ବାଲିଅନ୍ତାରେ ସାନ ଭାଇକୁ ହାଣି ହତ୍ୟା ଘଟଣା; ଅଭିଯୁକ୍ତ ବଡ଼ ଭାଇ ନଖରାରୁ ଗିରଫ

ଭୁବନେଶ୍ୱର : ବାଲିଅନ୍ତା ଥାନା ଅନ୍ତର୍ଗତ ସୁରେଖା ଆପାର୍ଟମେଣ୍ଟ୍‌ ନିକଟରେ ବିଚ୍‌ ରାସ୍ତାରେ ସାନ ଭାଇକୁ ହତ୍ୟା ଘଟଣାରେ ପୁଲିସ ଅଭିଯୁକ୍ତ ବଡ଼ ଭାଇ ସ୍ରଷ୍ଟା ରାଉତରାୟକୁ ଗିରଫ କରିଛି। ରବିବାର ସକାଳେ ନଖରା ଅଞ୍ଚଳରୁ ପୁଲିସ ତାକୁ ଗିରଫ କରିଥିଲା।

ସୂଚନା ମୁତାବକ, ୨ଦିନ ତଳେ ଲକ୍ଷ୍ମୀସାଗର ଶବରସାହିର ପ୍ରୀତମ ରାଉତରାୟଙ୍କୁ ସୁରେଖା ଆପାର୍ଟମେଣ୍ଟ ନିକଟରେ ଜଣେ ଯୁବକ ଭୁଜାଲିରେ ହାଣି ହତ୍ୟା କରିଥିଲା। ହତ୍ୟା ପରେ ରକ୍ତଭିଜା ଭୁଜାଲିକୁ ଗାମୁଛାରେ ବାନ୍ଧି ସେଠାରୁ ଚାଲିଯାଇଥିଲା। ସ୍ପଷ୍ଟ ଦିବାଲୋକରେ ଏହି ଘଟଣା ଘଟିଥିଲା। ଏହାର ଦୃଶ୍ୟ ସିସିଟିଭି କ୍ୟାମେରାରେ ରେକର୍ଡ ହୋଇଥିଲା। ପୁଲିସ ଘଟଣାର ତଦନ୍ତ ବେଳେ ସିସିଟିଭି କ୍ୟାମେରା ଫୁଟେଜ ଯାଞ୍ଚ କରିବାରୁ ଅଭିଯୁକ୍ତ ଜଣକ ମୃତକ ପ୍ରୀତମଙ୍କ ବଡ଼ ଭାଇ ସ୍ରଷ୍ଟା ବୋଲି ଜଣାପଡ଼ିଥିଲା। ପରେ ତାଙ୍କୁ ଧରିବା ଲାଗି ପୁଲିସ ଶନିବାରଠାରୁ ଚଢ଼ାଉ ଆରମ୍ଭ କରିଥିଲା। ରବିବାର ସେ ନଖରା ଅଞ୍ଚଳରେ ଲୁଚି ରହିଥିବା ସୂଚନା ପାଇବା ପରେ ପୁଲିସ ସେଠାରେ ଚଢ଼ାଉ କରି ତାକୁ ଗିରଫ କରିଛି। ପାରିବାରିକ ବିବାଦରୁ ପ୍ରିତମଙ୍କୁ ତାଙ୍କ ବଡ ଭାଇ ହତ୍ୟା କରିଥିବା ପୁଲିସ ତଦନ୍ତରୁ ଜାଣିବାକୁ ପାଇଛି । ପ୍ରୀତମ ସମ୍ପତ୍ତି ପାଇଁ ତାଙ୍କ ବାପା ଏବଂ ବଡ଼ ଭାଇକୁ ବାରମ୍ବାର ହତ୍ୟା ଧମକ ଦେଉଥିଲେ ବୋଲି ପୁଲିସ ସୂତ୍ରରୁ ଜଣାପଡ଼ିଛି।

Comments
Loading...