କାଶ୍ମୀର ଉପତ୍ୟକା ଛାଡୁଛନ୍ତି ପ୍ରବାସୀ ଶ୍ରମିକ

ଶ୍ରୀନଗର: ଜମ୍ମୁ କାଶ୍ମୀରରେ ଅଣ କାଶ୍ମୀରୀଙ୍କ ଉପରେ ଲଗାତର ଆତଙ୍କବାଦୀ ଆକ୍ରମଣ ହେବା ଏବଂ ସେଥିରେ ଅନେକ ମୃତାହତ ହେବା ପରେ ଏବେ ଦେଶର ଅନ୍ୟାନ୍ୟ ରାଜ୍ୟରୁ ଏଠାକୁ ଆସି ଗୁଜୁରାଣ ମେଣ୍ଟାଉଥିବା ଶ୍ରମିକମାନେ କାଶ୍ମୀର ଉପତ୍ୟକା ଛାଡିବା ଆରମ୍ଭ କରିଛନ୍ତି । ସୋମବାର ସକାଳେ ରାଜସ୍ଥାନ, ବିହାର ଏବଂ ଅନ୍ୟାନ୍ୟ ରାଜ୍ୟର ବହୁ ଶ୍ରମିକ ସେମାନଙ୍କ ପରିବାର ସଦସ୍ୟଙ୍କ ସହିତ ନିଜ ରାଜ୍ୟକୁ ଫେରିବା ଆରମ୍ଭ କରିଛନ୍ତି । ରାଜସ୍ଥାନର ଜଣେ ଶ୍ରମିକ କହିଛନ୍ତି ଯେ, ଏଠାରେ ପରିସ୍ଥିତି ଅଧିକ ଖରାପ ହେବାରେ ଲାଗିଛି । ସେମାନେ କାମଧନ୍ଦା କରି ପେଟ ପୋଷିବାକୁ ଏଠାକୁ ଆସିଥିଲେ । କିନ୍ତୁ ଏବେ ସେମାନେ ଆତଙ୍କିଙ୍କର ନିର୍ଦ୍ଦିଷ୍ଟ ଭାବରେ ଅଣ କାଶ୍ମୀରୀଙ୍କ ଉପରେ ଆକ୍ରମଣରେ ଅତି ମାତ୍ରାରେ ଭୟଭୀତ ହୋଇଯାଇଛନ୍ତି । ସେମାନଙ୍କ ସହିତ ପରିବାର ସଦସ୍ୟ ରହୁଥିବାରୁ ସେମାନଙ୍କୁ ନେଇ ସେମାନେ ଏବେ ନିଜ ଜନ୍ମସ୍ଥାନକୁ ଫେରିଯାଉଛନ୍ତି । ସୂଚନାଯୋଗ୍ୟ ଯେ ପ୍ରବାସୀ ଶ୍ରମିକମାନେ ତୁରନ୍ତ କାଶ୍ମୀର ଉପତ୍ୟକା ଛାଡି ଚାଲିଯିବାକୁ ପାକିସ୍ତାନ ସମର୍ଥିତ ଆତଙ୍କି ସଂଗଠନ ଲସ୍କର ଇ ତଇବା ଦ୍ୱାରା ପରିଚାଳିତ ୟୁନାଇଟେଡ ଲିବିରେସନ ଫ୍ରଣ୍ଟ (ୟୁଏଲଏଫ) ପକ୍ଷରୁ ଚେତାବନୀ ଦିଆଯାଇଛି ।

Comments are closed.