ଟିକା ନେଇଥିବା ମନ୍ତ୍ରୀ କରୋନା ପଜିଟିଭ୍‌

କରୋନାମୁକ୍ତ ହେବାକୁ ଟିକା ନେଇଥିଲେ ହରିୟାଣାର ସ୍ବାସ୍ଥ୍ୟମନ୍ତ୍ରୀ ଅନିଲ ଭିଜ୍‌। କିନ୍ତୁ ଟିକା ନେବା ପରେ ସେ କରୋନାରେ ଆକ୍ରାନ୍ତ ହୋଇଛନ୍ତି। ଶନିବାର ଏହି ସୂଚନା ମିଳିଛି। ଖୋଦ୍‌ ଅନିଲ ଭିଜ୍‌ ନିଜେ ଏ ନେଇ ଟ୍ବିଟ୍‌ କରି ସୂଚନା ଦେଇଛନ୍ତି। ଚିକିତ୍ସା ପାଇଁ ସେ ଅମ୍ବାଲାସ୍ଥିତ ଏକ ହସ୍ପିଟାଲରେ ଭର୍ତ୍ତି ହୋଇଛନ୍ତି।

Image Courtesy: NDtv

ଭିଜ୍‌ ଗତ ନଭେମ୍ବର ୨୦ ତାରିଖରେ ଟିକା ନେଇଥିଲେ। ଭାରତ ବାୟୋଟେକ୍‌ ଦ୍ବାରା ପ୍ରସ୍ତୁତ ଟିକା କୋଭାକ୍ସିନ ତାଙ୍କୁ ଦିଆଯାଇଥିଲା। ସ୍ଵେଚ୍ଛାକୃତ ଭାବେ ସେ ଏହି ଟିକା ନେଇଥିଲେ। କିନ୍ତୁ ଏ​‌ବେ ସେ ପୁଣି କରୋନାରେ ଆକ୍ରାନ୍ତ ହୋଇଛନ୍ତି।

କରୋନା ମହାମାରୀ ଆରମ୍ଭ ହେବା ପରେ ବହୁ କମ୍ପାନୀ ଟିକା ପ୍ରସ୍ତୁତିରେ ଲାଗିପଡ଼ିଛନ୍ତି। କିଛି କମ୍ପାନୀ ଟିକା ପ୍ରସ୍ତୁତ କରିସାରିଥିବା ଦାବି କରିଛନ୍ତି। କୋଭାକ୍ସିନ, ଫାଇଜର, ମୋଡେର୍ନା ଭଳି ଅନେକ ଟିକା ପ୍ରସ୍ତୁତ ହେବା ସହିତ ଏହାର ଟ୍ରାଏଲ୍‌ ଚାଲିଛି। ବ୍ରିଟେନ ଫାଇଜର ଟିକାକୁ ନିଜ ଦେଶରେ ଅନୁମତି ଦେଇଛି। ୨/୪ ଦିନ ପରେ ଏହି ଦେଶରେ ଲୋକଙ୍କୁ ଟିକାକରଣ କରାଯିବ। କିନ୍ତୁ ଅନିଲ୍‌ ଭିଜ୍‌ଙ୍କ ଘଟଣା ପରେ ଟିକାର ପ୍ରଭାବଶାଳୀତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।

ଭାରତରେ କରୋନା ରୋଗୀ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି। ବର୍ତ୍ତମାନ ସୁଦ୍ଧା ୯୬ ଲକ୍ଷରୁ ଅଧିକ ଲୋକ କରୋନାରେ ଆକ୍ରାନ୍ତ ହୋଇସାରିଲେଣି। ୧ ଲକ୍ଷ ୪୦ ହଜାରରୁ ଅଧିକ ସଂକ୍ରମିତଙ୍କ ମୃତ୍ୟୁ ଘଟିଛି। ଦେଶରେ ସୁସ୍ଥ ହାର ୯୩ ପ୍ରତିଶତରୁ ଅଧିକ ରହିଥିଲେ ହେଁ ଦେଶବାସୀ କରୋନା ଟିକାକୁ ଏକପ୍ରକାର ଚାହିଁ ରହିଛନ୍ତି। କରୋନା ପାଇଁ ଗତ ଶୁକ୍ରବାର ଅନୁଷ୍ଠିତ  ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀ ଯୋଗଦେଇ କିଛି ସପ୍ତାହ ମଧ୍ୟରେ ଟିକା ଭାରତରେ ଉପଲବ୍ଧ ହେବ ବୋଲି କହିଥିଲେ। ଫଳରେ ଦେଶବାସୀ କିଛିଟା ଆଶ୍ଵସ୍ତ ହୋଇଛନ୍ତି।

Comments
Loading...