ନୂଆଦିଲ୍ଲୀ: କରୋନା ଏବେ ବୈଶ୍ବିକ ମହାମାରୀ ପାଲଟିଛି । ଚୀନରୁ ବାହାରିଥିବା ଏହି ଭୂତାଣୁ ୟୁରୋପୀୟ ଦେଶ ଓ ଆମେରିକା ସମେତ ବିଶ୍ବର ବଡ଼ବଡ଼ ମହାଶକ୍ତିକୁ ଅଥର୍ବ କରି ଦେଇଛି । ବିଶ୍ବ ଅର୍ଥନୀତି ଅତ୍ୟନ୍ତ ଗମ୍ଭୀର ସ୍ଥିତି ଦେଇ ଗତି କରୁଛି । ଫ୍ରାନ୍ସ, ସ୍ପେନ, ଇଟାଲୀ, ଜର୍ମାନୀ, ଆମେରିକା, ଇଂଲଣ୍ଡ ପରି ଶକ୍ତିଶାଳୀ ଦେଶର ସ୍ଥିତି ଅତ୍ୟନ୍ତ ଖରାପ ହୋଇ ପଡ଼ିଛି । ଏହି ସ୍ଥିତିରେ ନ୍ୟୁଜିଲାଣ୍ଡ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି । ମାତ୍ର ୨ ମାସ ମଧ୍ୟରେ ଏହି ଦେଶ କରୋନା ଉପରେ ବିଜୟ ଲାଭ କରିଥିବା ଦାବି କରିଛି ।
ସାରା ବିଶ୍ବରେ କରୋନା ସଂକ୍ରମିତ ରୋଗୀଙ୍କ ସଂଖ୍ୟା ୩୧ ଲକ୍ଷ ଅତିକ୍ରମ କରିଛି । ମୃତକଙ୍କ ସଂଖ୍ୟା ୨ଲକ୍ଲଷ ୨୦ ହଜାର ପାଖାପାଖି ପହଞ୍ଚିଛି । ପ୍ରତିଦିନ ସଂକ୍ରମିତ ଓ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି । ବିଶେଷକରି ଆମେରିକା ଓ ଲାଟିନ୍ ଆମେରିକୀୟ ଦେଶଗୁଡ଼ିକ ଏବେ କରୋନା ମାଡ଼ରେ ପ୍ରଚଣ୍ଡ ଭାବରେ ଘାଇଲା । କିଛି ଦେଶ କିଛି ପରିମାଣରେ କରୋନା ସଂକ୍ରମଣକୁ ନିୟନ୍ତ୍ରଣକୁ ଆଣିବାକୁ ସକ୍ଷମ ହୋଇଛନ୍ତି । ଏପରି ସ୍ଥିତିରେ ନ୍ୟୁଜିଲାଣ୍ଡ କରୋନା ଯୁଦ୍ଧରେ ବିଜୟୀ ହୋଇଥିବା ଆନ୍ତର୍ଜାତୀୟସ୍ତରରେ ଚର୍ଚା ଚାଲିଛି । ସାରା ଦେଶରେ ଏ ପର୍ଯ୍ୟନ୍ତ ୧୪୭୪ ସଂକ୍ରମଣ ହୋଇଥିବା ସ୍ପଷ୍ଟ ହୋଇଛି ଓ ୧୯ ଜଣଙ୍କ ମୃତ୍ୟୁ ଘଟିଛି । ଗତ ୨୪ ଘଣ୍ଟା ମଧ୍ୟରେ ସାରା ଦେଶରେ ଗୋଟିଏ ବି ସଂକ୍ରମଣ ମାମଲା ପଞ୍ଜିକୃତ ହୋଇନାହିଁ । ଦେଶର ସ୍ବାସ୍ଥ୍ୟ ବିଭାଗ କରୋନା ଯୁଦ୍ଧରେ ବିଜୟୀ ହେବାକୁ ଯାଉଛି ବୋଲି ମନେ କରୁଛି । ଯେଉଁଥିପାଇଁ ଦେଶରେ ବିଭିନ୍ନ ନିର୍ମାଣ କାର୍ଯ୍ୟ ନିମନ୍ତେ ଅନୁମତି ଦିଆଯାଇଛି । ସମୁଦ୍ର ଉପକୂଳକୁ ସର୍ଫିଂ ଲାଗି ଖୋଲି ଦିଆଯାଇଛି । ଅବଶ୍ୟ ପିଲାମାନଙ୍କୁ ସ୍କୁଲ ଆସିବାକୁ ବାରଣ କରାଯାଇଛି ଓ ଲୋକମାନଙ୍କୁ ଘରେ ଥାଇ କାର୍ଯ୍ୟ କରିବାକୁ ପରାମର୍ଶ ଦିଆଯାଇଛି ।
