ସୁଆଣ୍ଡୋ : ପୁରୀ ଜିଲା ବୈଷ୍ଣବ କ୍ଷେତ୍ର ସାକ୍ଷୀଗୋପାଳ ମନ୍ଦିରକୁ ପୁଷ ମାସରେ ବାପଘରକୁ ଯାଇଥିବା ମା’ ମହାଲକ୍ଷ୍ମୀ ଗତକାଲି ମାସାନ୍ତ ତିଥିରେ ଭାର ଥୋର ସାଙ୍ଗରେ ଧରି ଫେରିଛନ୍ତି । ସୋମବାର ମକର ସଂକ୍ରାନ୍ତି ଅବସରରେ ଶ୍ରୀ ସାକ୍ଷୀଗୋପୀନାଥଙ୍କର ଦୈନିକ ନୀତିକାନ୍ତି ସହିତ ସ୍ୱତନ୍ତ୍ର ମକର ବେଢା ନୀତି କରାଯାଇଥିଲା। ଲକ୍ଷ୍ମୀଙ୍କ ଘରୁ ଆସିଥିବା ନୂଆ ଅରୁଆ ଚାଉଳ, ଛେନା, ପାଚିଲା କଦଳୀ, ନବାତ କ୍ଷୀର, ଖଇ, ଆଖୁ, ଅଦା, ନଡ଼ିଆ, ମରିଚ, ଗୁଜୁରାତି ଆଦି ନୂଆ ମାଟି ହାଣ୍ଡିରେ ମିଶାଇ ମକର ଚାଉଳ ପ୍ରସ୍ତୁତ କରାଯାଇ ମହାପ୍ରଭୁଙ୍କୁ ଭୋଗ କରାଯାଇଥିଲା। ସାକ୍ଷୀଗୋପୀନାଥ ପଶ୍ଚିମାଞ୍ଚଳ ଠାକୁର ହୋଇଥିବା ଦୃଷ୍ଟିରୁ ବର୍ଷ ତମାମ ଗହମ ଜାତ ଦ୍ରବ୍ୟରେ ପ୍ରସ୍ତୁତ ଭୋଗ ଲାଗି ହୋଇଥାଏ । ପ୍ରଚଳିତ ପ୍ରଥା ଅନୁସାରେ ଶ୍ରୀରାଧା ( ଲକ୍ଷ୍ମୀ ) ଓଡିଆଣୀ ହୋଇଥିବା ହେତୁ ତାଙ୍କ ବାପଘରୁ ଆସିଥିବା ଦ୍ରବ୍ୟରେ ମହାପ୍ରଭୁଙ୍କୁ ବର୍ଷକରେ ଥରେ ଚାଉଳରେ ପ୍ରସ୍ତୁତ ହୋଇଥିବା ମକର ଚାଉଳ ଭୋଗ ଲାଗି ହେବାର ପରମ୍ପରା ରହିଆସିଛି। ସୋମବାର ସକାଳୁ ମକର ଭୋଗ କରିବା ପାଇଁ ମନ୍ଦିର ପାଟ ଅଗଣାରେ ପଞ୍ଚୁକୋଶୀ ଶ୍ରଦ୍ଧାଳୁଙ୍କ ଗହଳି ଲାଗିଥିଲା। ଅନ୍ୟ ଦିନମାନଙ୍କରେ କେହି ଭୁଲରେ ମଧ୍ୟ ଠାକୁରଙ୍କୁ ଚାଉଳରେ ପ୍ରସ୍ତୁତ ଭୋଗ କରିନଥାନ୍ତି ।
