ନୂଆଦିଲୀ : କରୋନ ସଂକ୍ରମଣ ବିଶ୍ୱର ଅଧିକାଂଶ ଦେଶକୁ କବଳିତ କରିଥିବା ବେଳେ ଏହାର ପ୍ରତିକାର ପାଇଁ ଅନେକ ଦେଶ ଲାଗିପଡିଛନ୍ତି। କରୋନା ଭୂତାଣୁକୁ ପ୍ରତିହତ କରିପାରୁଥିବା ଔଷଧର ପ୍ରଥମ ପରୀକ୍ଷଣ ଅସଫଳ ହୋଇଥିବା ପ୍ରକାଶ କରାଯିବା ପରେ ଏହାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ଅନ୍ୟ ପକ୍ଷରେ ଏହି ପରୀକ୍ଷଣକୁ ଭୁଲ ଭାବେ ଦର୍ଶାଇବାକୁ ଉଦ୍ୟମ ହେଉଥିବା କିଛି ବିଶେଷଜ୍ଞ ଅଭିଯୋଗ କରିଛନ୍ତି।
କରୋନା ସଂକ୍ରମିତଙ୍କୁ ଭଲ କରିବା ପାଇଁ ଆଂଟିଭାଇରାଲ ରେମଡେସିବିର ଔଷଧ ଦିଆଯାଉଥିବା ବେଳେ ଏହାର ସୁଫଳ ଦେଖାଯାଇଥିଲା। ମାତ୍ର ଏହି ଔଷଧ କରୋନା ରୋଗୀଙ୍କ ପାଇଁ ବ୍ୟବହାର ଯୋଗ୍ୟ କି ନାହିଁ ଏହା ଉପରେ ପରୀକ୍ଷା ଚାଲିଥିଲା। ପ୍ରଥମ ପରୀକ୍ଷଣରେ ଏହା ଅସଫଳ ହୋଇଥିବା ଜଣାପଡିଲା। ଚୀନ ଦ୍ୱାରା କରାଯାଇଥିବା ଏହି ପରୀକ୍ଷଣର ରିପୋର୍ଟ ବିଶ୍ୱ ସ୍ୱାସ୍ଥ୍ୟ ସଂଗଠନ ପ୍ରକାଶ କରିବା ପରେ କରୋନାକୁ ରୋକିବାକୁ କରାଯାଉଥିବା ଏହି ଆଶା ମଉଳି ଯାଇଛି। ଏହି ରିପୋର୍ଟକୁ ନେଇ ଏବେ ବିଭିନ୍ନ ମହଲରେ ପ୍ରଶ୍ନବାଚୀ ସୃଷ୍ଟି ହେବାପରେ ବିଶ୍ୱ ସ୍ୱାସ୍ଥ୍ୟ ସଂଗଠନ ଏହାକୁ ହଟାଇ ନେଇଛି। ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି। ଭୁଲରେ ଏଭଳି ରିପୋର୍ଟ ପ୍ରକାଶିତ ହୋଇଥିବା ବିଶ୍ୱ ସ୍ୱାସ୍ଥ୍ୟ ସଂଗଠନ କହିଥିବା ବେଳେ ଗିଲିଡ ନାମକ କମ୍ପାନୀ ରିପୋର୍ଟକୁ ଖାରଜ କରିଛି। ଏହା ଉପରେ ଏବେ ବି ପରୀକ୍ଷଣ ଚାଲିଛି ବୋଲି କମ୍ପାନୀ ପକ୍ଷରୁ କୁହାଯାଇଛି। ଅନ୍ୟପକ୍ଷରେ ଆମେରିକାର ହେଲ୍ଥ ନ୍ୟୁଜ ୱେବସାଇଟ ସ୍ଟାଟ ଅନୁସାରେ ଏହି ଔଷଧ କରୋନା ସଂକ୍ରମିତ ରୋଗୀଙ୍କୁ ଭଲ କରିବାରେ ସାହାଯ୍ୟ କରୁଛି। ମାତ୍ର ଏହାର ଅଧିକ ପରୀକ୍ଷଣର ଆବଶ୍ୟକତା ଥିବା ୱେବସାଇଟ ଦର୍ଶାଇଛି।
Comments are closed.