କେନ୍ଦ୍ରକୁ ମମତାଙ୍କ ଟାର୍ଗେଟ; କହିଲେ- ଅଢ଼େଇ ଲକ୍ଷ କୃଷକଙ୍କ ନାମ ପଠାଇଲି, ମିଳିଲାନି କିସାନ ନିଧି
କଲକାତା: କେନ୍ଦ୍ର ସରକାରଙ୍କ ଯୋଜନାର ଫାଇଦା ପଶ୍ଚିମବଙ୍ଗ ସରକାର ରାଜ୍ୟବାସୀଙ୍କୁ ଦେଉନାହାନ୍ତି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କରିଥିବା ଅଭିଯୋଗ ପରେ କେନ୍ଦ୍ରକୁ ଟାର୍ଗେଟ କରିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ। ମମତା ସୋମବାର ରାଜ୍ୟ ବିଧାନସଭାରେ କହିଛନ୍ତି ଯେ, ରାଜ୍ୟ ସରକାର ଅଢ଼େଇ ଲକ୍ଷ କୃଷକଙ୍କ ନାମ ପିଏମ ସମ୍ମାନ କିସାନ ନିଧି ଯୋଜନା ପାଇଁ ପଠାଇଥିଲେ। କିନ୍ତୁ ସେମାନଙ୍କୁ ଏଯାଏ କୌଣସି ଫାଇଦା ମିଳିନାହିଁ। ଏହା କ’ଣ ପାଇଁ ଆମେ ଜାଣିବାକୁ ଚାହୁଁଛୁ ବୋଲି ମମତା କେନ୍ଦ୍ରକୁ ପ୍ରଶ୍ନ କରିଛନ୍ତି।
ମମତା ବିଧାନସଭାରେ କହିଛନ୍ତି ଯେ, ରାଜ୍ୟ ସରକାରଙ୍କୁ କେନ୍ଦ୍ର ତରଫରୁ ୬ ଲକ୍ଷ ଚାଷୀଙ୍କ ତାଲିକା ପ୍ରଦାନ କରିବାକୁ କୁହାଯାଇଥିଲା। ସେଥିରୁ ଅଢ଼େଇ ଲକ୍ଷ କୃଷକଙ୍କ ନାମ କେନ୍ଦ୍ର ସରକାରଙ୍କୁ ପଠାଯାଇଥିଲା। କିନ୍ତୁ ଏହି ଚାଷୀମାନଙ୍କୁ କୌଣସି ଲାଭ ମିଳିଲା ନାହିଁ।
ମମତା କହିଥିଲେ, ରାଜ୍ୟର କୃଷକମାନଙ୍କୁ ନିଜର କୃଷକ ବନ୍ଧୁ ଯୋଜନା ପାଇଁ ସହାୟତା ରାଶି ବୃଦ୍ଧି କରି ୬ ହଜାର ଟଙ୍କା କରିଦିଆଯାଇଛି। ସେ ଆହୁରି କହିଥିଲେ ଯେ, ତାଙ୍କ ସରକାର ରାଜ୍ୟରେ ୧୯ ଔଦ୍ୟୋଗିକ ପ୍ରକଳ୍ପର ଶୁଭାରମ୍ଭ କରିବ, ଯେଉଁଥିରେ ୭୨ ହଜାର କୋଟି ଟଙ୍କାର ନିବେଶ ହେବ ଏବଂ ଏଥିରୁ ୩ ଲକ୍ଷ ୨୯ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ।