ଭୁବନେଶ୍ୱର: କେନ୍ଦ୍ର ଖଣି ମନ୍ତ୍ରାଳୟ ଅଧୀନରେ ଥିବା ନବରତ୍ନ ଉଦ୍ୟୋଗ ନ୍ୟାସନାଲ୍ ଆଲୁମିନିୟମ୍ କମ୍ପାନୀ ଲିମିଟେଡ୍ (ନାଲକୋ)ର ୪୨ତମ ପ୍ରତିଷ୍ଠା ଦିବସ ଜାନୁଆରୀ ୭ରେ ନାଲକୋ ମୁଖ୍ୟ କାର୍ୟ୍ୟାଳୟଠାରେ ପାଳିତ ହୋଇଯାଇଛି। କମ୍ପାନୀର ଅଧ୍ୟକ୍ଷ ତଥା ପରିଚାଳନା ନିର୍ଦେଶକ ଶ୍ରୀଧର ପାତ୍ର, ନିର୍ଦେଶକ (ପି ଆଣ୍ଡ ଟି) ଏବଂ ନିର୍ଦେଶକ (ଅର୍ଥ)-ଅତିରିକ୍ତ ଦାୟିତ୍ୱ, ମନସା ପ୍ରସାଦ ମିଶ୍ର, ନିର୍ଦେଶକ (ଉତ୍ପାଦନ) ଏବଂ ନିର୍ଦେଶକ (ବାଣିଜ୍ୟ)-ଅତିରିକ୍ତ ଦାୟିତ୍ୱ ବିଜୟ କୁମାର ଦାସ ଏବଂ ମୁଖ୍ୟ ସତର୍କତା ଅଧିକାରୀ ସୋମନାଥ ହାଂସଦା ଏହି ଅବସରରେ କର୍ମଚାରୀଙ୍କ ଉଦ୍ଦେଶ୍ୟରେ ନିଜର ଅଭିଭାଷଣ ପ୍ରଦାନ କରିଥିଲେ।
ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଥିବା ଏବଂ ସାହିତ୍ୟ ଓ ସଂସ୍କୃତିର ପ୍ରଚାର ପ୍ରସାର କ୍ଷେତ୍ରରେ ବିଶେଷ ଅବଦାନ ପାଇଁ ବ୍ୟକ୍ତିବିଶେଷଙ୍କୁ ଏହି ଅବସରରେ ନାଲକୋ ସମ୍ମାନ ପ୍ରଦାନ କରାଯାଇଥିଲା। ଚଳିତ ବର୍ଷ ନାଲକୋ କାଳିଦାସ ସମ୍ମାନ ପ୍ରତିଷ୍ଠିତ ଆଧ୍ୟାତ୍ମିକ ଚିନ୍ତକ ତଥା ଲେଖକ ଡ. ଚନ୍ଦ୍ରଭାନୁ ଶତପଥୀଙ୍କୁ ପ୍ରଦାନ କରାଯାଇଥିଲା । ପ୍ରସିଦ୍ଧ ଓଡ଼ିଶୀ ନୃତ୍ୟଗୁରୁ ପଦ୍ମଶ୍ରୀ ଅରୁଣା ମହାନ୍ତିଙ୍କୁ ନାଲକୋ ଖାରବେଳ ସମ୍ମାନ (ଗୁରୁ) ପ୍ରଦାନ କରାଯାଇଥିଲା । ଓଡ଼ିଶୀ ନୃତ୍ୟ କ୍ଷେତ୍ରରେ ମମତା ଓଝା ଏବଂ ହରେକୃଷ୍ଣ ଧଳଙ୍କୁ ନାଲକୋ ଖାରବେଳ (ନୃତ୍ୟଶିଳ୍ପୀ) ସମ୍ମାନ ପ୍ରଦାନ କରାଯାଇଥିଲା।
Comments are closed.