ଲମତାପୁଟ : ଯାନ୍ତ୍ରିକ ତ୍ରୁଟି ଯୋଗୁଁ ମାଛକୁଣ୍ଡ ଜଳ ବିଦ୍ୟୁତ ପ୍ରକଳ୍ପରୁ ବିଦ୍ୟୁତ ଉତ୍ପାଦନ ସ୍ୱାଭାବିକ ହୋଇଥିବା ବେଳେ ଦୁଇଟି ୟୁନିଟରୁ ୪୦ ମେଗାୱାଟ ବିଦ୍ୟୁତ ଉତ୍ପାଦନ ଆରମ୍ଭ ହୋଇଥିବା ଜଣାଯାଇଛି। ସୂଚନାଯୋଗ୍ୟ କୋରାପୁଟ ଜିଲା ମାଛକୁଣ୍ଡ ବିଦ୍ୟୁତ ପ୍ରକଳ୍ପରେ ଯାନ୍ତ୍ରିକ ତ୍ରୁଟି ଯୋଗୁଁ ଗୁରୁବାର ୧ନମ୍ବର ଟରବାଇନର ୧ନମ୍ବର ଟ୍ରାନ୍ସଫର୍ମରର ବୁସିଂ ଫାଟିଯାଇଥିଲା। ଫଳରେ ବିଦ୍ୟୁତ ଉତ୍ପାଦନରେ ସମସ୍ୟା ସୃଷ୍ଟି ହୋଇଥିଲା। ଏହାକୁ ଦୃଷ୍ଟିରେ ରଖି ବିଦ୍ୟୁତ ପ୍ରକଳ୍ପ ଅଧିକାରୀ ଅନ୍ୟ ଟରବାଇନଗୁଡିକୁ ବନ୍ଦ କରିଦେଇଥିଲେ। ଫଳରେ ମାଛକୁଣ୍ଡ ଜଳ ବିଦ୍ୟୁତ ପ୍ରକଳ୍ପର ୮୦ ମେଗାୱାଟ ବିଦ୍ୟୁତ ଉତ୍ପାଦନ ବନ୍ଦ ରହିଥିଲା। ଏଥିପାଇଁ ବିଦ୍ୟୁତ ବିଭାଗ ପ୍ରତି ଘଣ୍ଟାରେ ୧ଲକ୍ଷ ଟଙ୍କାର ରାଜସ୍ୱ କ୍ଷତି ସହିବାକୁ ପଡ଼ିଥିଲା। ବିଭାଗୀୟ ଅଧିକାରୀ ରାତି ତମାମ ବିଦ୍ୟୁତ ପ୍ରକଳ୍ପରେ କାର୍ଯ୍ୟ କରିଥିଲେ। ଅଧିକାରୀଙ୍କ ପ୍ରଚେଷ୍ଟାରେ ଶୁକ୍ରବାରଠାରୁ ବିଦ୍ୟୁତ ପ୍ରକଳ୍ପ ସ୍ୱାଭାବିକ ହୋଇଛି। ପ୍ରକଳ୍ପର ୨ନମ୍ବର ଓ ୪ନମ୍ବର ୟୁନିଟରେ ବିଦ୍ୟୁତ ଉତ୍ପାଦନ ଆରମ୍ଭ କରାଯାଇଛି। ୨ଟି ୟୁନିଟରେ ୪୦ ମେଗାୱାଟ ବିଦ୍ୟୁତ ଉତ୍ପାଦନ ହେଉଥିବା ଜଣାଯାଇଛି। ବିଦ୍ୟୁତ ପ୍ରକଳ୍ପରେ ୬ଟି ୟୁନିଟ ରହିଥିବା ବେଳେ ଅନ୍ୟ ୟୁନିଟଗୁଡିକ ମଧ୍ୟ ଧିରେଧିରେ କାର୍ଯ୍ୟକାରୀ କରାଯିବ ବୋଲି ବିଭାଗୀୟ ଅଧିକାରୀ ସୂଚନା ପ୍ରଦାନ କରିଛନ୍ତି।
Comments are closed.