ଡାକ୍ତରଙ୍କ ଦକ୍ଷତା ପ୍ରଶଂସନୀୟ, ୫-ଟି ପ୍ରୟୋଗର ଉତ୍କୃଷ୍ଟ ଉଦାହରଣ : ମୁଖ୍ୟମନ୍ତ୍ରୀ
ରାଜ୍ୟର ପ୍ରଥମ କାଡ଼ାଭେରିକ କିଡ୍ନୀ ପ୍ରତିରୋପଣ
ଭୁବନେଶ୍ବର : ମସ୍ତିଷ୍କ ମୃତ୍ୟୁ ଘଟିବା ପରେ ଗଞ୍ଜାମର ପି.ପ୍ରିୟଙ୍କାରାଣୀ ପାତ୍ରଙ୍କ କିଡ଼ନୀ ଦୁଇଟିକୁ ସଫଳତାର ସହ ପ୍ରତିରୋପଣ କରି ଦୁଇ ଜଣଙ୍କ ଜୀବନ ରକ୍ଷା କରିଥିବା କଟକର ଏସସିବି ମେଡ଼ିକାଲ କଲେଜ ଏବଂ ଆପୋଲୋ ହସ୍ପିଟାଲର ଡାକ୍ତରମାନଙ୍କୁ ଆଜି ଲୋକସେବା ଭବନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭେଟି ସେମାନଙ୍କ ସଫଳତା ପାଇଁ ଧନ୍ୟବାଦ ଜଣାଇଛନ୍ତି। ମୁଖ୍ୟମନ୍ତ୍ରୀ କହିଥିଲେ ଯେ ଏହି ପ୍ରଥମ କାଡ଼ାଭେରିକ କିଡ଼ନୀ ପ୍ରତିରୋପଣ ରାଜ୍ୟରେ ସ୍ବାସ୍ଥ୍ୟ ସେବା କ୍ଷେତ୍ରରେ ଏକ ମାଇଲଖୁଣ୍ଟ। ୫-ଟି ପ୍ରୟୋଗର ଏହା ଏକ ଉତ୍କୃଷ୍ଟ ଉଦାହରଣ ବୋଲି ଶ୍ରୀ ପଟ୍ଟନାୟକ ବର୍ଣ୍ଣନା କରିବା ସହିତ ଏ କ୍ଷେତ୍ରରେ ଡାକ୍ତରମାନଙ୍କ ଦକ୍ଷତାର ଉଚ୍ଚ ପ୍ରଶଂସା କରିଥିଲେ। ଆଗାମୀ ଦିନରେ ଅଙ୍ଗ ପ୍ରତ୍ୟାରୋପଣ ପାଇଁ ରାଜ୍ୟ ସରକାର ସବୁ ପ୍ରକାର ସାହାଯ୍ୟ ସହଯୋଗ ଯୋଗାଇଦେବେ ବୋଲି କହିଥିଲେ। ଏ ଦିଗରେ ବ୍ୟାପକ ଜନସଚେତନତା ଉପରେ ସେ ଗୁରୁତ୍ବ ଦେଇଥିଲେ।
ସୂଚନାଯୋଗ୍ୟ ଯେ ମୃତ୍ୟୁ ପରେ ଅଙ୍ଗଦାନକୁ ଉତ୍ସାହିତ କରିବା ପାଇଁ ରାଜ୍ୟ ସରକାର ସୁରଜ ସମ୍ମାନ ଘୋଷଣା କରିଛନ୍ତି। ସ୍ବାସ୍ଥ୍ୟମନ୍ତ୍ରୀ ନବ ଦାସ ମଧ୍ୟ ଡାକ୍ତରମାନଙ୍କୁ ଶୁଭେଚ୍ଛା ଜଣାଇଥିଲେ। ୫-ଟି ସଚିବ ଭି.କେ.ପାଣ୍ଡିଆନ କହିଥିଲେ ଯେ ମୃତ ବ୍ୟକ୍ତିଙ୍କର ଅଙ୍ଗଦାନ ଏକ ମହତ ଦାନ ଓ ଏହାଦ୍ବାରା ଅନ୍ୟମାନଙ୍କ ଜୀବନ ରକ୍ଷା ଯେପରି ହୋଇପାରିବ ସେଥିପାଇଁ ଆବଶ୍ୟକ ପଡ଼ିଲେ ହେଲିକପ୍ଟର ସୁବିଧା ମଧ୍ୟ ଯୋଗାଇଦିଆଯିବ।
