ଅଯୋଧ୍ୟାରେ ମସଜିଦ, ୫ ଏକରରେ ହେବ ୨ଟି କୋଠା: ଆସିଲା ପ୍ରଥମ ଚିତ୍ର

ଅଯୋଧ୍ୟା ଧନ୍ନିପୁରରେ ନିର୍ମାଣ ହେବାକୁ ଥିବା ମସଜିଦର ଡିଜାଇନ୍ ଆରମ୍ଭ କରାଯାଇଛି। ୫ ଏକର ଜମିରେ ମସଜିଦ ଏବଂ ଡାକ୍ତରଖାନାର ଦୁଇଟି କୋଠା ନିର୍ମାଣ କରାଯିବ। ଏହି ମସଜିଦଟି ଏସ୍ ଏମ ଅଖତରଙ୍କ ଦ୍ୱାରା ପରିକଳ୍ପନା କରାଯାଇଛି। ଡାକ୍ତରଖାନା ସହିତ କ୍ୟାମ୍ପସରେ ଏକ ଲାଇବ୍ରେରୀ, ସଂଗ୍ରହାଳୟ ଏବଂ କମ୍ୟୁନିଟି ରୋଷେଇ ଘର ମଧ୍ୟ ନିର୍ମାଣ କରାଯିବ।ଇଣ୍ଡୋ-ଇସଲାମିକ୍ ସାଂସ୍କୃତିକ ଫାଉଣ୍ଡେସନ୍ ଆଜି ନୂଆ ମସଜିଦର ଡିଜାଇନ୍ ଲଞ୍ଚ କରିଛି। ଏହି ଅବସରରେ ଟ୍ରଷ୍ଟର ଅଧ୍ୟକ୍ଷ ମୌଲାନା ଜୁଫର ଫାରୁକି, ଅତହର ହୁସେନ୍ ଓ ଅନ୍ୟମାନେ ଉପସ୍ଥିତ ଥିଲେ।

ଏହି ମସଜିଦରେ ଏକାସାଙ୍ଗରେ ଦୁଇ ହଜାର ଲୋକଙ୍କ ବସିବାର ବ୍ୟବସ୍ଥା ଥିବାବେଳେ ମଲ୍ଟି ସ୍ପେସାଲିଟି ଡାକ୍ତରଖାନା ରହିବ। ସମଗ୍ର ମସଜିଦ କମ୍ପ୍ଲେକ୍ସରେ ସୌର ଶକ୍ତି ବ୍ୟବହାର କରାଯିବ। ଡିଜାଇନ ଅନୁମୋଦନ ହେବା ପରେ ମସଜିଦ ନିର୍ମାଣ କାର୍ଯ୍ୟ ଆରମ୍ଭ ହେବ। ଦୁଇ ବର୍ଷ ମଧ୍ୟରେ ନିର୍ମାଣ କାର୍ଯ୍ୟ ଶେଷ ହେବ ବୋଲି କୁହାଯାଉଛି। ନୂଆ ମସଜିଦରେ ଗମ୍ବୁଜ ରହିବ ନାହିଁ। ଏହା ଉପସାଗରୀୟ ଦେଶର ମସଜିଦ ଆକୃତିର ହେବ।

ନିର୍ମାଣ ହେବାକୁ ଥିବା ନୂଆ ମସଜିଦର ଗଣତନ୍ତ୍ର ଦିବସ କିମ୍ବା ସ୍ୱାଧୀନତା ଦିବସ ଅବସରରେ ଭିତ୍ତିପ୍ରସ୍ତର ସ୍ଥାପନ କରାଯିବ। ତେବେ ଏ ବାବଦରେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇ ନାହିଁ। ନିକଟରେ ଟ୍ରଷ୍ଟର ସଚିବ ତଥା ମୁଖପାତ୍ର ଅତହର ହୁସେନ୍ କହିଛନ୍ତି ଯେ ନିର୍ମାଣ କାର୍ଯ୍ୟ ଆରମ୍ଭ କରିବା ପାଇଁ ଜାନୁଆରୀ ୨୬ କିମ୍ବା ଅଗଷ୍ଟ ୧୫ ଅପେକ୍ଷା ଅନ୍ୟ କୌଣସି ଦିନ ଭଲ ଦିନ ହୋଇପାରିବ ନାହିଁ, କାରଣ ଜାନୁଆରୀ ୨୬ରେ ଦେଶର ସମ୍ବିଧାନର ମୂଳଦୁଆ ପଡିଥିଲା ଏବଂ ଅଗଷ୍ଟ ୧୫ରେ ଦେଶ ସ୍ୱାଧୀନ ହୋଇଥିଲା।

ସେ କହିଛନ୍ତି ଯେ ଅଯୋଧ୍ୟାରେ ନିର୍ମାଣ ହେବାକୁ ଥିବା ମସଜିଦରେ ବାବର କିମ୍ବା ଏହା ସହ ଜଡିତ କୌଣସି ଉଲ୍ଲେଖ ରହିବ ନାହିଁ କିମ୍ବା ମସଜିଦକୁ କୌଣସି ଭାଷା କିମ୍ବା ରାଜାଙ୍କ ନାମରେ ନାମିତ କରାଯିବ ନାହିଁ। ମସଜିଦ ନିର୍ମାଣ ପାଇଁ ସୁନ୍ନି ୱାକଫ ବୋର୍ଡ ଏକ ମାସ ପୂର୍ବରୁ ଆଇଆଇସିଏଫ୍ ଗଠନ କରିଥିଲା। ଏହି ପ୍ରକଳ୍ପର ମୁଖ୍ୟ ସ୍ଥପତି ପ୍ରଫେସର ଏସ୍.ଏମ୍ ଅଖତରଙ୍କ ଦ୍ୱାରା ଡିଜାଇନ୍ ଚୂଡାନ୍ତ ହୋଇଛି। ଅଖତର କହିଛନ୍ତି ଯେ ମସଜିଦରେ ଏକ ସମୟରେ ୨ ହଜାର ଲୋକ ନମାଜ ଅର୍ପଣ କରିପାରିବେ ଏବଂ ଏହାର ଗଠନ ବୃତ୍ତାକାର ହେବ।

Comments
Loading...