ଜୀବନ ରକ୍ଷା ପାଇଁ ସମ୍ବଳର ଅଭାବ ରହିବ ନାହିଁ: ବିଧାୟକଙ୍କୁ ନବୀନଙ୍କ ଆଶ୍ଵାସନା

-ଦରମା ପାଇଁ ନୁହେଁ ଯୋଦ୍ଧାମାନେ ଲୋକଙ୍କ ଜୀବନ ରକ୍ଷା ପାଇଁ ମିଶନ ଭଳି ସେବା କରୁଛନ୍ତି
-ନିଜ ଅଞ୍ଚଳରେ କୋଭିଡ଼ ଯୋଦ୍ଧାଙ୍କ ଯତ୍ନ ନେବା, ପ୍ଲାଜମା ଦାନକୁ ଉତ୍ସାହିତ କରିବାକୁ ପରାମର୍ଶ
-ମିଳିମିଶି ମୁକାବିଲା ଉପରେ ଜୋର ଦେଲେ ବିରୋଧୀ ଦଳ ନେତା
-ଗୃହ କମିଟି ଗଠନ ଲାଗି ଦାବି ରଖିଲେ କଂଗ୍ରେସ ବିଧାୟକ ଦଳ ନେତା

ଭୁବନେଶ୍ୱର,୨୯ା୭(ନି.ପ୍ର): ଲୋକଙ୍କ ଜୀବନ ହେଉଛି ଆମର ପ୍ରାଥମିକତା। ଲୋକଙ୍କ ଜୀବନ ରକ୍ଷାରେ ସମ୍ବଳ କେବେ ବି ବାଧକ ହେବ ନାହିଁ। ଖୁବ୍‍ ଦୃଢ଼ତାର ସହିତ ଏହା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।
କୋଭିଡ଼ ୧୯ ସମ୍ପର୍କରେ ବିଧାୟକମାନଙ୍କ ଏକ ସଚେତନତା କର୍ମଶାଳାକୁ ଉଦଘାଟନ କରି ମୁଖ୍ୟମନ୍ତ୍ରୀ କହିଥିଲେ ଯେ ମହାମାରୀ ବିରୋଧରେ ଲଢ଼େଇରେ ସମ୍ବଳର ଅଭାବ ରହିବ ନାହିଁ। କୋଭିଡ଼ ଯୋଦ୍ଧାମାନେ ଦରମା ପାଇଁ ନୁହେଁ ଏହି ଲଢ଼େଇକୁ ଏକ ମିଶନ ଭାବେ ଗ୍ରହଣ କରି ଲୋକଙ୍କ ଜୀବନ ରକ୍ଷା ପାଇଁ ଦିନ ରାତି ସେବା ଯୋଗାଉଛନ୍ତି। ସେମାନଙ୍କ ତ୍ୟାଗ ଓ ନିଷ୍ଠା ସାରା ଓଡ଼ିଶା ପାଇଁ ପ୍ରେରଣା। ତ୍ୟାଗରେ ସେମାନଙ୍କ ଭିତରେ ଜଣେ ଜଣେ ଗୋପବନ୍ଧୁ ଦାସ, ମଧୁବାବୁ , ମା ରମା ଦେବୀ ଓ ପାର୍ବତି ଗିରି ଭଳି ମହାନ ଦେଶ ସେବକ ରହିଛନ୍ତି। ସେହି ଯୋଦ୍ଧାମାନଙ୍କ ତ୍ୟାଗକୁ ଓଡ଼ିଶା ଜାତି ସବୁଦିନ ପାଇଁ ମନେ ରଖିବ ଏବଂ ଏହା ଭବିଷ୍ୟତ ପିଢ଼ିକୁ ପ୍ରେରଣା ଦେବ। ଯୋଦ୍ଧାମାନଙ୍କୁ ଉତ୍ସାହିତ କରିବା , କଷ୍ଟସାଧ୍ୟ ଲଢ଼େଇରେ ସେମାନଙ୍କ ମନବଳକୁ ଉଚ୍ଚ ରଖିବା ପାଇଁ ସେମାନଙ୍କ ତ୍ୟାଗକୁ ଆମେ ସମସ୍ତେ ସମ୍ମାନ ଜଣାଇବା ପାଇଁ ମୁଖ୍ୟମନ୍ତ୍ରୀ ଓଡ଼ିଶାବାସୀଙ୍କୁ ନିବେଦନ କରିଥିଲେ। ଆଗ ଧାଡ଼ିରେ ରହି ଅଦୃଶ୍ୟ ଶତ୍ରୁ ବିରୋଧରେ ଯୁଦ୍ଧ ଜାରି ରଖିଥିବା କୋଭିଡ଼ ଯୋଦ୍ଧାଙ୍କ ପ୍ରତି ମୁଖ୍ୟମନ୍ତ୍ରୀ ଗଭୀର କୃତଜ୍ଞତା ଜଣାଇବା ସହିତ ସେମାନଙ୍କ କଠିନ ପରିଶ୍ରମ ଓ ତ୍ୟାଗ ଯୋଗୁଁ ଆଜି ଆମ ରାଜ୍ୟର ୧୮ହଜାର ଲୋକ କୋଭିଡ଼ରୁ ଆରୋଗ୍ୟ ଲାଭ କରିଛନ୍ତି ବୋଲି କହିଥିଲେ।
