କନ୍ଧମାଳ ମାଟ୍ରିକ ଟପର ମିନାକ୍ଷୀଙ୍କୁ ୧ ଲକ୍ଷ ଟଙ୍କାର ସହାୟତା

ଫୁଲବାଣୀ/ବାଲିଗୁଡା: କନ୍ଧମାଳ ଜିଲାର ମାଟ୍ରିକ ତାପର ମିନାକ୍ଷୀ ମଲିକଙ୍କୁ ଆଜି ଭୁବନେଶ୍ୱର ସ୍ଥିତ କୁଇଭାଷା ସାହିତ୍ୟ ଓ ସଂସ୍କୃତି ପରିଷଦ ପକ୍ଷରୁ ୧ ଲକ୍ଷ ଟଙ୍କାର ସହାୟତା ପ୍ରଦାନ କରାଯାଇଛି। ପରିଷଦର ସଭାପତି ପ୍ରତାପ ପ୍ରଧାନ ଓ ସଦସ୍ୟ ପ୍ରଦୀପ କହଁର ଓ ଅନ୍ୟମାନେ ଦୁର୍ଗମ ଅଞ୍ଚଳ ପେନାକେତାରେ ବାସବାସ କରୁଥିବା ମିନାକ୍ଷୀର ଘରକୁ ଯାଇ ପୁଷ୍ପଗୁଛ ଓ ଉପଢୌକନ ଦେଇ ସମ୍ବର୍ଦ୍ଧନା କରିବା ସହ ମିନାକ୍ଷୀଙ୍କ ଆଗାମି ଭବିଷ୍ୟତରେ ଉଚ୍ଚ ଶିକ୍ଷା ନିମନ୍ତେ ଆର୍ଥିକ ସହାୟତା କରିଛନ୍ତି।

ଆର୍ଥିକ ସହାୟତା ଆକାରରେ ଏକ ଲକ୍ଷ ଦଶ ହଜାର ଏକ ଶହ ଏକ ଟଙ୍କାର ଏକ ଚେକ ପ୍ରଦାନ କରାଯାଇଛି। ମିନାକ୍ଷୀ ଓ ତାଙ୍କ ପରିବାର ଏହି ଆର୍ଥିକ ସହାୟତାରେ ବେଶ୍‍ ଖୁସିବ୍ୟକ୍ତ କରିଛନ୍ତି। ଏହି ଅବସରରେ ମିନାକ୍ଷୀ କହିଛନ୍ତି , ସରକାର ଓ ଏମିତି କିଛି ଅନୁଷ୍ଠାନ ଏବଂ ବ୍ୟକ୍ତିମାନଙ୍କ ମୋ ପାଠପଢା ପ୍ରତି ସହାୟତା କରନ୍ତି ତେବେ ଆଗାମି ଦିନରେ ମୁଁ ଭଲ ପାଠପଢି ଡାକ୍ତର ହୋଇ ଲୋକଙ୍କ ସେବା କରିବି। ପୂର୍ବରୁ ମିନାକ୍ଷୀଙ୍କୁ ଉଚ୍ଛ ଶିକ୍ଷା ପାଇଁ ମଧ୍ୟ କିଟ୍‍ ଓ କିସ୍‍ ଅନୁଷ୍ଠାନର ମୁଖ୍ୟ ତଥା କନ୍ଧମାଳ ସାଂସଦ ଡ଼.ଅଚ୍ୟୁତ ସାମନ୍ତ ମଧ୍ୟ ଘୋଷଣା କରିସାରିଛନ୍ତି।

ପେନାକେତା ଗ୍ରାମର ଗରିବ ଆଦିବାସୀ ଝିଅ ମିନାକ୍ଷୀ ମଳିକି ତୁମୁଡିବନ୍ଧ ବ୍ଲକର ଜଲୋପଟା ସ୍ଥିତ ସରକାରୀ ଉଚ୍ଚ ବାଳିକା ବିଦ୍ୟାଳୟ( ଆଶ୍ରମ)ରେ ପାଠପଢି ଚଳିତ ବର୍ଷ ମାଟ୍ରିକ ପରୀକ୍ଷାରେ ୯୨.୬୬ ପ୍ରତିଶତ ୫୫୬ ମାର୍କ ରଖି କନ୍ଧମାଳ ଜିଲ୍ଲାରେ ଟପ୍ଟର ହୋଇଛନ୍ତି।