣି ପ୍ରବାହିତ ହେଉଥିବାବେଳେ ଏଭଳି ଅଘଟଣ ଉକ୍ତ ରାସ୍ତା ପାଇଁ ପ୍ରଥମଥର ବୋଲି ଅଞ୍ଚଳରେ ଚର୍ଚ୍ଚା ହେଉଛି।
Comments are closed.