୨୬ରେ କୃଷକଙ୍କ ସମାନ୍ତରାଳ ଶୋଭାଯାତ୍ରା, ସାମିଲ ହେବ ୨ଲକ୍ଷ ଟ୍ରାକ୍ଟର

ନୂଆଦିଲ୍ଲୀ: ଆସନ୍ତା ସାଧାରଣତନ୍ତ୍ର ଦିବସରେ ପ୍ରସ୍ତାବିତ କୃଷକଙ୍କ ଟ୍ରାକ୍ଟର ତଥା ତ୍ରିରଙ୍ଗା ଶୋଭାଯାତ୍ରା ପାଇଁ ପ୍ରସ୍ତୁତି ଜୋର୍‌ ଧରିଛି। ସୂଚନାନୁଯାୟୀ, ସରକାରଙ୍କ ପରେଡ୍‌ ସହିତ ସମାନ୍ତରାଳ ଭାବେ ଏହି ଶୋଭାଯାତ୍ରା କରାଯିବ। ଏଥିରେ ଅନ୍ୟୁନ ୨ଲକ୍ଷ ଟ୍ରାକ୍ଟର ଅଂଶଗ୍ରହଣ କରିବେ। ସରକାରଙ୍କ ପିଲେଟ ବନ୍ଧୁକ, ଲୁହବୁହା ବାଷ୍ପ ଓ ପାଣି ମାଡ଼ରୁ ସୁରକ୍ଷା ପାଇବା ପାଇଁ ଏହି ସବୁ ଟ୍ରାକ୍ଟରରେ ଆବଶ୍ୟକ ବ୍ୟବସ୍ଥା କରାଯାଉଛି। ଏଥିରେ ଯେଉଁମାନେ ଅଂଶଗ୍ରହଣ କରିବେ ସେମାନଙ୍କ ନାମ ଓ ଟ୍ରାକ୍ଟରକୁ ତାଲିକାଭୁକ୍ତ କରାଯାଉଛି। ଏଥିପାଇଁ ପଞ୍ଜାବ ଓ ହରିୟାଣାରେ ପ୍ରସ୍ତୁତି ପର୍ବ ଜୋର୍‌ଦାର ଚାଲିଛି। କେନ୍ଦ୍ର ସରକାର ସେମାନଙ୍କୁ ଦମନ କରିବା ପାଇଁ ଯେ କୌଣସି କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା ଆଶଙ୍କା ଥିବାରୁ କୃଷକମାନେ ଏହାକୁ ସାମ୍ନା କରିବା ପାଇଁ ପ୍ରସ୍ତୁତ ବୋଲି ଆନ୍ଦୋଳନକାରୀ କୃଷକ ସଂଗଠନର ନେତାମାନେ କହିଛନ୍ତି। ଆବଶ୍ୟକ ହେଲେ ଜୀବନ ହାରିବାକୁ ସେମାନେ ପ୍ରସ୍ତୁତ ଥିବା କହିଛନ୍ତି। ଏହି ପରିପ୍ରେକ୍ଷୀରେ କୃଷକ ଆନ୍ଦୋଳନକୁ ସମର୍ଥନ କରୁଥିବା ପଞ୍ଜାବ ତଥା ହରିୟାଣାର ବିଧାୟକ ଓ ସାଂସଦଙ୍କୁ ଦଳ-ମତ ନିର୍ବିଶେଷରେ ପଦତ୍ୟାଗ କରିବାକୁ ସେମାନେ ଆହ୍ବାନ ଦେଇଛନ୍ତି।

Comments are closed.