ୱାଶିଂଟନ: ଆମେରିକୀୟ ମହାକାଶ ଗବେଷଣା ସଂସ୍ଥା ‘ନାସା’ ସଂପ୍ରତି ମହାକାଶରେ ଅବସ୍ଥାପିତ ଆନ୍ତର୍ଜାତିକ ମହାକାଶ ଷ୍ଟେସନ (ଆଇଏସଏସ)ର ତାଜା ଫଟୋଚିତ୍ର ଜାରି କରିଛି । ସ୍ପେଶଏକ୍ସ ମହାକାଶଯାନର ମହାକାଶଯାତ୍ରୀ ଥୋମାନ ପ୍ରେସକ୍ୱେଟ ତାଙ୍କର ନିକନ ଡି୫ ଡିଏସଏଲଆର କ୍ୟାମେରା ବ୍ୟବହାର କରି ଏହି ଫଟୋଚିତ୍ର ଉତ୍ତୋଳନ କରିଛନ୍ତି । ଉକ୍ତ କ୍ୟାମେରା ବ୍ୟବହାର କରି ସେ ପୂର୍ବରୁ ପୃଥିବୀ ପୃଷ୍ଠର ମଧ୍ୟ ଅନେକ ଚିତ୍ର ଉତ୍ତୋଳନ କରିସାରିଛନ୍ତି । ବିଭିନ୍ନ କୋଣରୁ ସେ ଆଇଏସଏସର ଫଟୋ ଉଠାଇଛନ୍ତି । ସୂଚନାଯୋଗ୍ୟ ଯେ ଆଇଏସଏସ ଭୂପୃଷ୍ଠରୁ ୪୦୦ କିଲୋମିଟର ଉପରେ ମହାକାଶରେ ଅବସ୍ଥାପିତ ହୋଇଛି । ଏହା ଘଣ୍ଟାକୁ ୧୭,୫୦୦ ମାଇଲ ବେଗରେ ଗତି କରିବା ସହିତ ପ୍ରତି ୯୦ ମିନିଟରେ ପୃଥିବୀକୁ ପ୍ରଦକ୍ଷିଣ କରୁଛି । ଏହି ମହାକାଶ ଷ୍ଟେସନର ଉଚ୍ଚତା ୩୩୬ ଫୁଟ ଅଥବା ୧୦୯ ମିଟର ବୋଲି ନାସା ସୂତ୍ରରୁ ଜଣାଯାଇଛି । ଏହା ଦୁଇ ଦଶନ୍ଧିରୁ ଅଧିକ କାଳ ପୂର୍ବେ ପ୍ରଥମ କରି କାର୍ଯ୍ୟାରମ୍ଭ କରିଥିଲା । ଏହା ମହାକାଶର ଲାବୋରେଟୋରୀ ଭାବରେ କାର୍ଯ୍ୟ କରୁଛି, ଯେଉଁଠି ବିଭିନ୍ନ ରାଷ୍ଟ୍ରର ମହାକାଶଚାରୀ ରହି ଭିନ୍ନ ଭିନ୍ନ ବୈଜ୍ଞାନିକ ଗବେଷଣା ଜାରି ରଖିଛନ୍ତି ।
Comments are closed.