ଏହି କାର୍ଯ୍ୟକ୍ରମରେ ସ୍ବାସ୍ଥ୍ୟ ବିଭାଗର ପ୍ରମୁଖ ସଚିବ ନିକୁଞ୍ଜ ଧଳ ପ୍ରାରମ୍ଭିକ ସୂଚନା ଦେଇଥିଲେ। କଟକ ଏସସିବି ମେଡ଼ିକାଲ କଲେଜର ନେଫ୍ରୋଲୋଜି ବିଭାଗର ମୁଖ୍ୟ ପ୍ରଫେସର ଡ.ଚିତ୍ତରଞ୍ଜନ କର ଏବଂ ଆପୋଲୋ ହସ୍ପିଟାଲ ୟୁରୋଲୋଜି ବିଭାଗର ମୁଖ୍ୟ ଡ.ସମୀରନଦାସ ଅଧିକାରୀ ମୃତ ବ୍ୟକ୍ତିଙ୍କ ଅଙ୍ଗ ସଂଗ୍ରହ ଓ ପ୍ରତ୍ୟାରୋପଣ ସମ୍ପର୍କରେ ବିସ୍ତୃତ ସୂଚନା ଦେଇଥିଲେ। କିଡ଼ନୀ ପ୍ରତିରୋପଣ ହୋଇଥିବା ଦୁଇଜଣ ରୋଗୀ ସୁସ୍ଥ ଅଛନ୍ତି ବୋଲି ବୈଠକରେ ସୂଚନା ଦିଆଯାଇଥିଲା।
CM @Naveen_Odisha felicitated the team of doctors from SCB Medical and Apollo Hospital who successfully conducted cadaveric kidney transplantation saving lives of two. CM said it is a healthcare milestone in the state and promised to extend all help to encourage organ donation. pic.twitter.com/6Dwf8bsKMB
— CMO Odisha (@CMO_Odisha) February 10, 2020
କଟକ ଏସସିବି ମେଡ଼ିକାଲ କଲେଜର ଟ୍ରାନ୍ସପ୍ଲାଣ୍ଟ ସର୍ଜନ ଓ ୟୁରୋଲୋଜି ବିଭାଗ ପ୍ରଫେସର ଡ.ଦତ୍ତେଶ୍ବର ହୋତା, ପ୍ରଫେସର ଜୟଶ୍ରୀ ମହାନ୍ତି, ପ୍ରଫେସର ସରୋଜକାନ୍ତ ସାହୁ, ଡ.ସବ୍ୟସାଚୀ ପଣ୍ଡା, ଡ.ସଞ୍ଜୟ ଚୌଧୁରୀ, ଡ.କଲ୍ୟାଣୀବାଳା ନାୟକ, ଡ.ରୁଦ୍ରାଶିଷ ସାମଲ, ଅନିନ୍ଦିତା ସାବତ, ସୁମନ ସିଂହ, ରମାକାନ୍ତ ପଣ୍ଡା, ସାବିତ୍ରୀ ଦାସ , ଡା.ଏଲ.ଏନ.ବେହେରା ଏବଂ ଆପୋଲୋ ହସ୍ପିଟାଲର ସୁଧୀର ଦିଗିକର, ଡ.ଶର୍ମିଲା ସିହ୍ନା, ଡ.ବିବେକାନନ୍ଦ ପଣ୍ଡା, ଡ.ଦେବବ୍ରତ ଦାଶ, ଡ.ସୁବ୍ରତ ସାହୁ, ଡ.ନିତିଶ ମହାନ୍ତି ଏବଂ ଅଶୋକ ନାୟକ ପ୍ରମୁଖ ଉପସ୍ଥିତ ଥିଲେ।
Comments are closed.