ପୁଡୁଚେରୀର ମୁଖ୍ୟମନ୍ତ୍ରୀ ଭାବେ ଶପଥ ନେଲେ ଏନ୍‌. ରଙ୍ଗସ୍ବାମୀ

ପୁଡୁଚେରୀ : କେନ୍ଦ୍ରଶାସିତ ଅଞ୍ଚଳ ପୁଡୁଚେରୀର ମୁଖ୍ୟମନ୍ତ୍ରୀ ଭାବେ ଏଆଇଏନ୍‌ଆରସି ମୁଖ୍ୟ ଏନ୍‌. ରଙ୍ଗସ୍ବାମୀ ଶୁକ୍ରବାର ଶପଥ ଗ୍ରହଣ କରିଛନ୍ତି। କରୋନା କଟକଣା ମଧ୍ୟରେ ଆୟୋଜିତ ଏକ ନିରାଡମ୍ବର ସମାରୋହରେ ଉପ-ରାଜ୍ୟପାଳ ଡକ୍ଟର ତାମିଲିସାଇ ସୁନ୍ଦରରାଜନ ତାଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି।

ପୂର୍ବରୁ ୩ ଥର ମୁଖ୍ୟମନ୍ତ୍ରୀ ଥିବା ରଙ୍ଗସ୍ବାମୀ ୪ର୍ଥ ଥର ପାଇଁ  ବିଜେପି ସହିତ ମେଣ୍ଟ କରି ଏହି କେନ୍ଦ୍ରଶାସିତ ଅଞ୍ଚଳର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ଗତ ଜାନୁଆରୀରେ ତାଙ୍କ ଦଳ ସହିତ ବିଜେପି ମେଣ୍ଟ କରିଥିଲା। ନିର୍ବାଚନରେ ରଙ୍ଗସ୍ବାମୀଙ୍କ ଦଳ ୧୬ରୁ ୧୦ଟି ଆସନରେ ବିଜୟୀ ହୋଇଛି। ସହଯୋଗୀ ବିଜେପି ୯ଟିରୁ ୬ଟି ଆସନରେ ବିଜୟୀ ହୋଇଛି। ମୋଟ ୩୦ ଆସନ ବିଶିଷ୍ଟ ବିଧାନସଭାରେ ମିଳିତ ଭାବେ ଏମାନଙ୍କ ସଦସ୍ୟ ସଂଖ୍ୟା ୧୬ ରହିଛି। ୭୦ବର୍ଷୀୟ ରଙ୍ଗସ୍ବାମୀ ୨୦୦୧ରୁ ୨୦୦୮ ପର୍ଯ୍ୟନ୍ତ ପୁଡୁଚେରୀର ମୁଖ୍ୟମନ୍ତ୍ରୀ ଥିଲେ। ନିଜର ସାଧାରଣ ଜୀବନଯାପନ ଶୈଳୀ ପାଇଁ ସେ ବେଶ୍‌ ଲୋକପ୍ରିୟ। ସୂଚନାଯୋଗ୍ୟ ରଙ୍ଗସ୍ବାମୀ କଂଗ୍ରେସରୁ ଇସ୍ତଫା ଦେବା ପରେ ନିଜସ୍ବ ଦଳ ଏଆଇଏନ୍‌ଆରସି ଗଠନ କରିଥିଲେ।

Comments are closed.