ନିଜ ଟାଙ୍ଗିଆ ଚୋଟରେ ନିଜର ମୃତ୍ୟୁ

ଫୁଲବାଣୀ: ନିଜ ଟାଙ୍ଗିଆ ଚୋଟରେ ନିଜର ମୃତ୍ୟୁ। ଏଭଳି ଏକ ଅଭାବନୀୟ ଘଟଣା ଘଟିଛି କନ୍ଧମାଳ ଜିଲା ଖଜୁରିପଡା ଥାନା ଅନ୍ତର୍ଗତ ଗୁଦାରୀ ପଞ୍ଚାୟତ ମଲ୍ଲିକ ସାହିରେ।

ଗ୍ରାମର ଗୋବିନ୍ଦ ଚନ୍ଦ୍ର ମଲ୍ଲିକ ଆଜି ସକାଳେ କାଠ ସଂଗ୍ରହ ପାଇଁ ଗାଁ ପାଖ ଜଙ୍ଗଲକୁ ଯାଇଥିଲେ। କାଠ ସଂଗ୍ରହ କରି ଘରକୁ ଫେରିବା ବାଟରେ ସେ ଅସାବଧାନତା ବଶତଃ ଝୁଣ୍ଟି ପଡ଼ିଥିଲେ। ଫଳରେ କାଠ ବୋଝାରେ ଲାଗିଥିବା ଟାଙ୍ଗିଆଟି ତାଙ୍କ ବେକରେ ଲାଗି କଟି ଯାଇଥିଲା। ସେଠାରୁ ସେ କାଠ ତଳେ ପକାଇ ନିଜେ ପିନ୍ଧିଥିବା ଗାମୁଛାରେ ବେକକୁ ବାନ୍ଧି ଘରକୁ ଫେରିଥିଲେ। ଏହା ଦେଖି ତାଙ୍କ ପୁତୁରାମାନେ ତାଙ୍କୁ ସଙ୍ଗେ ସଙ୍ଗେ ଫୁଲବାଣୀ ମୁଖ୍ୟ ଡାକ୍ତରଖାନାକୁ ନେଇଥିଲେ। କିନ୍ତୁ ଅତ୍ୟଧିକ ରକ୍ତସ୍ରାବ କାରଣରୁ ତାଙ୍କର ମୃତ୍ୟୁ ହୋଇଯାଇଥିଲା। ଏନେଇ ଖଜୁରିପଡା ଥାନାରେ ୨୦ା୨୦ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇ ଅଧିକ ତଦନ୍ତ କରାଯାଉଥିବା ତଦନ୍ତ ଅଧିକାରୀ ଏସଆଇ ବିକ୍ରମ ମଲ୍ଲିକ କହିଛନ୍ତି। ଏହି ଘଟଣା ପରେ ସମଗ୍ର ଅଞ୍ଚଳରେ ଶୋକରଛାୟା ଖେଳି ଯାଇଛି।

Comments are closed.