କୋରାପୁଟ: ଗୋଟିଏ ଦିନରେ ୧୬୭୨ କିଲୋ ଗଞ୍ଜେଇ ସହ ୧୦ ଗାଡ଼ି ଜବତ, ୨୬ ଗିରଫ

କୋରାପୁଟ ଏସପି ମୁକେଶ ଭାମୁ ଆରମ୍ଭ କରିଛନ୍ତି ‘ମିଶନ କ୍ଲିନ୍’ । ଜିଲାରେ ଗଞ୍ଜେଇ କାରବାରର ମୂଳୋତ୍ପାଟନ କରିବା ନିମନ୍ତେ ଏହି କାର୍ଯ୍ୟକ୍ରମରେ ଗୁରୁବାର ପୁଲିସକୁ ମିଳିଛି ବିପୁଳ ସଫଳତା । କେବଳ ଗୋଟିଏ ଦିନରେ ପୁଲିସ ୧୦ରୁ ଅଧିକ ଗାଡ଼ି ସହ ୧୭୫୦ କିଲୋ ଗଞ୍ଜେଇ ଜବତ କରିଛି । ଏହି ଘଟଣାରେ ପୁଲିସ ୨୬ ଜଣଙ୍କୁ ଗିରଫ କରିଛି ବୋଲି ଏସପି ଶ୍ରୀ ଭାମୁ ସୂଚନା ଦେଇଛନ୍ତି ।


ଗୁରୁବାର ଗିରଫ ହୋଇଥିବା ୨୬ ଜଣଙ୍କ ମଧ୍ୟରେ ଗାଁ ଗାଁରୁ ଗଞ୍ଜେଇ ସଂଗ୍ରହ କରୁଥିବା ବ୍ୟକ୍ତିଙ୍କ ସହ କିଛି ମଧ୍ୟସ୍ଥି ଓ ବ୍ୟବସାୟୀ ରହିଛନ୍ତି ।  କୋରାପୁଟ ଜିଲ୍ଲା ଇତିହାସରେ ପ୍ରଥମ ଥର ପାଇଁ ଗୋଟିଏ ଦିନରେ ସମୂହ ଚଢ଼ାଉ କରାଯାଇ ଏତେ ପରିମାଣର ଗଞ୍ଜେଇ ଜବତ କରାଯାଇଛି ବୋଲି  ଆରକ୍ଷୀ ଅଧିକ୍ଷକ ଭାମୁ ଜଣାଇଛନ୍ତି ।  ତୃଣମୂଳ ସ୍ତରରେ କାର୍ଯ୍ୟ କରୁଥିବା ପୋଲିସ କର୍ମଚାରୀଙ୍କ ପାଇଁ ଏହା ସମ୍ଭବ ହୋଇଛି ବୋଲି ସେ କହିଛନ୍ତି ।

ଗତ ଦଶମାସ ମଧ୍ୟରେ ଜିଲ୍ଲାରେ ପୋଲିସ ଦ୍ୱାରା ୫୫୦ ଏକର ଜମିରେ ରହିଥିବା ୧୯ ହଜାର ଗଞ୍ଜେଇ ଗଛ ନଷ୍ଟ କରାଯିବା ସହ ଚୋରା ଚାଲାଣ କରାଯାଉଥିବା ୫୭ ଲକ୍ଷ ଟଙ୍କାର ଗଞ୍ଜେଇ ଜବତ କରାଯାଇ ପାରିଛି ବୋଲି ଶ୍ରୀ ଭାମୁ କହିଛନ୍ତି । ଏହି ସମୟ ମଧ୍ୟରେ ମୋଟ ୧୧୨ଟି ଗଞ୍ଜେଇ ବୋଝେଇ ଗାଡ଼ି ଜବତ ହୋଇଛି ଓ ୨୦୩ ଜଣ ଗିରଫ ହୋଇଛନ୍ତି ବୋଲି ଶ୍ରୀ ଭାମୁ କହିଛନ୍ତି ।

Comments
Loading...