ନୂତନ ସଂସଦ ଭବନରେ ବିଶାଳ ଅଶୋକ ସ୍ତମ୍ଭ ଉନ୍ମୋଚିତ

ନୂଆଦିଲ୍ଲୀ : ଆଜି ନିର୍ମାଣଧୀନ ନୂତନ ସଂସଦ ଭବନର ଛାତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାତୀୟ ସଙ୍କେତ ବିଶାଳ ଅଶୋକ ସ୍ତମ୍ଭର ଉନ୍ମୋଚନ କରିଛନ୍ତି। ପ୍ରାୟ ୯୫୦୦ କିଲୋଗ୍ରାମ ଓଜନର ଏହି ଅଶୋକ ସ୍ତମ୍ଭ ପିତ୍ତଳରେ ନିର୍ମିତ ହୋଇଥିବା ବେଳେ ଏହାର ଉଚ୍ଚତା ୬.୫ ମିଟର। ଏହାପରେ ପ୍ରଧାନମନ୍ତ୍ରୀ ଏହାକୁ ସଠିକ ସମୟରେ ତିଆରି କରିଥିବା ଶ୍ରମିକଙ୍କ ସହ କଥା ହୋଇଥିଲେ। ସେମାନଙ୍କ ସ୍ୱାସ୍ଥ୍ୟାବସ୍ଥା ସହ ଅନ୍ୟାନ୍ୟ ବିଷୟରେ ମଧ୍ୟ କଥା ହୋଇଥିଲେ। ଏହି ଅବସରରେ ଲୋକସଭା ବାଚସ୍ପତି ଓମ ବିର୍ଲା ଏବଂ ନଗର ଉନ୍ନୟନ ମନ୍ତ୍ରୀ ହାର୍ଦ୍ଦିକ ପୁରୀ ମଧ୍ୟ ଉପସ୍ଥିତ ଥିଲେ।
ନୂତନ ସଂସଦ ଗୃହର ଛାତ ଉପରେ ଏହି ଜାତୀୟ ସଙ୍କେତର ସ୍ଥାପନ କାର୍ୟ୍ୟ ଆଠଟି ଭିନ୍ନ ପର୍ୟ୍ୟାୟରେ ଶେଷ ହୋଇଥିଲା। ଏହା ମାଟି ମଡେଲ ତିଆରି ଠାରୁ ଆରମ୍ଭ କରି କମ୍ପ୍ୟୁଟର ଗ୍ରାଫିକ୍ସ ପ୍ରସ୍ତୁତି ଏବଂ ପିତ୍ତଳ ଚିତ୍ରଗୁଡ଼ିକର ପଲିସିଂ ପର୍ୟ୍ୟନ୍ତ ସାମିଲ ରହିଛି।
ଏହି ଅବସରରେ ଲୋକସଭା ବାଚସ୍ପତି କହିଛନ୍ତି ,ଅକ୍ଟୋବର-ନଭେମ୍ବର ୨୦୨୨ ସୁଦ୍ଧା ନୂତନ ସଂସଦ ଗୃହ ଠିକ୍ ସମୟରେ ଶେଷ ହେବାର ସମ୍ଭାବନା ରହିଛି। ସେ କହିଛନ୍ତି ଯେ ଚଳିତ ବର୍ଷ ନୂତନ ସଂସଦ ଭବନରେ ଶୀତ ଅଧିବେଶନ ଆୟୋଜନ କରିବାକୁ ଚେଷ୍ଟା କରିବୁ। ଯୁଦ୍ଧକାଳୀନ ଭିତ୍ତିରେ ପ୍ରସ୍ତୁତି ଚାଲିଛି। ନିର୍ମାଣ ସମୟସୀମା ମଧ୍ୟରେ କେବଳ ସାତ ଦିନର ବ୍ୟବଧାନ ଅଛି, କାର୍ଯ୍ୟ ଶେଷ ହେବ ବୋଲି ଆଶାବାଦୀ ଅଛୁ। ପ୍ରକଳ୍ପ ଶେଷ ହେବା ପାଇଁ ଆମେ ଅକ୍ଟୋବର-ନଭେମ୍ବରର ଏକ ଆକଳନ ଦେଇଥିଲୁ ଏବଂ ମୁଁ ବହୁତ ଆଶାବାଦୀ ଯେ ୨୦୨୨ ର ଶୀତକାଳୀନ ଅଧିବେଶନ ଏଠାରେ ଆୟୋଜନ କରାଯିବ।

Comments are closed.