କୁଆଁପାଳ : କଟକ ଜିଲ୍ଲା ମାହାଙ୍ଗା ଥାନାର କୁମୁଡା ଜୟୀପୁର ଫାଣ୍ଡି ଅଂଚଳର ମଧୁପୁର ଗ୍ରାମରେ ଚୋରା ମଦ ବିକ୍ରୀକୁ ବିରୋଧ କରିବାରୁ ମଦ ବିକ୍ରି କରୁଥିବା ଜନୈକ ବ୍ୟକ୍ତି ସଂଘବଦ୍ଧ ଭାବରେ ଆକ୍ରମଣ କରି ଜଣେ ବୃଦ୍ଧଙ୍କୁ ପିଟି ପିଟି ହତ୍ୟା କରିବା ଘଟଣାକୁ ନେଇ ସମଗ୍ର ମାହାଙ୍ଗା ଅଂଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସୂଚନା ମୁତାବକ ମଧୁପୁର ଗ୍ରାମର ୬୨ ବର୍ଷୀୟ ବୃଦ୍ଧ ଗୟାଧର ବେହେରା ଗାଁରେ ଚୋରା ମଦ ବିକ୍ରିକୁ ବିରୋଧ କରି ଆସୁଥିଲେ। ତେବେ ବୃଦ୍ଧ ଗୟାଧର ଗତ ବୁଧବାର ଦିନ ଏହି ଚୋରାମଦ ବିକ୍ରି କରୁଥିବା ସେଇ ଗ୍ରାମର ଜୈନିକ ବ୍ୟକ୍ତିଙ୍କୁ ମଦ ବିକ୍ରି କରିବାକୁ ବାରଣ କରିଥିଲେ। ଏଥିନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା।
ଆଜି ଗୟାଧର ନିକଟସ୍ଥ ବଜାରରୁ ରାତିରେ ଫେରୁଥିବା ସମୟରେ ଜନୈକ ଚୋରା ମଦ ବେପାରୀ ଓ ତାଙ୍କ ସହଯୋଗୀମାନେ ସଂଘବଦ୍ଧ ଭାବେ ଗୟାଧରକୁ ଆକ୍ରମଣ କରିଥିଲେ। ଏଥିରେ ଗୟାଧର ଚେତାଶୂନ୍ୟ ହୋଇ ପଡିଯାଇଥିଲେ। ତାଙ୍କୁ ପରିବାର ଲୋକେ ତୁରନ୍ତ ନିକଟସ୍ଥ ଜଗନ୍ନାଥପୁର ମେଡିକାଲ ନେଇଥିଲେ। ସେଠାରୁ ଡାକ୍ତର ତାଙ୍କୁ ମାହାଙ୍ଗା ମେଡିକାଲ ଓ ପରେ କଟକ ମେଡିକାଲ ପଠାଇ ଦିଆ ଯାଇଥିଲା। କିନ୍ତୁ କଟକରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।ଜୟପୁର ଫାଣ୍ଡି ଠାରୁ ମାତ୍ର ଦୁଇ କିମି ଦୂରରେ ଏହି ହତ୍ୟାକାଣ୍ଡ ଘଟଣା ଘଟିଥିଲେ ସୁଦ୍ଧା ପୁଲିସ କାହାରିକୁ ଗିରଫ କରିନି। ଫାଣ୍ଡିରେ ଅଭିଯୋଗ ହୋଇ ନଥିବାରୁ ଘଟଣାର ପ୍ରକୃତ ରହସ୍ୟ ଜଣା ପଡ଼ିନାହିଁ। ତେବେ ମୃତ ଗୟାଧରଙ୍କ ପୁତ୍ର କଟକ ମେଡ଼ିକାଲରୁ ଫେରି ଫାଣ୍ଡିରେ ଅଭିଯୋଗ କରିବେ ବୋଲି ସୂଚନା ଦେଇଛନ୍ତି। ବାରମ୍ବାର ଚୋରା ମଦ ବିକ୍ରି ହେଉଥିବା ଫାଣ୍ଡିରେ ଅଭିଯୋଗ ହେଉଥିଲେ ବି ପୁଲିସ ହାତବାନ୍ଧି ବସିଥିବା ଓ ଏଭଳି ହତ୍ୟାକାଣ୍ଡ ଘଟିଥିବା ସାଧାରଣରେ ଆଲୋଚନା ହେଉଛି। ହତ୍ୟାକାଣ୍ଡ ନେଇ ଅଭିଯୋଗ ହେବା ପରେ ପ୍ରକୃତ ସତ୍ୟ ସାମ୍ନାଙ୍କୁ ଆସିବ ବୋଲି ଚର୍ଚ୍ଚା ହେଉଛି।
Comments are closed.