ନିଶା ଦ୍ରବ୍ୟ ରଖିବା ମାମଲା; ନେସ୍‌ ୱାଡିଆଙ୍କୁ କାରାଦଣ୍ଡାଦେଶ

ନୂଆଦିଲ୍ଲୀ : ଶିଳ୍ପପତି ନେସ୍‌ ୱାଡିଆ ଜାପାନରେ ଛୁଟି କଟାଉଥିବାବେଳେ ପାଖରେ ନିଶା ଦ୍ରବ୍ୟ ରଖିଥିବା ନେଇ ହୋଇଥିବା ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି। ଏହି ମାମଲାରେ ସେ ଗତ ମାର୍ଚ୍ଚରେ ଉତ୍ତର ଜାପାନ ଦ୍ବୀପ ​ହୋକାଇଡୋର ନ୍ୟୁ ଚିଟୋସେ ବିମାନବନ୍ଦରରେ ଗିରଫ ହୋଇଥିଲେ। ସନ୍ଧାନୀ କୁକୁର ସାହାଯ୍ୟରେ ତାଙ୍କ ପ୍ୟାଣ୍ଟ ପକେଟରୁ ୨୫ଗ୍ରାମ ଚରସ (ଗଞ୍ଜେଇ) ଜବତ ହୋଇଥିଲା। ଏହାକୁ ସେ ବ୍ୟକ୍ତିଗତ ବ୍ୟବହାର ପାଇଁ ରଖିଥିବା ଯୁକ୍ତି ଦର୍ଶାଇଥିଲେ। କିଛି ଦିନ ତାଙ୍କୁ ସେଠାରେ ଅଟକ ରଖାଯିବା ପରେ ମାର୍ଚ୍ଚ ୨୦ରେ ମୁକ୍ତ କରାଯାଇଥିଲା। ସ୍ଥାନୀୟ ସାପୋରୋ ଜିଲା ଅଦାଲତ ଏବେ ତାଙ୍କୁ ଦୁଇ ବର୍ଷ କାରାଦଣ୍ଡାଦେଶ ଶୁଣାଇଛି। ଜାପାନରେ ନିଶା କାରବାର ଆଇନ ଅତ୍ୟନ୍ତ କଠୋର। ନେସ୍‌ ହେଉଛନ୍ତି ୨୮୩ବର୍ଷର ପୁରୁଣା ୱାଡିଆ ଶିଳ୍ପ ଗୋଷ୍ଠୀର ମାଲିକ ନୁସ୍‌ଲି ୱାଡିଆଙ୍କ ପୁଅ। ତାଙ୍କ ମାଲିକାନାରେ ବମ୍ବେ ଡାଇଙ୍ଗ୍‌ କପଡ଼ା, ବ୍ରିଟାନିଆ ବିସ୍କୁଟ, ଗୋ’ଏୟାର ବିମାନସେବା, ବର୍ମାନ୍‌ ଟ୍ରେଡିଂ ଭଳି କମ୍ପାନୀ ରହିଛି। ସେ ଆଇପିଏଲ ଟିମ୍‌ କିଙ୍ଗ୍‌ସ୍‌ ଏକାଦଶ-ପଞ୍ଜାବର ଯୁଗ୍ମ ମାଲିକ। ୱାଡିଆ ଶିଳ୍ପ ଗୋଷ୍ଠୀର ମୂଲ୍ୟ ପ୍ରାୟ ୧୩ଶହ କୋଟି ଡଲାର।

Comments
Loading...