ଯେଉଁ ଦେଶଗୁଡ଼ିକ କରୋନା ସଂକ୍ରମଣ ରୋକିବାକୁ ତୁରନ୍ତ ଓ କଠୋର ପଦକ୍ଷେପ ଗ୍ରହଣ କରିଛନ୍ତି ସେଠାରେ ଏହାର ପ୍ରଭାବ କମ୍ ଦେଖିବାକୁ ମିଳିଛି । ଦକ୍ଷିଣ କୋରିଆ, ମାଲେସିଆ, ନ୍ୟୁଜିଲାଣ୍ଡ ପରି ଦେଶଗୁଡ଼ିକୁ ଏଥିପାଇଁ ଉଦାହରଣ ରୂପେ ନିଆଯାଇ ପାରିବ । ସେହିପରି ଯେଉଁ ଦେଶ ଏ କ୍ଷେତ୍ରରେ ଯେତେ ବିଳମ୍ବ କରିଛନ୍ତି, ସେହି ଦେଶକୁ ସେତେ ମୂଲ୍ୟ ଦେବାକୁ ପଡ଼ିଛି । ୟୁରୋପୀୟ ଦେଶ, ଆମେରିକା ଓ ବ୍ରାଜିଲ ଏହାର ଜ୍ବଳନ୍ତ ଉଦାହରଣ । ବ୍ରାଜିଲରେ ଗତ ୨୪ ଘଣ୍ଟା ମଧ୍ୟରେ ୪୬୧୩ ନୂତନ ସଂକ୍ରମିତ ଠାବ ହୋଇଛନ୍ତି ଓ ସଂକ୍ରମିତଙ୍କ ମୋଟ ସଂଖ୍ୟା ୭୦ ହଜାର ପାଖାପାଖି ପହଞ୍ଚିଛି । ଏପରିକି ମୃତକଙ୍କ ସଂଖ୍ୟା ମଧ୍ୟ ବ୍ରାଜିଲରେ ଗୋଟିଏ ଦିନରେ ୩୩୮ ବୃଦ୍ଧି ପାଇ ୪୬୭୪ ହୋଇଛି । ବ୍ରାଜିଲ ରାଷ୍ଟ୍ରପତି କରୋନାକୁ ଏକ ସାଧାରଣ ଫ୍ଲୁ ମନେକରି ଯେଉଁ ଭୁଲ କରିଥିଲେ ସେଥିପାଇଁ ତାଙ୍କ ଦେଶକୁ ବିପୁଳ ମୂଲ୍ୟ ଦେବାକୁ ପଡ଼ିଛି । ୟୁରୋପୀୟ ଦେଶ ମଧ୍ୟରେ ସ୍ପେନ୍ ସର୍ବାଧିକ ପ୍ରଭାବିତ ହୋଇଛି । ଏଠାରେ ୩୧ ଜାନୁଆରୀରେ ପ୍ରଥମ ସଂକ୍ରମଣ ଘଟଣା ପଦାକୁ ଆସିଥିଲା, ମାତ୍ର ଦେଶରେ ଲକ୍ଡ଼ାଉନ ନିଷ୍ପତ୍ତି ମାର୍ଚ ୧୪ ତାରିଖରେ ନିଆଗଲା । ୨୯ ମାର୍ଚରେ କୌଣସି ଅଣ ଜରୁରୀ ସାମଗ୍ରୀ ନିମନ୍ତେ ଘରୁ ବାହାରିବା ଉପରେ ନିଷେଧାଦେଶ ଜାରି କରାଗଲା । ସେମିତି ଜର୍ମାନରେ ୨୭ ଜାନୁଆରୀକୁ ପ୍ରଥମ ଘଟଣା ପଦାକୁ ଆସିଥିଲା ଓ ସରକାର ୨୨ ମାର୍ଚରେ ଦେଶରେ ଲକ୍ଡ଼ାଉନ ନିଷ୍ପତ୍ତି ନେଲେ । ଯାହାର ପରିଣତି ସମସ୍ତଙ୍କ ଆଗରେ । ସ୍ପେନ, ଜର୍ମାନ, ବ୍ରାଜିଲର ସ୍ଥିତି ଏବେ ଅତ୍ୟନ୍ତ ଗମ୍ଭୀର ।
ଅନ୍ୟପକ୍ଷରେ ନ୍ୟୁଜିଲାଣ୍ଡ ଏ କ୍ଷେତ୍ରରେ ଅଧିକ ସତର୍କତା ଅବଲମ୍ବନ କରିଛି । ନ୍ୟୁଜିଲାଣ୍ଡରେ ପ୍ରଥମ ସଂକ୍ରମର ଘଟଣା ୨୮ ଫେବ୍ରୁଆରୀରେ ଆସିବା ପରେ ସରକାର ତୁରନ୍ତ ଏ ସଂକ୍ରାନ୍ତରେ ନିଷ୍ପତ୍ତି ନେଲେ ଏବଂ ଯାହା ଫଳରେ ୨୯ ଏପ୍ରିଲ ସୁଦ୍ଧା ଦେଶରେ ସଂକ୍ରମଣ ସ୍ଥିତି ନିୟନ୍ତ୍ରଣରେ ରହିଛି । ଗତ ୨୪ ଘଣ୍ଟା ମଧ୍ୟରେ ଦେଶରେ ଜଣେ ନୂଆ ସଂକ୍ରମଣ ସୂଚନା ମିଳିନାହିଁ ।
Comments are closed.