ମୁଖ୍ୟମନ୍ତ୍ରୀ କହିଥିଲେ, ଅନ୍ୟ ରାଜ୍ୟ ତୁଳନାରେ ଆମେ ଅଧିକ ଲୋକଙ୍କ ଜୀବନ ରକ୍ଷା କରିପାରିଛୁ। ଏକ ଅନିଶ୍ଚିତ ପରିବେଶ ଭିତରେ ନିରନ୍ତର ଭାବରେ କାମ କରିବା ସହଜ କଥା ନୁହେଁ। ନିଜେ ଏବଂ ନିଜ ପରିବାର ଲୋକେ ସଂକ୍ରମିତ ହେବା ଏବଂ ଅନେକ କ୍ଷେତ୍ରରେ ନିଜେ ମୃତ୍ୟୁବରଣ କରୁଥିଲେ ମଧ୍ୟ ଆମର ଯୋଦ୍ଧାମାନେ ଯେପରି ବିରତ୍ୱର ସହ ଗତ ୧୫୦ ଦିନ ହେଲା କାର୍ଯ୍ୟ କରିଚାଲିଛନ୍ତି ତାହାର ପଟାନ୍ତର ନାହିଁ।
ଗତ ମାର୍ଚ୍ଚ ୧୩ରେ ରାଜ୍ୟ ବିଧାନସଭାରେ ତାଙ୍କ ତାଙ୍କ ସମ୍ବୋଧନ ବିଷୟରେ ସ୍ମରଣ କରି ମୁଖ୍ୟମନ୍ତ୍ରୀ କହିଥିଲେ ଯେ ପୃଥିବୀ ଇତିହାସରେ ବହୁତ କମ ସମୟ ମାନବ ଜାତି ତା କଳ୍ପନା ବାହାରେ ଏଭଳି ଏଲକ ଆହ୍ୱାନର ସମ୍ମୁଖୀନ ହୋଇଛି। ପ୍ରାୟ ଗତ ୫ମାସ ହେଲା ସାରା ବିଶ୍ୱର ବିଭିନ୍ନ ଦେଶକୁ ଏହି ମହମାରୀ ପ୍ରଭାବିତ କରିଛି। ଏପରିକି ଯେଉଁ ଦେଶଗୁଡ଼ିକ ମହାମାରୀରୁ ମୁକ୍ତ ହୋଇସାରିଥିଲେ ସେମାନେ ମଧ୍ୟ ପୁଣି ଥରେ ତାହା କବଳକୁ ଆସିଯାଇଛନ୍ତି। ଭାରତର ପ୍ରତ୍ୟେକ ରାଜ୍ୟ ଏହାଦ୍ୱାରା କ୍ଷତିଗ୍ରସ୍ତ ହୋଇଛନ୍ତି ଏବଂ ପ୍ରତି ଦୁଇ ଦିନରେ ୧ଲକ୍ଷ ନୂଆ ସଂକ୍ରମିତ ସୃଷ୍ଟି ହେଉଛନ୍ତି। ଭାରତ ଆଜି ବିଶ୍ୱର ତୃତୀୟ ସ୍ଥାନରେ ଅଛି।
ଓଡ଼ିଶାରେ କୋଭିଡ଼ ରୋଗୀଙ୍କ ଚିକିତ୍ସା ବ୍ୟବସ୍ଥା ସମ୍ପର୍କରେ ସୂଚନା ଦେଇ ମୁଖ୍ୟମନ୍ତ୍ରୀ କହିିଥିଲେ ଯେ ଯେତେବେଳେ ଅନ୍ୟ ରାଜ୍ୟର ଡାକ୍ତରଖାନାଗୁଡ଼ିକ କୋଭିଡ଼ ଚିକିତ୍ସା ପାଇଁ ଲକ୍ଷ ଲକ୍ଷ ଟଙ୍କା ଦାବି କାରୁଥିବାବେଳେ ଓଡ଼ିଶା ସରକାର ସବୁ କିଛି ମାଗଣାରେ ଯୋଗାଉଛନ୍ତି। ସାରା ବିଶ୍ୱରେ ଯେ କୌଣସି ଅଞ୍ଚଳରେ କୋଭିଡ଼ ରୋଗ ପାଇଁ ଶ୍ରେଷ୍ଠ ଚିକିତ୍ସା ମିଳୁଛି ତାକୁ ଆମେ ଓଡ଼ିଶାରେ କାର୍ଯ୍ୟକାରୀ କରୁଛୁ ଏବଂ କେହି ଲୋକ ଯେପରି ଏହି ସୁବିଧାରୁ ବଞ୍ଚିତ ନହେବେ ସେଥିପାଇଁ ସବୁ କିଛି ମାଗଣାରେ ଯୋଗାଇଦେଉଛୁ।
