ମୋ ବସ୍ ସେବାକୁ ଦୁଇବର୍ଷ : ଫେରୁଛି ପୂର୍ବସ୍ଥିତି, ଦୈନିକ ଯାତ୍ରା କରୁଛନ୍ତି ୨୫ ହଜାର ଯାତ୍ରୀ
ଭୁବନେଶ୍ବର : ମୋ ବସ୍ ସେବାକୁ ଶୁକ୍ରବାର ଦୁଇବର୍ଷ ପୂରିବ। ୨୦୧୮ ନଭେମ୍ବର ୬ରେ ମୁଖ୍ୟମନ୍ତ୍ରୀ ଏହି ସେବାକୁ ଉଦ୍ଘାଟନ କରି ସର୍ବସାଧାରଣଙ୍କ ଉଦ୍ଦେଶ୍ୟରେ ଉତ୍ସର୍ଗୀକୃତ କରିଥିଲେ। ପ୍ରଥମ ବାର୍ଷିକ ଉତ୍ସବ ଜୟଦେବ ଭବନରେ ପାଳନ କରାଯାଇଥିବାବେଳେ ବାର୍ଷିକ ଉତ୍ସବ କୋଭିଡ ଯୋଗୁଁ ପାଳନ କରାଯିବ ନାହିଁ ବୋଲି କ୍ରୁଟ୍ ପକ୍ଷରୁ ସୂଚନା ଦିଆଯାଇଛି।
ଦୁଇବର୍ଷ ଭିତରେ ମୋ ବସ୍ସେବା ସମସ୍ତଙ୍କ ଦ୍ବାରା ଆଦୃତ ହୋଇ ପାରିଛି। ସହରରେ ୨୦୦ଟି ମୋ ବସ୍ ଚଳାଚଳ କରୁ ଥିବାବେଳେ ନଭେମ୍ବର ୨୦୧୮ରେ ୨,୪୮,୯୫୯ ଯାତ୍ରୀଙ୍କୁ ସେବା ପ୍ରଦାନ କରିଥିଲା। କାଳକ୍ରମେ ଯାତ୍ରୀ ସଂଖ୍ୟା ବୃଦ୍ଧି ପାଇଁ ଏକ ଲକ୍ଷରେ ପହଞ୍ଚି ଥିଲା। ଯାତ୍ରୀଙ୍କ ଦାବିକୁ ଲକ୍ଷ୍ୟ କରି କ୍ରୁଟ୍ କର୍ତ୍ତୃପକ୍ଷ ରୁଟ୍ ସଂଖ୍ୟା ମଧ୍ୟ ବୃଦ୍ଧି କରିଥିଲେ। ଏପରିକି ୨୦୧୯ ଜାନୁଆରୀରେ ମୋ ବସ୍ ୮,୫୧,୩୧୯ ଯାତ୍ରୀଙ୍କୁ ସେବା ପ୍ରଦାନ କରିବାରେ ସକ୍ଷମ ହୋଇଥିଲା। ଯାତ୍ରୀ ସଂଖ୍ୟା ବଢ଼ିବା ଦ୍ବାରା ଜାନୁଆରୀ ୨୦୨୦ରେ ୧୨,୦୨,୨୦୫ ଜଣ ଯାତ୍ରୀ ମୋ ବସ୍ରେ ଯାତାୟାତ କରିଥିଲେ।
ମାର୍ଚ୍ଚରେ କରୋନା ଫଳରେ ଲକ୍ଡାଉନ୍ ଏବଂ ସଟ୍ଡାଉନ୍ ଘୋଷଣା କରାଯିବା ଦ୍ବାରା ମୋ ବସ୍ ସେବାକୁ ବନ୍ଦ କରି ଦିଆଯାଇଥିଲା। କଟକଣା କୋହଳ ହେବାପରେ ମୋ ବସ୍ ଚଳାଚଳ ଆରମ୍ଭ କରିଥିଲା। କରୋନା ଭୟ ସତ୍ତ୍ବେ ଏବେ ମୋ ବସ୍ ଦୈନିକ ୨୫ ହଜାର ଯାତ୍ରୀଙ୍କୁ ସେବା ଯୋଗାଇ ଦେଉଛି। ପୁଣି ଯାତ୍ରୀଙ୍କ ଚାହିଦାକୁ ବିଚାର କରି ୧୭ଟି ରୁଟ୍ରେ ୧୦୯ ବସ୍ ଚଳାଚଳ ଆରମ୍ଭ କରିଛି। ଭୁବନେଶ୍ବରରୁ ପୁରୀ ଏବଂ କୋଣାର୍କକୁ ମଧ୍ୟ ବସ୍ସେବା ଆରମ୍ଭ ହୋଇଛି। କ୍ରୁଟ୍ ମହାପ୍ରବନ୍ଧକ ଦୀପ୍ତି ମହାପାତ୍ର ଯାତ୍ରୀଙ୍କୁ ଉତ୍କୃଷ୍ଟ ସେବା ପ୍ରଦାନ ଏକ ମାତ୍ର ଲକ୍ଷ୍ୟ ବୋଲି କହିଛନ୍ତି।
Comments are closed.