ମୋଦୀ ଦେଶର ନେତୃତ୍ଵ ନେବା ପାଇଁ ‘ଭଗବାନ’ ସ୍ଥିର କରିଛନ୍ତି: ଶିବସେନା

ମୁମ୍ବଇ: ବିଜେପିର ଅନ୍ୟତମ ସହଯୋଗୀ ଶିବସେନା ଏହାର ମୁଖପତ୍ର ‘ସାମନା’ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରିଛି। ମୋଦୀ ଦେଶର ନେତୃତ୍ଵ ନେବା ‘ଭଗବାନ’ଙ୍କ ଯୋଜନା ବୋଲି ସାମନା’ର ସମ୍ପାଦକୀୟରେ ଦର୍ଶାଯାଇଛି। ମୋଦୀଙ୍କୁ ‘ପ୍ରମୁଖ ବିଭାଜକ’ ଦର୍ଶାଇଥିବା ଆମେରିକାର ଲୋକପ୍ରିୟ ପତ୍ରିକା ଟାଇମ ମାଗାଜିନ ୟୁ-ଟର୍ନ ନେଇଥିବା ସାମନାର ସମ୍ପାଦକୀୟରେ ଉଲ୍ଲେଖ କରାଯାଇଛି।

ଜାତୀୟ ଗଣତାନ୍ତ୍ରିକ ମେଣ୍ଟ(ଏନଡିଏ) ଲୋକସଭା ନିର୍ବାଚନରେ ବଡ଼ ଧରଣର ବିଜୟ ହାସଲ କରିବା ପରେ ଟାଇମ ମାଗାଜିନ ପୁଣି ଏକ ରିପୋର୍ଟ ପ୍ରକାଶ କରି ପ୍ରଶଂସା କରିଛି। ମୋଦୀ ଦେଶକୁ ଯୋଡୁଥିବା ସବୁଠୁ ବଡ଼ ନେତା ବୋଲି ଏହି ମାଗାଜିନରେ ରିପୋର୍ଟ ପ୍ରକାଶ କରାଯାଇଛି। ଭାରତର କୌଣସି ପ୍ରଧାନମନ୍ତ୍ରୀ ମୋଦୀଙ୍କ ପରି ଦେଶକୁ ଏକତା ସୂତ୍ରରେ ବାନ୍ଧି ନାହାନ୍ତି ବୋଲି ଏଥିରେ କୁହାଯାଇଛି।

ଏହା ପରେ ଶିବସେନାର ମୁଖପତ୍ର ‘ସାମନା’ର ସମ୍ପାଦକୀୟରେ କୁହାଯାଇଛି, ମୋଦୀଙ୍କୁ ‘ପ୍ରମୁଖ ବିଭାଜକ’ ଦର୍ଶାଇଥିବା ଟାଇମ ମାଗାଜିନ ୟୁ-ଟର୍ନ ନେଇଛି। ଦେଶରେ ଅନେକ ସମସ୍ୟା ରହିଛି। କିନ୍ତୁ ସେସବୁ ସମସ୍ୟାର ସଫଳତାର ସହ ସମାଧାନ କରିବା ପାଇଁ ମୋଦୀଙ୍କର ଦୃଢ଼ ବିଶ୍ଵାସ ରହିଛି। ସେ ଗତ କାଲି ପର୍ଯ୍ୟନ୍ତ ଚୌକିଦାର ଏବଂ ପ୍ରଧାନ ସେବକ ଥିଲେ। ବର୍ତ୍ତମାନ ସେ ଦେଶର ରକ୍ଷକ ଭାବେ ଦାୟିତ୍ଵ ନେବାକୁ ଯାଉଛନ୍ତି। ଦେଶକୁ ଶକ୍ତିଶାଳୀ କରିବା ଲାଗି ତାଙ୍କର ଶପଥ ଗ୍ରହଣ ‘ଭଗବାନ’ଙ୍କ ଯୋଜନା ବୋଲି ସମ୍ପାଦକୀୟରେ ଉଲ୍ଲେଖ କରାଯାଇଛି।