ମୋ କଲେଜ ଅଭିଯାନ ପରିଚାଳନା ସଙ୍ଗଠନ ପାଇଁ ନିଯୁକ୍ତି ପ୍ରକ୍ରିୟା ଆରମ୍ଭ

ଭୁବନେଶ୍ବର: ମୋ କଲେଜ ଅଭିଯାନ ପରିଚାଳନା ସଙ୍ଗଠନ ପାଇଁ ରାଜ୍ୟ ସରକାରଙ୍କ ପକ୍ଷରୁ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଛି। ଏଥିପାଇଁ ପ୍ରାରମ୍ଭିକ ପର୍ଯ୍ୟାୟରେ ୧୧ଟି ପଦକୁ ମଞ୍ଜୁରି ଦିଆଯାଇଛି। ମୋ କଲେଜ ଅଭିଯାନକୁ ତ୍ବରାନ୍ବିତ କରିବା ପାଇଁ ଏଥିରେ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ), ସରକାରୀ ସଂଯୋଜକ ତଥା ଓଏସଡ଼ି, କଲେଜ ସଂଯୋଜକ, ବିତ୍ତ ଅଧିକାରୀ, ଅଧ୍ୟକ୍ଷଙ୍କ ପିଏ, ପରାମର୍ଶଦାତା, ଅଫିସ ମ୍ୟାନେଜର, ଅଫିସ ସହକାରୀଙ୍କ ସମେତ ଅନ୍ୟ ତିନିଟି ପଦରେ ନିଯୁକ୍ତି ଦିଆଯିବ। ଏଥିନେଇ ଉଚ୍ଚଶିକ୍ଷା ବିଭାଗ ପକ୍ଷରୁ ଶୁକ୍ରବାର ଏକ ବିଜ୍ଞପ୍ତି ପ୍ରକାଶ ପାଇଛି।

ମୋ କଲେଜ ପରିଚାଳନା ଟିମର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ) ପଦ ବିଜ୍ଞାପନ ଜରିଆରେ ପୂରଣ କରାଯିବା ପାଇଁ ସ୍ଥିର ହୋଇଛି। ଜଣେ ଅବସରପ୍ରାପ୍ତ ଓଏଏସ ଅଧିକାରୀଙ୍କୁ ଓଏସଡ଼ି, ଅବସରପ୍ରାପ୍ତ ଓଡ଼ିଶା ଶିକ୍ଷା ଅଧିକାରୀ(ଓଇଏସ)ଙ୍କୁ କଲେଜ ସଂଯୋଜକ, ଅବସରପ୍ରାପ୍ତ ଓଏଫଏସ/ଓଟାସ ଅଧିକାରୀଙ୍କୁ ବିତ୍ତ ଅଧିକାରୀ ଭାବେ ନିଯୁକ୍ତି ଦିଆଯିବ। ଓଏସଡ଼ି ପ୍ରଶାସନିକ ବିଭାଗ ଓ ସରକାରଙ୍କ ମଧ୍ୟରେ ସମନ୍ବୟ ରକ୍ଷା କରିବେ ଏବଂ କଲେଜ ସଂଯୋଜକ ମହାବିଦ୍ୟାଳୟ ଓ ବିଶ୍ବବିଦ୍ୟାଳୟ ମଧ୍ୟରେ ସମନ୍ବୟ ରକ୍ଷା କରିବେ। ପରାମର୍ଶଦାତା ପଦ ବିଜ୍ଞାପନ ଜରିଆରେ ପୂରଣ କରାଯିବ ଏବଂ ସାମାଜିକ ଗଣମାଧ୍ୟମ, ପ୍ରକଳ୍ପ କାର୍ଯ୍ୟକାରିତା କ୍ଷେତ୍ରରେ ସମ୍ପୃକ୍ତ ଅଧିକାରୀ କାର୍ଯ୍ୟ କରିବେ। ମୋ କଲେଜ ଅଭିଯାନ ପରିଚାଳନା ସଙ୍ଗଠନ ନିମନ୍ତେ ୧୧ଟି ପଦ ପୂରଣ ପାଇଁ ବିଜ୍ଞପ୍ତିରେ ଉଲ୍ଲେଖ ରହିଛି। ଏସବୁ ପଦ ପୂରଣ ପାଇଁ ଅର୍ଥ ବିଭାଗର ଅନୁମୋଦନ ମିଳିଥିବା ବିଭାଗ ସୂତ୍ରରୁ ଜଣାପଡ଼ିଛି।

Comments are closed.