ବିଜେପିରେ ସାମିଲ ହେବେ ମିଥୁନ ଚକ୍ରବର୍ତ୍ତୀ : ମାର୍ଚ୍ଚ ୭ରେ ପ୍ରଧାନମନ୍ତ୍ରୀ ମୋଦୀଙ୍କ ସମାବେଶ  

କଲକତା : ବରିଷ୍ଠ ଅଭିନେତା ତଥା ପୂର୍ବତନ ରାଜ୍ୟସଭା ସଦସ୍ୟ ମିଥୁନ ଚକ୍ରବର୍ତ୍ତୀଙ୍କ ବିଜେପିରେ ଯୋଗଦେବା ନେଇ ପୁଣି କଳ୍ପନା ଜଳ୍ପନା ବୃଦ୍ଧି ପାଇବାରେ ଲାଗିଛି। ମାର୍ଚ୍ଚ ୭ ରବିବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ରାଲି ଅବସରରେ ସେ ଦଳରେ ଯୋଗଦେବେ ବୋଲି ଜଣାପଡିଛି। ମିଥୁନ ଦା’ ପୂର୍ବରୁ ଆରଏସଏସ ମୁଖ୍ୟ ମୋହନ ଭଗବତଙ୍କୁ ସାକ୍ଷାତ କରିଛନ୍ତି ।

ପଶ୍ଚିମବଙ୍ଗର ନିର୍ବାଚନ ଯୁଦ୍ଧରେ ଜିତିବା ପାଇଁ ନିଜର ପ୍ରବଳ ଶକ୍ତି ବ୍ୟବହାର କରୁଥିବା ବିଜେପି ମଧ୍ୟ ପ୍ରସିଦ୍ଧ ଅଭିନେତା ମିଥୁନ ଚକ୍ରବର୍ତ୍ତୀଙ୍କ ସମର୍ଥନ ପାଇପାରେ। ମିଥୁନ ଦା’ ପୁଣି ଥରେ ବିଜେପି ଯିବେ ବୋଲି କଳ୍ପନା ଜଳ୍ପନା ତୀବ୍ର ହୋଇଛି। ଏ ସଂପର୍କରେ ବିଜେପି ସାଂସଦ ତଥା ପଶ୍ଚିମବଙ୍ଗ ବିଜେପି ଉପାଧ୍ୟକ୍ଷ ଅର୍ଜୁନ ସିଂହ ଶୁକ୍ରବାର କହିଛନ୍ତି – ଯଦି ମିଥୁନ ଚକ୍ରବର୍ତ୍ତୀ ଆସନ୍ତି ତେବେ ଏହା ଉଭୟ ବଙ୍ଗଳା ଏବଂ ଆମ ଦଳ ପାଇଁ ଭଲ ହେବ । ଯଦି ସେ ପ୍ରଧାନମନ୍ତ୍ରୀ ମୋଦୀଙ୍କ ରାଲିରେ ବିଜେପିରେ ଯୋଗ ଦିଅନ୍ତି ତେବେ ବଙ୍ଗଳାବାସୀ ଖୁସି ହେବେ। ସୂଚନାଯୋଗ୍ୟ ମାର୍ଚ୍ଚ ୭ରେ ପ୍ରଧାନମନ୍ତ୍ରୀ ମୋଦୀ ବଙ୍ଗଳାରେ ଏକ ରାଲି କରିବାକୁ ଯାଉଛନ୍ତି। ଏହି ରାଲିରେ ମିଥୁନ ଦା’ ବିଜେପିରେ ସାମିଲ ହେବାକୁ ନେଇ ଚର୍ଚ୍ଚା ହେଉଛି।

 ତୃଣମୂଳ କଂଗ୍ରେସର ରାଜ୍ୟସଭା ସଦସ୍ୟ ଥିଲେ ମିଥୁନ ଦା’

ବଲିଉଡର ବିଶିଷ୍ଟ ଅଭିନେତା ମିଥୁନ ଚକ୍ରବର୍ତ୍ତୀ ପଶ୍ଚିମ ବଙ୍ଗରେ ଶାସକ ମମତା ବାନାର୍ଜୀଙ୍କ ପାର୍ଟିରୁ ରାଜ୍ୟସଭା ସଦସ୍ୟ ଥିଲେ। ପଶ୍ଚିମବଙ୍ଗ ନିର୍ବାଚନରେ ​​ଜିତିବା ପାଇଁ ରାଜ୍ୟର ବରିଷ୍ଠ ନେତା ତଥା ଅଭିନେତାମାନଙ୍କୁ ନିଜ ପକ୍ଷକୁ ଆଣି ବିଜେପି ନିଜର ଶକ୍ତି ବୃଦ୍ଧି କରୁଛି । ସେ ‘ସୋନାର ବଙ୍ଗଲା’ ପାଇଁ ନିଜ ମିଶନ ପାଇଁ କୌଣସି ସୁଯୋଗ ଛାଡିବାକୁ ଚାହୁଁନାହାଁନ୍ତି ।

ସୂଚନା ଯେଗ୍ୟ, ୨୦୨୧ ପଶ୍ଚିମବଙ୍ଗ ବିଧାନସଭା ନିର୍ବାଚନ ଆଠଟି ପର୍ଯ୍ୟାୟରେ ଅନୁଷ୍ଠିତ ହେବାକୁ ଯାଉଛି। ଏହା ଚଳିତ ମାସ ୨୭ ତାରିଖରୁ ଆରମ୍ଭ ହେବ। ବିଜେପି ରାଜ୍ୟରେ ପ୍ରଥମ ଥର ପାଇଁ ଏବଂ ମମତା ବାନାର୍ଜୀ ତୃତୀୟ ଥର ପାଇଁ କ୍ଷମତାକୁ ଫେରିବା ପାଇଁ କଠିନ ପରିଶ୍ରମ କରୁଛନ୍ତି ।

Comments
Loading...