କ୍ବାରେଣ୍ଟାଇନ ପରେ ୧୫ତମ ଦିନରେ ବାହାରିଲା କରୋନା ଲକ୍ଷଣ

ଚଣ୍ଡୀଗଡ଼: କରୋନା ଭୂତାଣୁ ସଂକ୍ରମଣ ସନ୍ଦେହରେ ୧୪ ଦିନ ଧରି କ୍ବାରେଣ୍ଟାଇନରେ ରହିସାରିବା ପରେ ଏହାର ଅର୍ଥ ନୁହେଁ ଯେ ସଂକ୍ରମିତ ହେବାର ଆଶଙ୍କା ଦୂର ହୋଇଗଲା। କାରଣ ଚଣ୍ଡୀଗଡ଼ରେ ଏଭଳି ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯେଉଁଥିରେ ଜଣେ ଯୁବକ ୧୪ ଦିନ କ୍ବାରେଣ୍ଟାଇନରେ ରହିବା ପରେ ୧୫ତମ ଦିନରେ ତାଙ୍କଠାରେ କରୋନା ଲକ୍ଷଣ ଦେଖିବାକୁ ମିଳିଛି। ତାଙ୍କ ରକ୍ତ ନମୁନା ପରୀକ୍ଷା ପରେ ତାହା କରୋନା ପଜିଟିଭ ବାହାରିଛି, ଯାହାକୁ ନେଇ ଏବେ ସରକାର ଏବଂ ଡାକ୍ତରଙ୍କ ଚିନ୍ତା ବଢ଼ିଯାଇଛି।

ଆକ୍ରାନ୍ତ ୨୨ ବର୍ଷୀୟ ଯୁବକ ଗତ ମାର୍ଚ୍ଚ ୧୧ରେ ଦୁବାଇରୁ ଚଣ୍ଡୀଗଡ଼ ଫେରିଥିଲେ। ୧୪ ଦିନ ଯାଏ ଘରେ କ୍ବାରେଣ୍ଟାଇନରେ ରହିଲେ। କିନ୍ତୁ ହଠାତ୍‌ ୧୫ତମ ଦିନରେ ତାଙ୍କୁ ଜ୍ଵର ହୋଇଥିଲା। ରକ୍ତ ପରୀକ୍ଷା ପରେ ସେ କରୋନା ଭୂତାଣୁରେ ଆକ୍ରାନ୍ତ ହୋଇଥିବା ଜଣାପଡ଼ିଛି। ଏହା ଜଣାପଡ଼ିବା ପରେ ତାଙ୍କ ପରିବାର ଲୋକଙ୍କ ସହିତ ଡାକ୍ତରମାନେ ବି ଚକ୍କିତ ହୋଇଛନ୍ତି।

ସ୍ବାସ୍ଥ୍ୟ ବିଭାଗ ପକ୍ଷରୁ ଏ ସମ୍ପର୍କରେ କେନ୍ଦ୍ର ସରକାରଙ୍କୁ ସୂଚନା ଦିଆଯାଇଛି। ଏହି ମାମଲା ସାମ୍ନାକୁ ଆସିବା ପରେ କ୍ବାରେଣ୍ଟାଇନ ସମୟସୀମା ବିତିଗଲେ ବି କରୋନା ସଂକ୍ରମଣ ହେବ ନାହିଁ ବୋଲି ଭାବିବା ଭୁଲ ବୋଲି କୁହାଯାଉଛି। ସ୍ଥାନୀ ସରକାରୀ ମେଡିକାଲ କଲେଜ ଏବଂ ହସ୍ପିଟାଲର ନିର୍ଦେଶକ ଡା. ବି.ଏସ. ଚୌହ୍ବାନ କହିଛନ୍ତି ଯେ, ଭାରତୀୟ ଆୟୁର୍ବିଜ୍ଞାନ ଅନୁସନ୍ଧାନ ପରିଷଦ ନିୟମ ଅନୁସାରେ କ୍ବାରେଣ୍ଟାଇନ ସମୟସୀମା ୧୪ ଦିନ ଧାର୍ଯ୍ୟ ହୋଇଛି। ଚଣ୍ଡୀଗଡ଼ ମାମଲା ପଦାକୁ ଆସିବା ପରେ ରୋଗୀଙ୍କ ବିଦେଶ ଯାତ୍ରା ସହିତ ଅନ୍ୟ ତଥ୍ୟକୁ ଯାଞ୍ଚ କରାଯିବ। ଏହା ସହିତ କ୍ବାରେଣ୍ଟାଇନ ସମୟସୀମା ଉପରେ ମଧ୍ୟ ବିଚାର କରିବାକୁ ପଡ଼ିବ।

Comments
Loading...