ମେରଠ: ଉତ୍ତରପ୍ରଦେଶ ମେରଠ ର ଚୌଧରୀ ଚରଣ ସିଂହ କାମ୍ବଡ ରାସ୍ତାରେ ଗତ କିଛି ଦିନ ଧରି ଦୁର୍ଘଟଣା ଘଟୁଥିବା ବେଳେ ମଙ୍ଗଳବାର ସକାଳେ ପୁଣି ଏକ ଅଘଟଣ ଘଟିଛି । ଏହି ଅଘଟଣରେ ୩ ଜଣଙ୍କ ମୃତ୍ୟୁ ଘଟିଥିବା ବେଳେ ଅନେକ ଜଣ ବର୍ତ୍ତମାନ ସୁଦ୍ଧା ନିଖୋଜ ଥିବା ଜଣାପଡିଛି। ଘଟଣାସ୍ଥଳରେ ପୁଲିସ ଓ ଉଦ୍ଧାରକାରୀ ଦଳ ପହଞ୍ଚିଛନ୍ତି ।
ସୂଚନାଯୋଗ୍ୟ, ଏହି ଦୁର୍ଘଟଣା ମେରଠ ର ସଟେ ସରଧନା ନିକଟରେ ହୋଇଛି । ସରଧନା ଅନ୍ତର୍ଗତ ସଲାୱା ଗ୍ରାମରେ ରହୁଥିବା ହୁକୁମସିଂହଙ୍କ ପରିବାର ଏକ ଉତ୍ସବରେ ଯୋଗ ଦେବା ପାଇଁ କାରରେ ଅତରୌଲି ଗ୍ରାମକୁ ଯାଉଥିଲେ । ରାସ୍ତାରେ କାରଟି ଭାରସାମ୍ୟ ହରାଇ ନିକଟସ୍ଥ ଏକ କେନାଲକୁ ଓଲଟି ପଡିଥିଲା। ଖବର ପାଇ ଘଟଣାସ୍ଥଳରେ ପୁଲିସ ପହଞ୍ଚି କେନାଲୀରୁ ୩ ଜଣଙ୍କୁ ଉଦ୍ଧାର କରି କଙ୍କରଖେଡାର କୈଲାଶ ହସ୍ପିଟାଲରେ ଭର୍ତ୍ତି କରିଥିଲା। ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ଜଣେ ମହିଳାଙ୍କ ସମେତ ଏକ ଶିଶୁକୁ କେନାଲ ମଧ୍ୟରୁ ସୁରକ୍ଷିତ ଭାବରେ ଉଦ୍ଧାର କରାଯାଇ ଥିବା ପୁଲିସ କହିଛି । ବର୍ତ୍ତମାନ ସୁଦ୍ଧା କେନାଲରେ ଏକ ଦମ୍ପତ୍ତି ନିଖୋଜ ରହିଥିବା ଜଣାପଡିଛି । ଘଟଣାସ୍ଥଳରେ ଖୋଜାଘୋଜି ଜାରି ରହିଛି ।