ଏହି ଅବସରରେ ପ୍ଲାଜମା ଚିକିତ୍ସା ପଦ୍ଧତିର ଉତ୍ସାହଜନକ ସଫଳତା ଏବଂ କୋଭିଡ଼ ଟିକା ସମ୍ପର୍କରେ ସେରମ ଇନଷ୍ଟିଚ୍ୟୁଟର ସିଇଓଙ୍କ ସହିତ ତାଙ୍କ ଆଲୋଚନା ବିଷୟରେ ମୁଖ୍ୟମନ୍ତ୍ରୀ ଅବତାରଣା କରିଥିଲେ।
ମୁଖ୍ୟମନ୍ତ୍ରୀ କହିଥିଲେ ଏହି ମହାମାରୀ ଦ୍ୱାରା ପୃଥିବୀର ପ୍ରତ୍ୟେକ ପରିବାର କ୍ଷତିଗ୍ରସ୍ତ ହୋଇଛନ୍ତି। ସ୍ଥାନୀୟ, ଜାତୀୟ ଏବଂ ବିଶ୍ୱସ୍ତରରେ ଅର୍ଥନୀତିକୁ ଏହା ବିପୁଳ ଭାବେ କ୍ଷତିଗ୍ରସ୍ତ କରିଛି। ଆମ ରାଜ୍ୟ ନୂଆ ଯୋଜନା ଜରିଆରେ ଅର୍ଥନୀତିକୁ ଚଳଚଞ୍ଚଳ କରିବା ପାଇଁ ଉଦ୍ୟମ କରିଛି। ଅତୀତରେ ଓଡ଼ିଶା ଅନେକ ବିପର୍ଯ୍ୟୟର ମୁକାବିଲା କରିଛି। ପ୍ରତିକୂଳ ପରିସ୍ଥିତିରେ ମୁକାବିଲା କରିବା ଏବଂ ପୁଣି ଥରେ ଦୃଢ଼ ଭାବରେ ପୂର୍ବସ୍ଥିତିକୁ ଫେରି ଆସିବାର ଶକ୍ତି ପ୍ରତିଟି ଓଡ଼ିଆଙ୍କ ରକ୍ତରେ ରହିଛି। ମାହାମାରୀ ଚାଲିଯିବା ପରେ ଓଡ଼ିଶା ଅଧିକ ଦୃଢ଼ ଓ ସମୃଦ୍ଧ ଭାବରେ ତାହାର ସ୍ଥିତି ଜାହିର କରିବ ବୋଲି ମୁଖ୍ୟମନ୍ତ୍ରୀ ଦୃଢ଼ ଆଶାପୋଷଣ କରିଥିଲେ।
ବିଧାୟକମାନେ ସେମାନଙ୍କ ଅଞ୍ଚଳରେ କୋଭିଡ଼ ଯୋଦ୍ଧାମାନଙ୍କ ଯତ୍ନ ନେବା ସହିତ ପ୍ଲାଜମା ଦାନକୁ ଉତ୍ସାହିତ କରିବା ଏବଂ ସାମାଜିକ ଦୂରତା, ମାସ୍କ ବ୍ୟବହାର ଓ ହାତ ଧୋଇବା ସମ୍ପର୍କରେ ବ୍ୟାପକ ସଚେତନତା ସୃଷ୍ଟି ଦିଗରେ କାମ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ। ରାଜ୍ୟରେ ସାଢ଼େ ୪କୋଟି ଓଡ଼ିଆଙ୍କୁ କୋଭିଡ଼ ନିର୍ଦେଶାବଳି ଅନୁପାଳନ କରିବା ପାଇଁ ନିବେଦନ କରିଥିଲେ। ସେ କହିଥିଲେ ଯେ ପ୍ରାକୃତିକ ବିପର୍ଯ୍ୟୟ ହେଉ ବା ମହାମାରୀ ପ୍ରତ୍ୟେକଟି ମଣିଷର ଜୀବନ ରକ୍ଷା କରିବା ତାଙ୍କର ପ୍ରାଥମିକ ଦାୟିତ୍ୱ। ସରକାର କୋଭିଡ଼ ନିୟମାବଳିକୁ କାର୍ଯ୍ୟ କାରୀ କରିବା ପାଇଁ ସବୁ ଘରେ ବା ସବୁ ରାସ୍ତାରେ ରହିବା ସମ୍ଭବ ନୁହେଁ। ସମସ୍ତେ ଏକାଠି ହୋଇ ଏହି ମହାମାରୀ ବିରୋଧରେ ଲଢ଼େଇ କରିବା ପ୍ରତ୍ୟେକଙ୍କ ବ୍ୟକ୍ତିଗତ ଦାୟିତ୍ୱ ବୋଲି ମତ ଦେଇ ମୁଖ୍ୟମନ୍ତ୍ରୀ ସମସ୍ତଙ୍କ ସହଯୋଗ କାମନା କରିଥିଲେ।
ବିଧାୟକମାନଙ୍କୁ ସମ୍ବୋଧନ କରି ବାଚସ୍ପତି ସୂର୍ଯ୍ୟନାରାୟଣ ପାତ୍ର କହିଥିଲେ ଯେ ମୁଖ୍ୟମନ୍ତ୍ରୀ ମାର୍ଚ୍ଚ ୧୩ରୁ କୋଭିଡ଼ ରୋଗ ସମ୍ପର୍କରେ ପ୍ରଥମେ ବିଧାନସଭାରେ ସଚେତନତା କାର୍ଯ୍ୟକ୍ରମ ଆରମ୍ଭ କରିଥିଲେ। କୋଭିଡ଼ ସମ୍ପର୍କରେ ସରକାରଙ୍କ ନିର୍ଦେଶାବଳିର କଡ଼ାକଡ଼ି ଅନୁପାଳନ ଉପରେ ସେ ଗୁରୁତ୍ୱ ଆରୋପ କରିଥିଲେ।
ବିରୋଧୀ ଦଳ ନେତା ପ୍ରଦୀପ୍ତ ନାଏକ କୋଭିଡ ନିୟନ୍ତ୍ରଣ ପାଇଁ ସମସ୍ତେ ମିଳିମିଶି କାମ କରିବା ଉପରେ ଗୁରୁତ୍ୱ ଦେଇଥିଲେ। କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର କୋଭିଡ଼ ସ୍ଥିତିର ଅନୁଧ୍ୟାନ ପାଇଁ ଏକ ଗୃହ କମିଟି ଗଠନ ଲାଗି ସରକାରଙ୍କୁ ପରାମର୍ଶ ଦେଇଥିଲେ।
ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ରାଜ୍ୟରେ କରୋନା ପରିଚାଳନା ସମ୍ପର୍କରେ ଏକ ଉପସ୍ଥାପନା ରଖିଥିଲେ। ଅର୍ଥନୀତିର ପୁନରୁଦ୍ଧାର ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ବିଧାୟକମାନଙ୍କୁ ଅବଗତ କରାଇଥିଲେ। ଦୁଇ ଜଣ କରୋନା ଯୋଦ୍ଧା ଜଣେ ଡାକ୍ତର ଓ ଜଣେ ଆଶା କର୍ମୀ ସେମାନଙ୍କ ଦୈନିକ କାର୍ଯ୍ୟକ୍ରମ , କାର୍ଯ୍ୟକ୍ଷେତ୍ରରେ ସେମାନେ ଅନୁଭବ କରିଥିବା ଦୈନନ୍ଦିନର ଆହ୍ୱାନ ଓ ବ୍ୟକ୍ତିଗତ ଅନୁଭୂତି ସମ୍ପର୍କରେ ବର୍ଣ୍ଣନା କରିଥିଲେ। ସ୍ୱାସ୍ଥ୍ୟ ବିଭାଗ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ମନ୍ତ୍ରିମଣ୍ଡଳର ସଦସ୍ୟ, ବିଧାୟକ ବନ୍ଦ ଓ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
Comments
Loading...