ବାଲ୍ୟବିବାହ ପ୍ରତିରୋଧ ମଞ୍ଚ ଗଠିତ

ନବରଙ୍ଗପୁର: ସମଗ୍ର ନବରଙ୍ଗପୁର ଜିଲ୍ଲାରେ ବାଲ୍ୟ ବିବାହ ସମାପ୍ତ ଉଦ୍ଦେଶ୍ୟରେ ଜିଲ୍ଲାପାଳ ଡଃ ଅଜିତ କୁମାର ମିଶ୍ର ଆରମ୍ଭ କରିଛନ୍ତି ଅନ୍ଵେଷା ଅଭିଯାନ। କମ ବୟସରେ ବିବାହ ବନ୍ଧନରେ ନବାନ୍ଧି ପିତା ମାତା ଓ ସଂପ୍ରଦାୟକୁ ବୁଝାଇ କିଶୋରୀମାନଙ୍କର ପ୍ରତିଭାକୁ ବିକଶିତ କରିବା ହେଉଛି ଅନ୍ଵେଷା ଅଭିଯାନର ମୂଳ ଉଦ୍ଦେଶ୍ୟ। ଜିଲ୍ଲାରେ ବାଲ୍ୟ ବିବାହର ସମାପ୍ତ ଉଦ୍ଦେଶ୍ୟରେ ଅନ୍ଵେଷା ଅଭିଯାନ ମାଧ୍ୟମରେ ହେଉଥିବା କାର୍ଯ୍ୟକ୍ରମରେ ଆଉ ପାଦେ ଆଗକୁ ବଢିଛି ଜିଲ୍ଲା ପ୍ରଶାସନ। କିଶୋର କିଶୋରୀମାନଙ୍କୁ ସଶକ୍ତ କରାଇବା ସହିତ ବାଲ୍ୟ ବିବାହକୁ ରୋକିବା ଦିଗରେ ଆଜି ମିଶନଶକ୍ତି ସଭାଗୃହ ଠାରେ ବାଳିକାମାନଙ୍କୁ ନେଇ ଜିଲ୍ଲାସ୍ତରୀୟ ବାଲ୍ୟବିବାହ ପ୍ରତିରୋଧ ମଞ୍ଚ ଗଠିତ ହୋଇଛି।

ଆଜି ଜିଲ୍ଲାର ୧୦ ଗୋଟି ବ୍ଲକରେ ବାଳିକା ମଣ୍ଡଳୀର ୫୦ ଜଣ ସଖୀ ଓ ସହେଲିମାନଙ୍କୁ ନେଇ ଗଠିତ ଏହି ଜିଲ୍ଲାସ୍ତରୀୟ ମଞ୍ଚକୁ ଜିଲ୍ଲାପାଳ ଡଃ ଅଜିତ କୁମାର ମିଶ୍ର ଉପସ୍ଥିତ ରହି ଆନୁଷ୍ଠାନିକ ଭାବେ ସ୍ଵୀକୃତି ପ୍ରଦାନ କରିଛନ୍ତି। ଏହି ଉପଲକ୍ଷେ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ଭାଗ ନେଇ ଜିଲ୍ଲା ସମାଜ କଲ୍ଯାଣ ଅଧିକାରୀ ସ୍ଵର୍ଣ୍ଣଲତା ବିଶ୍ବାସ ଜିଲ୍ଲା ଶିଶୁ ସୁରକ୍ଷା ୟୁନିଟି, ଜିଲ୍ଲା ସମାଜ କଲ୍ୟାଣ ବିଭାଗ, ୟୁନିସେଫ ଓ ଆକ୍ସନଏଡର ମିଳିତ ପ୍ରୟାସରେ ଏକ ଯୋଜନାବଦ୍ଧ କାର୍ଯ୍ୟକ୍ରମ ପ୍ରସ୍ତୁତ କରାଯାଇ ଗ୍ରାମଗୁଡିକରେ ସଚେତନତା କାର୍ଯ୍ୟକ୍ରମ ଚାଲୁଥିବାର ସୂଚନା ଦେବା ସହିତ ବର୍ତ୍ତମାନ ଜିଲ୍ଲାରେ ୨୦୨ ଗୋଟି ବାଲ୍ୟ ବିବାହ ରୋକାଯିବା ସହିତ ୫୯୫ଟି ଗ୍ରାମକୁ ବାଲ୍ୟବିବାହ ମୁକ୍ତ ଗ୍ରାମ ଭାବରେ ଘୋଷଣା କରାଯାଇଥିବାର ଜଣାଇ ଥିଲେ।

ପରେ ଆକ୍ସନଏଡର ଜିଲ୍ଲା ପରାମର୍ଶଦାତା ଫକିର ଚରଣ ରାଉତ ବାଲ୍ୟବିବାହ ପ୍ରତିରୋଧ ମଞ୍ଚ ଭବିଷ୍ୟତ କାର୍ଯ୍ୟକ୍ରମ ଉପରେ ଉପସ୍ଥାପନ କରିଥଲେ। ଅନ୍ୟମାନଙ୍କ ମଧ୍ୟରେ ପ୍ରକଳ୍ପ ନିର୍ଦ୍ଦେଶକ ରତ୍ନାକର ସାହୁ, ଉପ ଜିଲ୍ଲାପାଳ ଅକ୍ଷୟ ସୁନୀଲି ଅଗ୍ରୱାଲ, ଡିଏସପି ଜୟକୃଷ୍ଣ ବେହେରା ଜିଲ୍ଲା ଶିଶୁମଙ୍ଗଳ ସମିତିର ଅଧକ୍ଷ ଦିବାକର ବାହୁକ, ଜିଲ୍ଲା ଶିଶୁ ସୁରକ୍ଷା ଅଧିକାରୀ ସୁରେଶ ପଟ୍ଟନାୟକ, ୟୁନିସେଫର ପରାମର୍ଶଦାତା ସନ୍ତୋଷ ବେହେରା, ଡ଼ିଆଇପିଆରଓ ହଲଧର ନିଆଲ, ସିଡିପିଓ ଗୀତା ମହାରଣା, ବିନୋଦିନୀ ପଟ୍ଟନାୟକ, ସୁନିତା ଦେବୀ ତ୍ରିପାଠି, ସରୋଜିନୀ ରଥ, ଯମୁନା ଭତ୍ରା, ଶଇରେନ୍ଦ୍ରି ମହାନନ୍ଦ, ଦୀପ୍ତି ରାଣୀ ସିଂ, ସୁପରଭାଇଜର ସସ୍ମିତା ମହାନ୍ତି, ତ୍ରିଷ୍ଣା ବୈଦ୍ୟ, ସଞ୍ଜୁକ୍ତା ବେହେରା, ବିନୀତା ଜେଠି, ସୁଦର୍ଶନୀ ରଥ ଓ ମମତା ସଂଯୋଜକ ବିସୋଜିତି ମହାନ୍ତି ପ୍ରମୁଖ ଆଲୋଚନାରେ ଅଂଶଗ୍ରହଣ କରି ବାଲ୍ୟବିବାହ ପ୍ରତିରୋଧ ମଞ୍ଚର ଭବିଷ୍ୟତ କାର୍ଯ୍ୟକ୍ରମ ଉପରେ ନିଜର ମତାମତ ପ୍ରଦାନ କରିଥିଲେ। ଶେଷରେ ସହାୟକ ସମାଜକଲ୍ୟାଣ ଅଧିକାରୀ ନରହରି ସିଂ ଧନ୍ୟବାଦ ଅର୍ପଣ କରିଥିଲେ।

Comments
Loading...