ବିକାଶ ନାଁରେ ବିନାଶ – ଆଦାୟ ହୋଇପାରୁନି ଆତ୍ମସାତ ଅର୍ଥ

ଲୋଇସିଂହା: ଗ୍ରାମାଞ୍ଚଳରେ ଗମନାଗମନର ବିକାଶ ପାଇଁ ଉଭୟ ରାଜ୍ୟ ଏବଂ କେନ୍ଦ୍ର ସରକାରଙ୍କ ପକ୍ଷରୁ କୋଟି କୋଟି ଟଙ୍କା ଅନୁଦାନ ଆସୁଥିବା ବେଳେ ବଲାଙ୍ଗୀର ଜିଲା ଲୋଇସିଂହା ବ୍ଳକରେ କିନ୍ତୁ ଏହାର କୌଣସି ପ୍ରଭାବ ଦେଖିବାକୁ ମିଳି ନାହିଁ। ୨୦୧୪ରୁ ୨୦୧୬ ମଧ୍ୟରେ ଲୋଇସିଂହା ବ୍ଳକରେ ୪ କୋଟିରୁ ଊର୍ଦ୍ଧ୍ବ ଟଙ୍କାର ଆର୍ଥିକ ଅନିୟମିତତା ହୋଇଥିବା ଅଡିଟ୍‍ ରିପୋର୍ଟ ସ୍ପଷ୍ଟ କରିଥିଲେ ସୁଦ୍ଧା ବିଭାଗୀୟ ଅଧିକାରୀଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନ ହେବା ଏକ ପ୍ରକାର ବିକାଶମୂଳକ କାର୍ଯ୍ୟରେ ଅନ୍ତରାୟ ସୃଷ୍ଟି କରିଛି। ଅନ୍ୟ ପକ୍ଷରେ ସେହି ବ୍ଳକରେ କାର୍ଯ୍ୟରତ ଥିବା ତତ୍‍କାଳୀନ ବିଡିଓଙ୍କ ସମୟରେ ନିର୍ଦ୍ଦିଷ୍ଟ ଯୋଜନା ପାଇଁ ଆସିଥିବା ଉକ୍ତ ଅନୁଦାନ ରାଶିକୁ ଅନ୍ୟ କାମରେ ମନଇଚ୍ଛା ବିନିଯୋଗ କରିଥିଲେ।

ପୂର୍ବରୁ ବ୍ଳକର ରତାଖଣ୍ଡି ପଞ୍ଚାୟତର ବିରକେଲଠାରେ ଆଦାବାସୀ ଛାତ୍ରୀନିବାସ ନିର୍ମାଣ ପାଇଁ ଆସିଥିବା ୬୦ ଲକ୍ଷ ଟଙ୍କାକୁ ରାସ୍ତା ନିର୍ମାଣ କାମରେ ଲଗାଯାଇ ଅର୍ଥ ଆତ୍ମସାତ କରାଯାଇଥିବା ବେଳେ ବ୍ଳକର ବିଭିନ୍ନ ସାମଗ୍ରୀ ଖରିଦ୍‍ ସହ ଜେରସ୍କ, କମ୍ପ୍ୟୁଟର ଏବଂ ଏହାର ପରିଚାଳନା ପାଇଁ କର୍ମଚାରୀ ରହିଥିଲେ ହେଁ ଲକ୍ଷ ଲକ୍ଷ ଟଙ୍କାର ଜାଲ ବିଲ୍‍ କରାଯାଇଥିବା ଅଭିଯୋଗ ହୋଇଥିଲା। କଳାକାର ସଂଘ ପାଇଁ ଆସିଥିବା ୨ ଲକ୍ଷ ଟଙ୍କାର କୌଣସି ହିସାବ ମିଳୁ ନ ଥିବା ବେଳେ ବିଭିନ୍ନ ଯୋଜନାରେ ଆସିଥିବା ୪ କୋଟିରୁ ଊର୍ଦ୍ଧ୍ବ ଅର୍ଥ ବେଆଇନ ଭାବରେ ଖର୍ଚ୍ଚ କରାଯାଇଥିବା ଅଡିଟ ରିପୋର୍ଟରୁ ଜଣାପଡିଛି। ତେବେ ଅନିୟମିତ ଖର୍ଚ ହୋଇଥିବା ଅର୍ଥ ସମ୍ପୃକ୍ତ ବ୍ୟକ୍ତିଙ୍କ ଠାରୁ ଆଦାୟ କରିବା ପାଇଁ ନିର୍ଦ୍ଦେଶ ଥିଲେ ମଧ୍ୟ କୌଣସି ଫଳ ମିଳି ପାରିନାହିଁ।

Comments are closed.