ସୁଧ ଉପରେ ସୁଧ ଛାଡ ଦେଶର ଅର୍ଥନୈତିକ ସ୍ଥିତି ଉପରେ ପ୍ରତିକୂଳ ପ୍ରଭାବ ପକାଇବ : ଆରବିଆଇ

ପରବର୍ତ୍ତୀ ଶୁଣାଣି ପାଇଁ ଆସନ୍ତା ୧୩ ତାରିଖରେ

ନୂଆଦିଲ୍ଲୀ :  ଋଣ ପରିଶୋଧ କରିବାର ରିହାତି ସମୟ ୬ମାସରୁ ଅଧିକ ବୃଦ୍ଧି କରାଯିବା ଦ୍ୱାରା ଏହା ଋଣ ପ୍ରଦାନ ନିୟମର ଉଲଙ୍ଘନ କରିବ ବୋଲି ରିଜର୍ଭ ବ୍ୟାଙ୍କ ସୁପ୍ରିମକୋର୍ଟରେ ଜଣାଇଛି। ଏହାଦ୍ୱାରା ଦେଶରେ ଋଣ ପାଇଁ ପାଣ୍ଠି ଉପଲବ୍ଧ ପ୍ରକ୍ରିୟା ପ୍ରଭାବିତ ହେବ ବୋଲି ରିଜର୍ଭ ବ୍ୟାଙ୍କ କହିଛି।
ଋଣ ପରିଶୋଧ ସମୟରେ ରିଆତି ସଂକ୍ରାନ୍ତ ଏକ ମାମଲାରେ ସୁପ୍ରିମକୋର୍ଟରେ ସତ୍ୟପାଠ ଦାଖଲ କରି ରିଜର୍ଭ ବ୍ୟାଙ୍କ କହିଛି, ଋଣ ପରିଶୋଧ ପାଇଁ ରିଆତି ସମୟ ଦୀର୍ଘକାଳୀନ ହେଲେ ଏହା ଋଣ ଗ୍ରହୀତାମାନଙ୍କ ଆଚରଣ ଉପରେ ପ୍ରଭାବ ପକାଇବା ସଙ୍ଗେ ସଙ୍ଗେ ଋଣ ପରିଶୋଧ ଆରମ୍ଭ କରିବାର ପ୍ରକ୍ରିୟାରେ ମଧ୍ୟ ଅସୁବିଧା ସୃଷ୍ଟି କରିବ।
ସୁପ୍ରିମକୋର୍ଟଙ୍କର ଗତ ୫ ତାରିଖର ନିର୍ଦ୍ଦେଶ ଉପରେ ରିଜର୍ଭ ବ୍ୟାଙ୍କ ଏହି ସତ୍ୟପାଠ ଦାଖଲ କରିଛି। କୋବିଡ ସଂକ୍ରମଣ ଦୃଷ୍ଟିରୁ ଋଣ ପରିଶୋଧ
ସଂକ୍ରାନ୍ତରେ କେ.ଭି.କାମତ୍‍ କମିଟି ସୁପାରିଶ ଗୁଡ଼ିକୁ କାର୍ଯ୍ୟକାରୀ କରିବାପାଇଁ ସୁପ୍ରିମକୋର୍ଟ ଉଭୟ କେନ୍ଦ୍ର ସରକାର ଓ ରିଜର୍ଭ ବ୍ୟାଙ୍କକୁ କହିଥିଲେ। ରିଜର୍ଭ ବ୍ୟାଙ୍କ କହିଛି ସୁଧ ଉପରେ ସୁଧ ଛାଡ ପାଇଁ ଯେକୌଣସି ନିର୍ଦ୍ଦେଶ ଦେଶର ଅର୍ଥନୈତିକ ସ୍ଥିତି ଉପରେ ପ୍ରତିକୂଳ ପ୍ରଭାବ ପକାଇବ। ଏହା ବ୍ୟାଙ୍କଗୁଡ଼ିକ ପାଇଁ ମଧ୍ୟ ବଡଧରଣର ଅସୁବିଧା ସୃଷ୍ଟି କରିବ ବୋଲି ରିଜର୍ଭ ବ୍ୟାଙ୍କ କହିଛି। ଏହି ମାମଲାର ପରବର୍ତ୍ତୀ ଶୁଣାଣି ପାଇଁ ଆସନ୍ତା ୧୩ ତାରିଖକୁ ଦିନଧାର୍ଯ୍ୟ କରାଯାଇଛି।

Comments
Loading...